Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Inakkemi tau angkasiakai pa’risika lanri nitujuku ri pangngalarroiNa Allata’ala.
2 Pila’ bellama’ nire’resang antama’ ri tampa’ sassang makkapuka.
3 A’mole-molea’ niba’ji, tuntungallo tamangngamaseang.
4 A’bokka’-bokka’ kalengku napakamma, na tepo’ buku-bukungku.
5 Sangnging sessa mami na pa’risi’ kukasia’.
6 Nipassa’ ammantang lalang ri sassang rapang tau mate ri jammang allaloa.
7 Nijarrekia’ nisikko’, sa’genna tenamo oloangku lassulu’.
8 Ammarranga’ appala’ tulung, mingka taerokai Allata’ala ampilangngeria’.
9 Narompai kabusuki oloangku siagang tembo’-tembo’ batu natannanga.
10 Rapangi kongkong romang attayang rapangi singa anruppaia’.
11 Naondanga’ sanggengku ammengka ri oloanga, na Nakae-kae batangkalengku nampa Nabokoia’.
12 Napabantangi anrong panaNa, nampa Nalio-lioa’ siagang panaNa.
13 Annarrusuki panaNa ri kalengku sa’genna tattinting ri atengku.
14 Sila’busu’ alloa’ nikakkali ri sikontu taua, kunipa’jari cau-cauang.
15 Poro paikaji bawang Nasareanga’ untu’ kanreku siagang je’ne’ inungku.
16 Napakesoki rupangku ri buttaya Napatunrungi gigingku ri batua sa’genna tepo’.
17 Salloma’ tena nakukasiaki tallasa’ mate’nea; kukaluppaimi antekamma kasia’na nikanaya salewangang.
18 Takuassengami nikanaya masahoro’, lanynya’mi panrannuangku ri Batara.
19 Punna kunawa-nawa pa’lampangku malla’bang siagang sare ballasakku rapanga’ angnganre racung pai’ kasia’na.
20 Tulusu’ kunawa-nawana anjo passalaka, sa’genna kamma tunijallakkang pa’maikku.
21 Mingka manna nakamma mamo ambangunji ammotere’ panrannuangku, ri wattunna kuu’rangi anne passalaka:
22 Anjo pangngamaseanNa Batara sa’gennai satunggu-tungguna, tena la’busu’na passare baji’Na,
23 tuli beruna tunggala’ bari’basa’ tojeng-tojeng, anjo Batara tena le’bakai amminra pa’mai’Na!
24 Batara bawang, tena ruanna rapang barang-barang kupatanga. Lanri kammanami anjo, kumanrannuang mae ri Ia.
25 Mabajiki Batara mae ri tau manrannuanga mae ri Ia, siagang mae ri tau tuli amboyayai.
26 Jari, bajiki kisannang attayang sa’genna battu Batara untu’ antulungki’;
27 bajiki nakippilajara’ sa’bara’ ri wattunta rungka ija.
28 Ri wattunta Nisare kaballassang ri Batara paralluki’ sannang ammempo kale-kalenta.
29 Parallui nipakatuna kalenta na nipassareang kalenta lanri nia’na ija panrannuang.
30 Manna kinipakkanai siagang nitempaka’rang, parallui nitarima ngaseng anjo kammaya.
31 Nasaba’, tena nalaNasorongbokoki’ Batara untu’ satunggu-tungguna.
32 Punna le’bakki’ Nasare kaballassang lamangngamaseangi antu mae ri katte, lanri tuli Nakamaseanta ri pangngai tamattappu’Na.
33 Taerokai pa’mai’Na ambalang parekangki’ ballasa’ siagang si’na.
34 Punna kamma tunijallakkang pa’maitta lalang ri tahananga,
35 punna tappela’ ha’ Napassareanga Batara mae ri katte,
36 lanri nitunggengi kaadelanga, mattantu Naassengi siagang Naparhatikangi Batara.
37 Punna tena Nakaerokangi Batara apa-apaya mattantu tenana nakkulle rupataua anggaukangi apa-apaya.
38 Anjo bajika siagang ja’dalaka nigaukangi lanri parentaNa bawang Batara.
39 Angngapa namusti akkunrareng taua punna nihukkung lanri dosa-dosana?
40 Bajiki massing nisalidiki tallasatta, na kimmotere’ mange ri Karaeng Allata’ala niaka ri suruga. Umba nanisungke atinta nakiappala’ doang angkana,
41 (3:40)
42 "Dorakami anne ikambe siagang angngewai mae ri Katte, o Batara, na tena Kipamopporangi ikambe.
43 Kiondangi ikambe nampa Kibuno taccokkomi pangngamaseanTa lalang ri larroTa.
44 Anjo larroTa rapangi rammang kapalaka sa’genna takkullea nitarrusu’ ri pappala’ doanna ikambe.
45 Kipare’mi ikambe rapang loro ri dallekanna bonena sikontu linoa.
46 Nihinami siagang nikakkalimi ikambe ri musunna ikambe;
47 nitujui ikambe ri bala siagang kaancurang, nia’mi kambe ilalang ri bahaya siagang kamallakkang.
48 Ammatti’ je’ne’ matangku rapang je’ne’ binanga assolong lanri ancuru’namo bansaku.
49 Tena kulammari angngarru’,
50 sa’genTa iKatte Batara niaka battu ri suruga amparhatikangi ikambe.
51 A’jari si’nai pa’maikku anciniki sarenna tubaine niaka ri kotana ikambe.
52 Rapanga’ jangang-jangang, niondang ri musu natakuassenga apa salangku.
53 Napela’ attallasaka’ antama’ ri bungung kalotoro’ nampa natambungia’ ke’nanga batu.
54 Naiki je’neka sa’genna ulungku, nakuappikkiri’ angkana, ‘Narapi’mi anne a’jalakku!’
55 O Batara, akkioka’ ri Katte, battu ri anjo bungung lantanga.
56 Kupala’ dudui gassingka Kitongkoki tolinTa mae ri pappalakku sollanna Kitulunga’. NaKipilangngerimo pappalakku, siagang battu maKi’ a’reppese’; Kikana, ‘Teako mallakki.’
57 (3:56)
58 BattuKi’ antulunga’ ri kara-karaku o Batara, naKipasalama’mo nyawaku.
59 Kiciniki kaja’dallang nigaukanga mae ri kalengku, rancana ja’dala’na musu birisika ri kalengku. Lanri kammana anjo, o Batara, alleia’ anne ri parkaraku.
60 (3:59)
61 IKatte, Batara, Kilangngereki antekamma bateku nihina; Kiasseng ngasengi rancanana ke’nanga.
62 Tuntungalloa’ nabicara ke’nanga. Untu’ ancilakaia’, appareki ke’nanga rancana palla’.
63 Battu ri bari’basa’ sa’genna bangngi, sangnging inakke mami nakakkali.
64 Kihukkung laloi ke’nanga situru’ panggaukanna o Batara.
65 Tunraimi ke’nanga, siagang lappassammi ke’nanga tuli tappu’ minasa.
66 Kiondangi siagang Kiancuru’ kabusuki ke’nanga sa’genna cappu’ ke’nanga nibarrasa’ battu ri linoa."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA