Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jaburra Daud e bakto ngatorragi kurban parengeddan. (38-2) GUSTE, abdidalem ja’ okom sanare Junandalem duka; abdidalem ja’ seksa sanare Junandalem ce’ benduna.
2 (38-3) Panaepon Junandalem nerbas badan abdidalem kantos loka, astana Junandalem nekket abdidalem, ekarassa ce’ berra’na.
3 (38-4) Badan abdidalem ce’ sake’na lantaran Junandalem duka; sabadan abdidalem sake’ sadaja lantaran abdidalem dusa.
4 (38-5) Abdidalem tasellem e dhalem banjir dusa, berra’na dusa gapaneka ta’ tapekol rassana.
5 (38-6) Ka-lokana badan abdidalem kalowar nana baceng bauna, sabab abdidalem atengka ce’ budhuna.
6 (38-7) Abdidalem nondhu’ sareng bungko’, saare benteng sossa kantos mowa katon elop.
7 (38-8) Badan panas akadi se katonon, sabadan sake’ sadaja.
8 (38-9) Abdidalem ce’ lessona, ta’ gadhuwan kakowadan pole, ro-serrowan lantaran posang rassana ate.
9 (38-10) Junandalem ngagali sadaja se ekaterro abdidalem, GUSTE, Junandalem meyarsa sadaja se ekaserro abdidalem.
10 (38-11) Dhadha abdidalem dhek-gadheggan, kakowadan elang tadha’ sakale, mata rabeng ta’ nengale.
11 (38-12) Lantaran panyaket abdidalem, ca-kanca padha nyese, la’-mala’ la-bala abdidalem padha majau sakale.
12 (38-13) Reng-oreng se terro mateyana abdidalem padha masang jira’, se terro macalaka’a abdidalem padha ngara matompessa abdidalem.
13 (38-14) Namong abdidalem akadi oreng kopok se ta’ mereng pa-ponapa, akadi oreng buwi se ta’ kengeng acaca.
14 (38-15) Lerres, abdidalem akadi oreng kopok, daddi buru ta’ metto oca’.
15 (38-16) Namong abdidalem nyo’on ka Junandalem, GUSTE, ban Junandalem, Guste ALLAH, Pangeran kaula, laju apareng jawaban.
16 (38-17) Ja’ kantos moso senneng nengale kasossa’an abdidalem, ja’ kantos reng-oreng gapaneka asebbal terros manabi abdidalem ta’ jekjek manjeng.
17 (38-18) Abdidalem para’ labuwa, nyandhang sake’ salanjangnga.
18 (38-19) Abdidalem ngakone dusa; ate ketter mekkere kasala’an.
19 (38-20) Reng-oreng se ngamoso abdidalem bannya’ sareng kowat, sadaja padha baji’ ka cara odhi’na abdidalem.
20 (38-21) Abdidalem ekamoso reng-oreng se males kabecce’an sareng kajahadan, lantaran abdidalem ngalakone se sae.
21 (38-22) Adhu GUSTE, ja’ dinggallagi abdidalem, ja’ majau dhari abdidalem, Guste Allah.
22 (38-23) Ngereng duli rabu, tolong abdidalem, GUSTE panyalamet abdidalem.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA