Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E dhalem dukana Pangeran apareng okoman, Siyon epapetteng calemodan. Kaagunganna Isra’il se tenggina salangnge’, la esampaddagi ka bume. E bakto Pangeran duka, Padalemmanna e Siyon balakka’ ta’ eparduli sakale.
2 Saneyap teggal e nagara Yehuda bi’ Pangeran epaancor ta’ ekaneserre sakale. E dhalem dukana Pangeran magujur teng-binteng se ngaobi nagara jareya. Karaja’an jareya ban para pamimpinna epagulu’ sampe’ daddi nespa.
3 E dhalem dukana se rabak bal-kobalan, kakowadanna Isra’il epotel epapotong. E bakto moso dhateng alorok, Pangeran ta’ kasokan nolong. Akantha apoy se ngello’ matompes sabarang se badha, kantha jareya dukana PANGERAN ka sengko’ ban ba’na.
4 Padha ban moso Pangeran menthang gandhibana, ngaceddagi panana ka sengko’ ban ba’na. Reng-oreng se masenneng atena sengko’ ban ba’na epate’e kabbi bi’ Salerana. Pangeran nyemburragi dukana akantha apoy ka dhalem Kottha Yerusalim reya.
5 Pangeran daddi padha ban moso, mokol Isra’il epasampe’ ngalotor. Teng-binteng ban ton-karaton epaancor ban nambai kasossa’an ban karekongan se tadha’ ambuna ka pandhudhu’ Yehuda.
6 PANGERAN maancor Padalemmanna, kennengnganna oreng akompol nyemba ka Salerana. Oreng epaloppa ka re-are raja ban are Sabat. Sabab Pangeran talebat dukana, imam ban rato padha etolak.
7 Pangeran nolak mezbana se socce, Padalemmanna eonduri; moso epanneng magujur dhung-geddhungnga, rak-soragan polana kamennanganna neng e kennengngan se bi’ sengko’ ban ba’na lamba’na ekennengnge abakte ka Pangeran.
8 PANGERAN la neptebbagi ja’ dhung-geddhungnga Siyon kodu epagujur. Dhung-geddhung jareya la eokor sopaja kabbi ekennenga epaancor. Dhung-geddhung ban ra-manarana, sateya la daddi jur-gujuran kabbi.
9 Bang-labang sakethengnga katopowan tana, lang-palangnga padha potong tadha’ karena; rato ban ja-pangrajana pamarentana badha e pambuwangan. Hokomma PANGERAN la ta’ eajarragi pole, nabbi tadha’ se narema wahyu dhari PANGERAN pole.
10 Para wa-towa Kottha Yerusalim toju’ e tana tadha’ cacana; e cethagga etaburi abu ban tana, akalambi kaen karong menangka tandha sossa. Ban-parabanna nyokel sampe’ ka tana.
11 Tang mata sampe’ mondul polana nanges tadha’ ambuna, tang sokma rekong tadha’ bandhinganna. Tang ate ancor nangale’e ngalotora tang bangsa, nangale’e na’-kana’ ban babaji’ kalengnger e rong-lorongnga kottha.
12 Na’-kana’ jareya padha pelka’ ban lapar nanges menta ngenom ban ngakan ka ebuna. Akantha oreng se loka, na’-kana’ jareya padha robbu e rong-lorong terros mate e reba’anna ebuna.
13 O Yerusalim, Kottha Siyon se kakase, karosaganna ba’na akantha tase’ raja. Ngoca’a apa sengko’ reya? Baramma carana sengko’ se alepora ba’na? Sabab tadha’ laenna se tao nyandhang sangsara akantha ba’na; tadha’ se bisa mabali kabadha’anna ba’na akantha asalla.
14 Se epanapa’ bi-nabbi ka ba’na pera’ tepowan ban caca lecek malolo. Bi-nabbi jareya ta’ tao nyengkap dusana ba’na, daddi ba’na ta’ atobat sakale. Sabaligga bi-nabbi jareya pera’ manapa’ ka ba’na caca lecek se ngapencot ate.
15 Sakabbinna oreng se lebat nye-ngenye ba’na, sabab ba’na la ancor tadha’ karena. Reng-oreng jareya pek-kepeggan sambi ngoca’, "Reya ya, kottha se paleng bagus rowa, se egung-agungngagi bi’ oreng sadunnya?"
16 So-mosona ba’na padha ngabas ka ba’na bi’ ate baji’. Reng-oreng jareya padha nyambibi’, agella’an sambi ngoca’, "Kottha rowa bi’ sengko’ la epamosna! Dhi-budhina napa’ keya bakto se ete’-nante’ sengko’ reya!"
17 PANGERAN la alampa’agi dhabuna se ngara sengko’ ban ba’na dhari lamba’na, se la epaenga’ ka sengko’ ban ba’na. Sengko’ ban ba’na epaancor, ta’ ekaneserre sakale, kamennangan eparengngagi ka moso, se epaperak nangale sengko’ ban ba’na ngalotor.
18 He, dhung-geddhungnga Yerusalim, mara aera’ ka Pangeran! Pagili aeng matana akantha songay se agili malem ban seyang. Ja’ ambu, nanges terros, sampe’ badanna ba’na lesso!
19 Jaga li-baliyan samalem benteng kaangguy aserro ka Pangeran notorragi atena se rekong. Nyo’on sopaja Pangeran bellasa ka ba’na, ban ka na’-ana’na se kalaparan ban se kalengnger e saneyap luk-biluganna lorong.
20 Ngereng oladi, GUSTE, oladi reng-oreng se sareng Junandalem eseksa ka’dhinto! Ba’ badha’a se oneng epakadi ka’dhinto sareng Junandalem? Ebu neddha ana’na se paleng ekaase’e, imam sareng nabbi epate’e e Padalemman Socce.
21 Towa ngodha mate ajalamperran e lorong, ngangodhadan lake’ bine’ mate ekenneng peddhangnga moso. E are baktona Junandalem duka reng-oreng gapaneka sareng Junandalem esambelli sadaja, sabab Junandalem ampon ta’ bellas.
22 Junandalem ngonjang so-moso se ekatako’e abdidalem, epadhateng epapesta kakejjemman e sakalenglengnga abdidalem. Moso gapaneka mate’e sadaja se epeyara sareng se ekaase’e abdidalem sadaja. E are dadukan gapaneka tadha’ oreng settonga se lopot dhari okoman.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA