Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Psalm ni si Daud. Bahen pardingatan. (38-2) Ham Jahowa, ulang ma pinsang Ham ahu ibagas ringis-Mu, ulang ma ajar Ham ahu ibagas gila-Mu!
2 (38-3) ai mangkapantik do hu bangku panah-Mu, anjaha idondoni tangan-Mu do ahu.
3 (38-4) Seng be dong na jorgit bani angkulangku halani ringis-Mu, seng marhasonangan be holi-holingku halani dousangku.
4 (38-5) Ai isalpui dousangku do ulungku, anjaha songon pangodoh ni siboanon na borat do ai bangku.
5 (38-6) Bau masik anjaha marnanah do ugahku, halani haotoonku.
6 (38-7) Gundung mando ahu anjaha unduk mardalan, martudung-tudung do ahu mardalan ari-ari.
7 (38-8) Ai milas do sab binongeihu, seng be dong na jorgit bani dagingku.
8 (38-9) Mandatei anjaha marosak do huahap, morong-orong do ahu halani parborit ni pusu-pusungku.
9 (38-10) Ham Jahowa, talar do i lobei-Mu sagala pangindoanku, anjaha hoih-hoihku pe seng ponop ai hun Bamu.
10 (38-11) Sai mulbag-ulbag do pusu-pusungku, anjaha moru gogohku; haliharon ni mata pe seng dong be bangku.
11 (38-12) Huan-huan pakon diha-dihangku padaoh diri humbangku, anjaha sindohorhu mandaoh-daoh jongjong.
12 (38-13) Na manguhurhon hosahku, manaon jarot bangku, anjaha halak na mangindahi hamagouanku mansahapkon hasedaon bangku, layur-layur ari do sidea manranggihon tipu.
13 (38-14) Tapi anggo ahu nengel mando, seng marpambogei, songon halak na longah do ahu, na so pabuha pamanganni.
14 (38-15) Tongon, songon halak na so marpambogei mando ahu, na so dong balos ibagas pamanganni.
15 (38-16) Ibagas ai Ham do hupanalom, ale Jahowa; Ham ma na marbalos, ale Jahowa Naibatangku.
16 (38-17) Nini uhurhu, “Gendo ulang marmalas ni uhur sidea mangidah ahu, ulang mangenjeng sidea halani na tarlandit ai naheihu.”
17 (38-18) Ai narus do ahu sihol targompang, anjaha sitarononku jonjon do i lobeihu.
18 (38-19) Tongon, husopotkon do salahku, anjaha huhoruhon do dousangku.
19 (38-20) Tapi margogoh do na mamunsuhi ahu, anjaha buei do sidea na mandomdomi ahu seng marhala.
20 (38-21) Ibalaskon sidea do na jahat balas ni na madear, anjaha ilawan ahu halani huporluhon na madear.
21 (38-22) Ulang ma tadingkon Ham ahu, Ham Jahowa, ulang ma mandaoh-daoh Ham humbangku, Ham Naibatangku!
22 (38-23) Papodas Ham ma mangurupi ahu, Ham Tuhan, haluahonku!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA