Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kelong pangngajarang battu ri Asaf. O, Allata’ala, latulusu’ Kibokoika ikambe? Angngapa Kitulusu’ larro mae ri umma’ kalenTa?
2 Kiu’rangi ummatTa le’baka Kipile battu riolo, bansa Kipakabebasaka sollanna a’jari Kipatang. Kiu’rangi Bulu’ Sion, Kipareka a’jari pammantangnganTa.
3 Kijappai sai tampa’ le’bakamo a’jari runtungang; sikontu apa-apa niaka ri BallatTa le’ba’mi naancuru’ musua.
4 Ammarrang-marrangi musua ri BallatTa, nappaenteng bate-bate pammetang anjoreng.
5 Sanrapangi ke’nanga pata’bang kayu ansoeangi pangkulu’na, untu’ anta’bangi poko’-poko’ kayua ri romanga.
6 Sikontu ukiri’ kayua naancuru’ ngasengi ke’nanga ammake pangkulu’ siagang palu-palu.
7 Natunui BallatTa sa’genna cappu’; nara’massi tampa’ panynyombanga mae ri Katte.
8 Eroki ke’nanga ampatundu’ taba sikali ikambe, na natunu ngaseng sikontu tampa’ ibadaya ri anne pa’rasanganga.
9 Tenamo nicini’ na’bi-na’bi siagang tanra-tanra appakalannasa’, manna sitau tania’ angngassengi sa’genna siapa sallona tulusu’ lakamma anne.
10 Sa’genna siapa sallona, o, Allata’ala, musua lancau-cauKi’? Sa’ge tulusu’naka ke’nanga langhinai arenTa?
11 Angngapa natenamo Kitulungi ikambe? Angngapa Kipapantarang limanTai anne ikambe?
12 Battu rioloji naiKatte Karaengku, o, Allata’ala, iKattemi ampasalamaki ikambe.
13 Lalang kagassingang lompo naKipata’bage tamparanga, na Kireppe’ ulunna sikamma naga tamparanga.
14 Kilicaki sikamma ulunna Lewiatan Kipa’jari kanrenai sikamma apa-apa niaka ri parang lompoa.
15 Kipa’lo’loroki je’ne’ timbusenga siagang je’ne’ binangaya; binanga lompoa Kipa’jari kalotoroki.
16 IKatte ampa’jari alloa siagang bangngia, siagang Kipattantu tampa’na alloa siagang bulanga.
17 Kipattantui sikamma pa’baeng-paenna buttaya, Kipa’jari wattu timoroka siagang wattu baraka.
18 Kiu’rangi laloi antekamma batena musunTa anghinaKi’, o, Batara, bansa tenaya naassengKi’ napitinai arenTa.
19 TeaKi’ passareangngi ummatTa tenaya pakkullena mae ri limanna musu pallaka. TeaKi’ situlusutTa angkaluppai sarenna ummatTa ballasaka.
20 Kiu’rangi laloi parjanjiang Kipareka siagang ikambe, saba’ nagaukangi taua katerassanga ri sikontu tampa’ sassanga ri anne pa’rasanganga.
21 TeaKi’ balang parekangi nipakasiri’ tau nijallakkanga, poro mammuji mae ri Katte tupa’risika siagang tu kasi-asia.
22 Ammenteng maKi’ o, Allata’ala, Kipattojenga’ ri parkaraku! Saba’ sila’busu’ alloKi’ nihina ri tau tenaya natappa’ mae ri Katte.
23 TeaKi’ kaluppai pammarrang-marranganna musu-musunTa, pila’ lompoi karicuanna sikamma balinTa!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA