Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Humbani si Daud. Ulang ma ho marah dompak halak parjahat, anjaha ulang ma sogam uhurmu bani na mangkorjahon hagedukon;
2 ai doras do sidea melus songon poyon-poyon, anjaha hurleh songon tulmok na maratah.
3 Martenger ni uhur bani Jahowa ma ho anjaha horjahon ma na madear. Iankon ma tanoh in, anjaha ramotkon habujuron.
4 Hamalaskon ma Jahowa, jadi bereon-Ni ma hubam harosuh ni uhurmu.
5 Ondoskon ma dalanmu bani Jahowa anjaha hatengerhon Ia, ase Ia patorsahon.
6 Jadi papoltakon-Ni ma hapintoronmu songon na lihar, anjaha habonaronmu songon tongah arian.
7 Sip ma ho i lobei ni Jahowa, anjaha pahamot Ia; ulang ma sogam uhurmu mangidah halak na mardohar dalanni, mangidah halak sihorjahon panipuon.
8 Ampogi ma ringis, tadingkon gila, ulang marsogam ni uhur, ai mambobai huhajahaton do hansa in.
9 Ai maningon masab do sihorjahon hajahaton, tapi halak na martenger ni uhur bani Jahowa do sitean tanoh on.
10 Tongkin nari gelah seng dong be parjahat in, anggo ipardiatei ho iananni, seng jumpah be ia;
11 tapi na lamlam maruhur do sitean tanoh in, anjaha hamalaskonon ni uhur ni sidea do hadameion na gok.
12 Sai martahi-tahi do parjahat dompak halak parpintor, anjaha ngesnges iponni ibahen dompaksi.
13 Tartawa do Jahowa mangidahsi, ai domma ididah paroh ni ajalni.
14 Isintak halak parjahat do podang anjaha ipasang siorni, laho manjombahon halak na madoyuk pakon na masombuh, laho manayat halak na bujur maruhur.
15 Hape podangni manobak pusu-pusuni sandiri, anjaha siorni mangkaponggol.
16 Rahanan do na otik, na dong bani halak parpintor, ase na marsulei-sulei bani halak parjahat,
17 ai ripukkononkon do botohon ni halak parjahat, tapi itungkol Jahowa do halak parpintor.
18 Ibotoh Jahowa do ari ni halak na daulat, anjaha totap do sadokah ni dokahni siteanon ni sidea.
19 Seng anjai tarbador sidea sanggah roh hasosakan, anjaha bosuran do sidea bani musim lohei.
20 Tongon do, maningon magou do halak parjahat, anjaha songon hajagaron ni ladang do munsuh ni Jahowa, masab do sidea songon timus.
21 Manraih do parjahat, tapi seng ipaulak; tapi paridop ni uhur anjaha pardear layak do halak parpintor.
22 Tongon do, halak na pinasu-pasu-Ni do manean tanoh in, tapi halak na binuraan-Ni maningon magou do.
23 Jahowa do sibobai langkah ni dalahi, anjaha itumpak do dalan ni na hinarosuhkon-Ni.
24 Targompang pe ia, seng lanjar gayap, ai Jahowa do na manungkol tanganni.
25 Danak do ahu sapari, domma matua sonari, tapi seng ongga huidah tartading halak parpintor, anjaha mangindo-indo sipanganon ginomparni.
26 Sai maridop ni uhur do ia bani ganup panorang anjaha paraihkon; parhiteian ni pasu-pasu do ginompar-Ni.
27 Surut ma ho humbani na jahat, horjahon na madear, ase totap ho ronsi sadokah ni dokahni.
28 Ai holong do atei ni Jahowa bani uhum, anjaha seng itadingkon halak niidopan-Ni. Ramotkonon-Ni do sidea sadokah ni dokahni, tapi ginompar ni halak parjahat maningon bois do.
29 Teanon ni halak parpintor do tanoh in, anjaha tongtong do sidea marianan ijin.
30 Mamodahkon hauhuron do pamangan ni halak parpintor, anjaha dilahni mangkatahon na sintong.
31 Iparimbagaskon do titah ni Naibatani ibagas uhurni, anjaha seng anjai tarlandit langkahni.
32 Sai igompangi halak parjahat do halak parpintor, sihol do bunuhonni ia.
33 Tapi seng anjai bereon ni Jahowa ia hubagas tanganni, anjaha seng paturutonni ia hona uhum sanggah i paruhuman ia.
34 Ajamkon ma Jahowa anjaha ramotkon dalan-Ni, jadi patimbulon-Ni ma ho manean tanoh in, anjaha idahonmu ma parbois ni halak parjahat.
35 Ongga do huidah sada halak parjahat na tarlobih, na podas marbanggal songon hayu ares;
36 dob mamontas ahu use, hape seng dong be, hupindahi, hape seng dapot be.
37 Sai pardiatei ma habujuron anjaha horjahon na pintor, sai hadameion do dobni bani halak sisonai.
38 Tapi boiskonon-Ni do haganup halak sipangosei, anjaha siapkonon-Ni do ginompar ni halak parjahat.
39 Tapi humbani Jahowa do haluahon ni halak parpintor, Ia do parlingodan ni sidea sanggah hasosakan.
40 Jahowa do sipangurupi pakon na paluahkon sidea, Ia do na paluahkon sidea humbani tangan ni halak parjahat, ipabansah do sidea halani marlingod sidea Bani.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA