Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Battu ri Salomo. O, Allata’ala, Kipangngajarrangi hukkunTa mae ri karaenga, Kipassareangi kaadelanTa mae ri ana’ bura’nena karaenga.
2 Poro naadeli ummatTa situru’ hukkunga, na nagau’ adele’ tau nijallakkanga.
3 Poro a’jari coppongi na salewangang pa’rasanganna ikambe, na nia’ kaadelang mae ri sikontu bansaya.
4 Poro naalleangangi karaenga ha’na ra’ya’ ca’dia, natulung tu kasi-asia siagang natumpasa’ sikamma tau anjallakkangiai ke’nanga.
5 Poro tulusu’ attahanna sa’genna sikontu turunganna lalang nia’na ija alloa siagang bulanga.
6 Poro sanrapangi bosi turunga ri parang, sanrapang bosi lompo allo’lori sikamma kokoa.
7 Poro pila’ a’bakka’ kaadelanga lalang sikontu jammanna, na alla’bi-la’bi kacopponganga lalang sikontu bulang niaka.
8 Lapila’ a’bakkaki luara’na kakaraenganna battu ri tamparang se’rea mae ri tamparang maraenga, a’la’bang battu iraya sa’genna kalau’.
9 Pandudu’ parang lompoa latunduki mae ri ia na su’ju’ musua ri dallekang bangkenna.
10 Sikamma karaeng Tarsis siagang pulo-pulona langngerangi passare mae ri ia. Sikamma karaeng Arab siagang Etiopia battui angngerang passare.
11 Sikontu karaenga lasu’juki ri dallekanna, sikontu bansaya a’jari ata-atanna.
12 Saba’ nalappassangi tu nijallakkanga siagang tu tenaya pakkullena, siagang akkioki tu kasi-asia mae ri ia.
13 Nakamaseangi tu kasi-asia siagang ra’ya’ ca’dia, na napasalama’ katallassanna tu kasi-asi puppusuka.
14 Nalappassangi ke’nanga battu ri panjallakkanga siagang katerassanga, saba’ lompoi anggaranna katallassanna ke’nanga mae ri ia.
15 Mattallasaki karaenga! Poro nipassareangi mae ri ia bulaeng battua ri Arab. Poro nipappala’ doangangi lalang sikontua wattu na tuli nisare pangngellai.
16 Poro alla’bi-la’bi gandunga ri sikontu pa’rasangang, na rassi bulu’-bulu’na siagang wassele’na buttaya. Poro coppongi buttana sangkamma Bulu’-bulu’na Libanon, napila’ katambang pandudu’ kotana sanrapang ruku’ ri parang.
17 Poro tuli niu’ranginna arenna karaenga satunggu-tungguna, napila’ masahoro’ lalang nia’na mataalloa. Poro napalaki bansa-bansaya nanibarakkaki sangkamma ia, na sikontu tau antappuai arenna lamate’nei.
18 Nipujimi Batara, Allata’alana Israel! Iaji bawang akkulle anggaukangi apa-apa appakalannasaka.
19 Nipujimi areng malompoNa satunggu-tungguna; poro rassi sikontu linoa siagang kala’biranNa! Poro kajariang lalo kammaya, Aming!
20 Sikammaminjo pappala’ doanna Daud, ana’na Isai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA