Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Rawa TUHAN nggo nutupi Sion alu kegelapen. Kemulian Israel si meganjang nggo idabuhken. I bas wari e Rumah Pertoton pe itadingken TUHAN.
2 Ikernepken TUHAN kerina kuta-kuta Juda, sada pe lanai IkelengiNa. IruntuhkenNa benteng-benteng si mbentengi negeri e. IruntuhkenNa kerajan ras raja-rajana.
3 Alu rawana si gara IripukkenNa gegeh Israel. La Ia nampati tupung reh musuh-musuh. RawaNa gurlah man banta bali ras api, kai pe kernep IbahanNa.
4 IrentangNa anak PanahNa man banta desken musuh. Kerina kita si ermeriah ukur ras ersenang-senang IbunuhNa. I Jerusalem enda kerina kita ngenanami RawaNa si gara.
5 Desken musuh, TUHAN nggo ngeradasken Israel. Benteng-benteng ras istanana nggo runtuh IbahanNa. Kepiceten si la erpeltep-peltep nggo IbabaNa man Juda.
6 Rumah Pertoton InganNa i sembah nggo meripuk IgudamNa. Wari-wari si badia ras Sabat lanai inget kalak. Raja ras imam nggo ngenanami gegehna rawa TUHAN.
7 Batar-BatarNa nggo itulak TUHAN, Rumah PertotonNa si badia nggo ItadingkenNa. IpediatNa imbang ngeruntuhken tembok-tembokna. Ersurak-surak ia i bas Rumah Pertoton bali ras tupung ia nembah alu dem keriahen.
8 TUHAN nggo netapken maka tembok-tembok Sion la banci lang runtuh. Nggo IbahanNa KetetapenNa maka la banci lang kota e radas kerina. Menara-menara ras tembok-tembokna nggo meruntuh kerina.
9 Pintu-pintu gerbangna nggo tanem i bas taneh, tiang-tiangna perper seh getem. Raja ras bangsawanna genduari nggo ibuang. Undang-undang lanai iajarken, nabi-nabi lanai ndatken pengenehenen i bas Dibata nari.
10 Tua-tua Jerusalem kundul i bas taneh, sip saja. Abu itamakenna i babo takalna, uis guni tanda ceda ate nutupi dagingna. Singuda-nguda mungkuk takalna seh ku taneh.
11 Seleng matangku ndekahsa ngandung, getem kal pusuhku. Keri gegehku, ceda kal ateku perbahan nggo radas kal bangsangku. Anak-anak ras anak gara-gara terketes gedang-gedang dalan kota e.
12 Muas ras melihe ia, ngandung ia man nandena. Gulingen ia i gedang-gedang dalan tempa-tempa luka, janah manjar-anjar perpatena i bas ampun nandena.
13 O Jerusalem si kukelengi, kai nari si banci kubelasken? Uga denga ningku ngapuli kam? La lit kalak si pernah ngenanami kiniseran si bage kelekna. Desken lawit si mbelang si la tersibari bage kap kiniseran si jadi man bandu, lanai kap lit si man arapenken.
14 Lanai lit si man turinken nabi-nabindu seakaten nuriken si la tuhu. Khotbahna nebu-nebu kam ngenca sabap la pernah icidahkenna dosa-dosandu. Ibahanna perukurenndu maka la kam perlu jera.
15 Kalak si mentas arah kota e megombang ngenehen kam. Ngupir dingen, tawa ia ngidah Jerusalem si nggo runtuh. Nina, "Enda kin kota si mejile nai? Enda kin kota si ihagaken i doni enda?"
16 Kerina imbang-imbangndu nguru-nguru kam, merlang matana ngenen kam perban segatna atena. Incum-incumi kalak kam janahna nina, "Nggo radas si bahan ia! Enda me kap wari si itimai-timai kita!"
17 Nggo ibahan Tuhan sue ras si IsurakenNa, sitik pe la AteNa mekuah, sue ras si nggo IsingetkenNa nai-nai nari. IbahanNa maka menang imbang-imbangta, IberekenNa man bana keriahen i bas kita guling.
18 O Jerusalem, pelepas tembok-tembokndu serko man TUHAN! Pediat iluhndu erdire-dire suari ras berngi. Latihi bandu alu tangis ceda ate!
19 Gedang-gedang berngi kekelah, jenari terusken ka ngandung man TUHAN. Kusekenlah isi pusuhndu, pindolah perkuah AteNa guna anak-anakndu. Anak-anak si sangana lumben i bas tep-tep suki gedang-gedang dalan!
20 O TUHAN nehenlah! Uga suina ate kami IbahanNdu! Pernanden-pernanden mangani daging anak-anak si ikelengina. Imam-imam ras nabi-nabi ibunuhi i bas Rumah Pertotonna jine!
21 Nguda ras metua seri kerina, maten i gedang-gedang dalan. Anak perana ras singuda-nguda, mate ipan pedang musuh. Tupung paksa warina Kam merawa IbunuhNdu ia alu la sitik pe AteNdu mekuah.
22 ItenahkenNdu imbang-imbangku erbahan pesta meriah i sekelewet kami. Janah la lit sekalak pe si ngasup pulah tupung warina kam merawa. Itanemkenna anak-anakku si kuasuhi ras kukelengi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA