Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Den omi tanda mejangngaran dikita jao langi' to te'da susinna. Den baine nabukku' allo na ia to ajena llese bulan. Na ia to ulunna mpumahkota sangpulo dua bintuin digaraga.

² Keba'tangngi joo baine, nadete'mi wattu kakeanakanna, nasumarro mapa'dik nakua, "Ando' ee."

³ Ta'pa dikita pole' omi to tanda mejangngaran jao langi'. Den mesa' naga malea liwa' tonggo, ulunna pitu na sangpulo tandukkuna. Ia tuu lako ulunna pada mpake mahkota.

⁴ Ia to ikko'na napake rrui' sangtawa tallunna bintuin jao langi', napellekkosanni tama lino. Ia joo naga ke'deh bang jio olona joo baine la keanak, nakua anna ta'pa ngkandei to anakkana ke jajimi.

⁵ Keanakmi joo baine njajian pea muane to la mparenta sininna bangsa mpake tekken bassi. Apa ia joo pea dirampai jio mai joo baine nadibawa lako Puang jao cadokkoan mala'bih-Na.

⁶ Ia joo baine palaii lako ngenan to mangkamo napasadianni Puang jio padang pallawangan anna dijaranai jio sangsa'bu dua ratuh annan pulona allona.

⁷ Anna sirari to malaeka' jao suruga. Mikhael sola malaeka'na nnewai joo naga, apa ia joo naga nabalii toda ia malaeka'na.

⁸ Apa ia joo naga ditaloi, na te'damo nadieloran mari'pih lan suruga,

⁹ nadipenca'bean tama lino sola sininna malaeka'na. Ia to naga, iamo to ulah tua disanga Ballisi' ba'tu puanggawana setang to mpalao sala sininna tau lan lino.

¹⁰ Angkusa'ding gamara liwa' tonggo jao suruga nakua, "Mammula tee too napasalama'mi Puang Allataala to umma'-Na. Ia toomo tee nanii mpangpekitan kuasan-Na Puangta' susi raja. Napangpekitan todamo kuasan-Na to Raja Mangpasalama' to napileanki'. Jaji ngasanmi susi tee, nasaba' ia to Ballisi' tomparapa' tarruh bang padanta' tomatappa' jio olo-Na Puangta' Puang Allataala mangkami diula'i lan mai suruga.

¹¹ Mangkami nataloi padanta' tomatappa' mpake rara-Na Anak Bembala' ba'tu rara-Na Puang Isa na Kareba Kasalamatan to mangkamo napangpeissenan. Te'da najampangngi sunga'na moi na la mpumatei.

¹² Iamo joo tamangmaroah-roahmo antaparannu-rannu to kita' mari'pihmo inde' suruga. Apa maparri'mo kamu' totorro lan lino, nasaba' mellaomi mati' to Ballisi', liwa' birih, sanga naissenni kumua ci'di'mora to wattunna."

¹³ Ia tonna issenmi joo naga ba'tu Ballisi' kumua mangkami dipenca'bean tama lino, naula'imi joo baine mangka njajian pea muane.

¹⁴ Apa ia joo baine dibenni dua pani' langkan tedong matonggo napake mentia' lako padang pallawangan to dinii njaranaii tallung taun sitangnga anna salama' jio mai kamabirisanna joo ulah ba'tu Ballisi'.

¹⁵ Ia joo ulah mpemburasan wai liwa' buda lako boko'na joo baine namenjaji susi sa'dan dikua nabawai wai joo baine.

¹⁶ Apa ia to padang ntulungngi tee baine, anna tibakka naamma'i to wai messun lan mai anga'na joo naga.

¹⁷ Liwa' birih joo naga lako joo baine anna male rrarii to anak laenna, iamo to tonturu' pakkaeloran-Na Puang Allataala sola to menjaji sa'bin-Na Puang Isa.

Wahyu

Video Wahyu 12

Ikuti Kami:

KONTAK | PARTISIPASI | DONASI