Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Masmur Daud: perngandungen.

² O TUHAN, ula UkumNdu aku alu RawaNdu! Ula siksa aku alu PernembehNdu si gara.

³ Leket PanahNdu ngelukai badanku, kugejapken TanNdu mberat ndehken aku.

⁴ Mesui kuakap perban PernembehNdu, mesui kerina dagingku erkiteken dosa-dosangku.

⁵ Gedap aku i bas dosangku, dosa-dosangku mberatsa kuakap mabasa.

⁶ Erkiteken kebodohenku, luka-lukangku nggo nanahen dingen mbau.

⁷ Mungkuk takalku, getem kal pusuhku, gedang-gedang wari ceda ateku.

⁸ Dagingku ngindet erkiteken penakit, la lit si mejuah-juah i bas dagingku.

⁹ Ngalah kal dagingku dingen lanai kal lit gegehku, pusuhku getem, ndehereng aku ban suina.

¹⁰ O TUHAN TehNdu kap kerina sura-surangku, kelsehenku pe terbegi man bandu.

¹¹ Pusuhku debet-debet, keri gegehku, matangku pe nggo seleng.

¹² Teman-temanku nggo lanai nggit deher ras aku, perban ugahen dagingku, kade-kadengku pe nadingken aku.

¹³ Kalak si atena munuh aku pe itogengna siding, gedang-gedang wari, si jahat saja irencanakenna, guna ncilakaken aku alu tipu si jahat.

¹⁴ Tapi aku desken kalak pasek si la erpemegi, desken kalak pekak si la banci ngerana.

¹⁵ Tuhu, aku desken kalak si la erpemegi, janah erkiteken si e la banci nogani.

¹⁶ Tapi o TUHAN Kam saja kap pengarapenku dingen Kam kap, Tuhan Dibatangku, ngaloi aku.

¹⁷ Ula pelepas imbang-imbangku ersenang-senang sabap kiniseranku, ula pelepas ia meganjang ngerana erkiteken kinitalunku.

¹⁸ Menam aku guling janah lalap mesui kuakap.

¹⁹ Kuakui kelepakenku, getem pusuhku erkiteken dosa-dosangku.

²⁰ Imbang-imbangku megegeh dingen nterem, alu la ersabap nembeh atena aku.

²¹ Ibalasna si mehuli alu si jahat, jenari imusuhina aku sabap kuayaki si bujur.

²² O TUHAN ula aku ItadingkenNdu, o Dibatangku, ula Kam ndauh i bas aku nari. <38:23> - Pedaslah Kam reh nampati aku, o TUHAN keselamatenku.