Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ende-enden. Ersuraklah man Dibata alu meriah, o doni kerina!
2 Rendelah dingen pemuliaken GelarNa, pehagalah Ia alu puji-pujin.
3 Katakenlah man Dibata, nindu, "Andiko, mejin tuhu PerbahanenNdu! Musuh mungkuk i adep-AdepenNdu perban biarna, erkiteken KuasaNdu si mbelin.
4 Kerina doni nembah mungkuk man BaNdu, rende ia muji Kam, ipujina GelarNdu."
5 Marilah dingen nehenlah si ibahan Dibata, mehantu kal PerbahanenNa i tengah-tengah manusia.
6 IsalihkenNa lawit jadi taneh kerah, nini-nininta erdalan arah e ngepar. Emaka meriah ukurta, kerna kerina PerbahanenNa.
7 Ia me pemerentah si erkuasa seh rasa lalap. IperdiatekenNa bangsa-bangsa maka ula berontak man BaNa.
8 O bangsa-bangsa pujilah Dibata kami, berekenlah puji-pujinndu man BaNa.
9 Ia si njaga kita maka tetap nggeluh, dingen la IpelepasNa kita ndabuh.
10 O Dibata, Kam nguji kami, desken ngane pirak i bas api, bage me kami PengujiNdu.
11 IpediatNdu kami kena siding, IberekenNdu man kami baban si seh kal beratna.
12 IpelepasNdu kami idedehi imbang-imbang kami, ibentasi kami banjir dingen api. Tapi genduari IbabaiNdu kami ku bas ingan kemalemen ate.
13 Reh aku ku RumahNdu maba persembahen tutungen, dingen kukunduli padanku man BaNdu,
14 padan si kubelasken tupung aku i bas kiniseran.
15 Kupersembahken me man BaNdu persembahen tutungen, i bas asuh-asuhen si mburna nari. Kupersembahken man BaNdu bajar ras lembu, cimberna nangkih ku langit.
16 Marilah dingen begikenlah, o kam kerina si erkemalangen man Dibata, maka kuturiken man bandu kerna kai si IbahanNa man bangku.
17 Erlebuh aku mindo penampat man BaNa, genduari rende aku muji Ia.
18 Bicara aku ersura-sura erbahan si jahat, ugapa pe TUHAN la nggit megiken pertotonku.
19 Tapi nggo ibegiken Dibata aku, IalokenNa pemindonku.
20 Kupuji Dibata sabap la ItulakNa pertotonku, Ia tetap erkeleng ate man bangku.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA