Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Untu’ pamimping pakelong. Situru’ lagu: Gitit. Pammujina golongang Korah. (84-2) Tamaka appakasannanna tampa’ pammantanganTa, o, Allata’ala Kaminang Koasaya!

² (84-3) Tamaka nakku’na pa’maikku ri BallatTa, akkio’ rannui nyawaku siagang batangkalengku mae ri Allata’ala mattallasaka.

³ (84-4) Ba’lalo manna cui-cuia anggappa todong balla’ jangang-jangang ri allaka anggappa ru’mung, tampa’ pammolikang ana’na ri ampi’ tampa’ pakkoro’bangnganTa, o, Batara Kaminang Koasa, Karaengku siagang Allata’alaku.

⁴ (84-5) Tamaka mate’nena tau ammantanga ri BallatTa, na tuli makkelong lagu pammuji mae ri Katte.

⁵ (84-6) Mate’nei tau anggappaya kagassingang battu ri Katte, eroka mange assiara ri Bulu’ Sion.

⁶ (84-7) Lalang a’jappana ke’nanga numalo ri Ka’bung Baka, napinrai anjo tampaka a’jari timbuseng je’ne’, uru bosia angngerang barakka’ alla’bi-la’bi.

⁷ (84-8) Pila’ katambang kagassinganna ke’nanga, wattu a’jappana mange ri Sion, mange ri tampa’ Allata’alana sikontu rewataya ampappicinikangi kalenna.

⁸ (84-9) Kipilangngeri laloi pappala’ doangku, o, Karaeng Allata’ala Kaminang Koasaya, Kipilangngeri laloi, o, Allata’alana Yakub.

⁹ (84-10) Kibarakkaki karaenna ikambe, o, Allata’ala, Kijagai laloi tau le’baka Kipile.

¹⁰ (84-11) Bajikangngangi sialloa ri BallatTa nasisa’bu allo ri tampa’ maraenga. Kualleangangi a’jaria pajaga ri pakke’bu’ lompona Balla’Na Allata’alaku naia ammantanga ri balla’ tau ja’dalaka.

¹¹ (84-12) Saba’ Karaeng Allata’ala pa’la’langanta siagang Karaeng Malompo, assidakkiaki’ pangngamaseang siagang kalompoang. Tale’bakai Natolla’ apa bajika mae ri tau tenaya callanna ri tallasa’na.

¹² (84-13) O, Batara Kaminang Koasaya, mate’nei tau tappaka mae ri Katte.

Mazmur

Video Mazmur 84

Ikuti Kami:

KONTAK | PARTISIPASI | DONASI