Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ O TUHAN, Kam kap Dibata si erbalas, cidahken min RawaNdu, o TUHAN.

² Kekeken, o Hakim kerina manusia, ukum min kalak si megombang sue ras perbahanenna.

³ O TUHAN, ngayak ndigan kalak si ilat peganjang bana? Asa kai nari dekahna meriah iakapna?

⁴ I bas babahna nari luar kata-kata si megombang, iagahkenna kerina perbahanenna si jahat.

⁵ O TUHAN, itindasna BangsaNdu, IripukkenNa kalak si IpilihNdu.

⁶ Diberu balu-balu ras anak melumang ibunuhna, rikut pe ras kalak pertandang si ringan i negeri enda.

⁷ Nina, "Labo kita idah TUHAN, labo kita iperdiateken Dibata nu Israel."

⁸ O bangsangKu, uga maka bage kal motundu? Ndigan denga kam erlajar pentar?

⁹ Dibata kap si njadiken cupingta, banci kin Ia la erpemegi? Ia si njadiken matanta, banci kin Ia la erpengidah?

¹⁰ Ia si ngajari bangsa-bangsa, banci kin ia la ngukum? Ia nge jadi guru man kalak kerina, banci kin la lit PemetehNa?

¹¹ Ieteh TUHAN nge kerina perukuren manusia, IetehNa maka sia-sia kap isuraken manusia.

¹² Sangap kal kalak si IdidikNdu, o TUHAN, kalak si man bana IajarkenNdu undang-UndangNdu.

¹³ IpetenengNdu ia tupung wari-wari kesuhsahen, seh ngayak kalak jahat ndabuh ku bas lubang.

¹⁴ Sabap labo IetehNdu nulak BangsaNdu, o TUHAN, labo AteNdu ItadingkenNdu SikerajangenNdu.

¹⁵ Emaka kinibujuren pe ipake ka mulihi, janah kerina kalak bujur ngikutkenca.

¹⁶ Ise nampati aku ngelawan kalak jahat? Ise ngkapiti aku ngelawan kalak si erbahan ilat?

¹⁷ Adi la min ndai aku IsampatiNdu o TUHAN, narus aku ringan ku bas doni kematen.

¹⁸ Tupung aku Rukur "Ndabuh me aku," i je keleng AteNdu si tetap erbahanca aku lalap paguh.

¹⁹ Kune la tetap ukurku dingen aru ateku, Kam si ngapuli dingen si periahken ateku.

²⁰ Kam la nggit erteman ras hakim-hakim penipu, si pepinter-pinter si la bujur.

²¹ Ersada takina ngelawan kalak bujur, dingen mereken ukumen mate man kalak si la ersalah.

²² Tapi Kam IbelaNdu aku, o TUHAN, Dibatangku, Kam si ngkawali aku.

²³ IukumNdu kalak jahat sue ras kejahatenna, IkernepkenNdu ia erkiteken dosana, TUHAN Dibatanta kap si ngkernepkenca.