Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ O TUHAN, inget min kai si nggo jadi man kami. Perdiateken min kami nehen min uga melana iakap kami.

² Tading-tadingen kami ibuat kalak si la itandai bangsa si deban nge si ngiani rumah kami.

³ Bapa kami nggo ibunuhi imbang-imbang kami, emaka genduari nggo mbalu nande kami.

⁴ Lau man inemen terpaksa igalari kami, kayu man ranting terpaksa itukur kami.

⁵ Mekelek kami ielis-elis, alu pasangen i das kuduk kami, latih iakap kami, tapi la ipediat kalak kami ngadi.

⁶ Guna ndatken pangan maka ula mate, mindo kami man bangsa Mesir ras Assur.

⁷ Nggo erdosa nini-nini kami, tapi genduari lanai ia i je. Genduari mesui ate kami mersan dosa-dosana.

⁸ Genduari kami iperentah bangsa budak, janah ise pe la ngasup mulahi kami i bas kuasana nari.

⁹ Pemunuh gawah-gawah arah juma-juma nari. Iasamken kami kesah kami lako ndarami pangan.

¹⁰ Lumben mahanca kami penakiten, seh maka kuling kami seri lasna ras ginuhur.

¹¹ Ndehara kami nggo iperkosa Deleng Sion, i bas tep-tep kuta i Juda anak kami si nguda-nguda ipaksana.

¹² Peminpin-peminpin kami nggo iukum gantung pertua-pertua kami lanai iergakenna.

¹³ Anak-anak perana ipaksana ngerik gandum desken budak, danak-danak jongkang perban beratna maba ranting.

¹⁴ Pertua-pertua lanai ngada-ngada i bas pintu gerbang, si medanak lanai engkuit kulcapi.

¹⁵ Keriahen nggo lawes i bas geluh kami nari. Paksa landek nggo salih jadi paksa ngandung.

¹⁶ Kerina si iagahken kami lanai lit tading. Kami nggo erdosa, janah genduari kami nggo bene.

¹⁷ Mesui kal pusuh kami, janah si e menam la teridah arah iluh kami mambur.

¹⁸ Sabap Sion nggo terulang, nggo melungen, biang kerangen gawah-gawah arah runtuhenna.

¹⁹ Tapi kam kap O TUHAN raja si rasa lalap, si merentah terus ku bas kedungen paksa-paksa.

²⁰ Ngkai maka bage dekahna kami ItadingkenNdu? Ndigan denga kin kami IngetNdu?

²¹ Baba kami mulihken man BaNdu, O TUHAN! Baba kami mulihken! Ulihken kemulian kami si nai.

²² Ntah ItulakNdu kin kami rasa lalap? La kin lit sibarna Kam merawa?