Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sada Psalm. Doding bani Ari Sabat. (92-2) Na madear do mamuji Jahowa ampa mandodingkon goran-Mu, Ham ale Sitimbulan,

² (92-3) mangambilankon idop ni uhur-Mu sogod ampa hasintongan-Mu borngin,

³ (92-4) marhasoman parugas sisapuluh tali pakon arbap, iirikkon sora ni husapi.

⁴ (92-5) Ai ipamalas Ham do uhurhu, Ham Jahowa marhitei pambahenan-Mu, marolob-olob do ahu mangidah jadi-jadian ni tangan-Mu.

⁵ (92-6) Banggal ni in pambahenan-Mu, Ham Jahowa, bagas tumang do pingkiran-Mu.

⁶ (92-7) Jolma na bodoh seng iarusi anjaha jolma na lontong seng iartihon ai.

⁷ (92-8) Age pe martumbor parjahat songon poyon-poyon, anjaha marbunga sagala sihorjahon na masambor, sisedahonon do sidea sadokah ni dokahni.

⁸ (92-9) Tapi anggo Ham, ale Jahowa, timbul do ronsi sadokah ni dokahni.

⁹ (92-10) Tongon, munsuh-Mu, Ham Jahowa, tongon, munsuh-Mu magou do; mambur merap do sagala sihorjahon hajahaton.

¹⁰ (92-11) Tapi ipagijang Ham do tandukku songon tanduk ni ursa, iminaki Ham do ahu bani minak na bayu;

¹¹ (92-12) sombuh do matangku mangidah pardabuh ni munsuhku, anjaha megah pinggolhu manangar parmagou ni siimbang ahu.

¹² (92-13) Halak parpintor martumbor do songon kurma, anjaha martunas songon hayu ares i Libanon.

¹³ (92-14) Sidea na sinuan i rumah ni Jahowa, sai marbunga do sidea bani alaman ni Naibatanta;

¹⁴ (92-15) marbuah do sidea age dob matua, tongtong tabun anjaha maratah,

¹⁵ (92-16) laho mangambilankon, “Pintor do Jahowa, Batu Ginggingku, anjaha seng dong hagedukon Bani.”