Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bo kino'ontongandon kon ḷangit in tobatuí tanda mokoherang inta totok motoyang. Tobatuí bobay inta nopogiḷambung mata in singgai, simindog makow kon tudu im buḷan. Kon uḷunya oyuíon im bandow inta pinopobandangan in tundi mopuḷuh bodoyowaí.
2 Bobay tatua sidia, bo lantaran wakutunyadon mononggadií daí mogamui in sia sim pomangitondon bo monakit domandon.
3 Bo inontong domandon in tanda mokoherang ibanea kon ḷangit. Oyuíon tobatuí naga nopura inta totok moḷoben, pitu in uḷunya bo mopuḷuh in tungoinya. Pomuḷoi in uḷu pinakeían im mahkota.
4 Iputea pinomorotnya, sahingga sepertiga in tundi nongototak kom butaí. Naga tatua simindog makow kon tayowon im bobay inta koyogot mononggadií tua; sim moroncana moliom kon adií tatua aka pononggadiídon i inaínya.
5 Bo bobay tatua nopononggadiídon in tobatuí adií ḷoḷaki inta momarentah kom bayongan intau kon dunia na'a takin tungkud uatoi, ta'e adií tatua baḷuí bo inagow nongkon i inaínya bo dinia ko'i Allah kon tayowon pomomarenta'an-Nya.
6 Daí bobay tatua noḷagui nopobayak im padang gurun, tampat inta ain sinadia i Allah ko'inia. Sia iḷukadan kon tampat tatua solama 1260 nosinggai ing ko'onggotea.
7 Onda intua kon soroga nobaliídon im parang. Ki Mikhael takin malaekatnya mita noparang kon naga tatua, naga tatua binantungan doman im malaekatnya mita noparang takin i Mikhael.
8 Ta'e sinaḷow in naga tatua, daí sia takin malaekatnya mita diaídon inogoi nogutun kon soroga.
9 Naga inta moḷoben tatua pinogarab kon ḷuai. Sia tua in uḷag guranga, Ibilis in tangoinya ande dimukud mora'at inta monguboḷ magií-makow kon dunia na'a. Sia iḷumbuí kon dunia na'a takin malaekatnya mita.
10 Bo aku'oi nokodongog kon singog noḷangon nongkon soroga inta noguman, "Tana'adon i wakutunya ki Allah moposaḷamat kon umat-Nya!Tana'adon i wakutunya ki Allah mopo'ontong ing kawasa-Nya saḷaku Raja! Tana'a in Raja Mopoposaḷamat inta pinodandi tatua mopo'ontong domandon ing kakuasa'an-Nya! Sing ki inta moponapudmai doḷom singgai ko'i utat naton aim pinoḷuai nongkon soroga.
11 Duguí i Adií in Domba bo Habar Mopia nongkon i Allah inta pinota'au monia, tua im pinakeí i utat mita naton nonaḷow ko'inia. Mosia diaíbií mo'ondok im matoi.
12 Tuamai, koḷungangadon ing gina ikow soroga bo bayongan inta nogutun kom bonunya! Ta'e moboditodon mo'ikow butaí bo dagat, sin Ibilis ain noponag ko'i monimu takin sinumoruk totok sing kinota'auannyadon kom motoyongdon totok i wakutunya."
13 Kon wakutu in naga tatua nosadardon kon sia aim pinogonag kom butaí, mulaidon in sia mogaḷow kom bobay inta nopononggadií in adií ḷoḷaki tatua.
14 Ta'e bobay tatua inogoiandon ing kolikip doyowa. Kolikip im boniak moḷoben, simbaí ḷumayug in sia mayak in tampatnya kom padang gurun, tampat inta poḷukadan ko'inia solama toḷu notaong kapin, sim pomiḷagui kon uḷag.
15 Daí uḷag tatua noporoput in tubig moḷoben naonda bo ongkag. Pinoroputnya kom bobay tatua simbaí moḷomot kon tubig tatua.
16 Ta'e bobay tatua sinuḷungan im butaí, binukaí im butaí tatua im bibignya bo noliom kon tubig inta iḷumuai nongkon bibig in naga tatua.
17 Naga tatua totokdon in sinumoruí kom bobay tatua, sahingga minayak nogaḷow kong katurunan bobay tatua ibanea. Mosia inta umuran dinumudui kom parentah i Allah bo inta nobogoi ing kosaksian soaáḷ ki Yesus bo kawasa-Nya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA