Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Terus penggitan lẽq langit sopoq tande saq belẽq. Sopoq dengan nine saq bekelumbung siq jelo, kenyeke nganjeng lẽq atas bulan. Lẽq ulune araq sopoq mahkote saq berisi due olas bintang.

² Dengan nine nike kenyeke betian, dait lantaran sampun dateng waktune nganak, make ie nyurak kesakitan.

³ Terus penggitan ẽndah lẽq langit sopoq tande saq lain. Araq sopoq nage bẽaq toaq saq belẽq gati saq bedowẽ pituq otak dait sepulu tanggẽq. Sebilang otakne ngengadu sopoq mahkote.

⁴ Siq ẽlongne ie ngoros sepertelu bintang-bintang lẽq langit dait timpohne ojok gumi. Nage nike nganjeng lẽq julun dengan nine saq mẽlẽ nganak nike siq maksut gen belet anakne, sesampun ie teanakang.

⁵ Terus dengan nine nike anakang sopoq kanak mame saq gen mrẽntah selapuq bangse siq tunjang besi. Laguq kanak nike terampas lẽman dengan nine nike, terus tejauq tipaq Allah dait ojok arepan tahte-Ne.

⁶ Make dengan nine nike pelai ojok padang gurun, ojok taoq saq sampun tesedieang siq Allah umaq ie. Lẽq taoq nike ie gen tepeliharaq siyu satak enem dase jelo ngonẽqne.

⁷ Terus lẽq sorge araq perang. Mikael bareng kance malaẽkat-malaẽkatne betempur ngelawan nage nike. Dait nage nike tetulung ẽndah siq malaẽkat-malaẽkatne, ngelawan Mikael.

⁸ Laguq nage nike tekalahang. Ie dait malaẽkat-malaẽkatne ndẽq bau malik ndot lẽq sorge.

⁹ Nage saq belẽq nike tetetẽh ojok luah, nike ulah toaq saq tesebut Belis atao Sẽtan, saq nyesatang seantẽro dunie. Ie tetetẽh ojok gumi kance selapuq malaẽkatne.

¹⁰ Terus tiang dengah suare saq belẽq lẽq sorge bebase, "Mangkin sampun rauh keselametan, kuase, dait Kerajaan Tuhante serte kekuasean Almasih saq tejanjiqang nike. Sẽngaq saq nuduh semeton-semetonte lẽq arepan Allah kenjelo kekelem sampun tesugulang lẽman sorge.

¹¹ Semeton-semetonte sampun ngalahang ie siq daraq Anak Dombe nike, dait siq kesaksian ie pade. Ie pade rẽde ngurbanang nyawe ie pade jangke ninggal.

¹² Keranaq nike, sorge dait selapuq saq araq lẽq dalemne harus besukecite! Laguq celake gumi dait segare, sẽngaq Belis sampun turun tipaq side siq murke saq belẽq gati, sẽngaq ie nenaoq bahwe waktune karing seberaq."

¹³ Lẽq waktu nage nike sadar bahwe ie sampun tetetẽh ojok gumi, ie mulai palẽq dengan nine saq sampun nganakang kanak mame nike.

¹⁴ Laguq dengan nine nike teican due kelẽtẽk kedit rajewali saq belẽq, adẽqne kesur ojok taoqne lẽq padang gurun, nike taoqne tepeliharaq telu setenge taun ngonẽqne, jaoq lẽman serangan nage.

¹⁵ Make nage nike nyugulang luwẽq gati aiq lẽman biwihne maraq aiq kokoq tipaq dengan nine nike adẽqne teẽlẽhang siq kokoq nike.

¹⁶ Laguq dengan nine nike tetulung siq gumi; gumi pengangaq biwihne dait belet aiq saq sugul lẽman biwih nage nike.

¹⁷ Nage nike jari gedek gati lẽq dengan nine nike, terus ie lalo nyerbu keturunan saq lain lẽman dengan nine nike, nike selapuq dengan saq taat lẽq hukum-hukum Allah, dait saq ngebẽng kesaksian mengenai Deside Isa dait kuase-Ne.

Wahyu

Video Wahyu 12

Ikuti Kami:

KONTAK | PARTISIPASI | DONASI