Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Haleluya! Puji ma Jahowa, ai pardear layak do Ia, anjaha ronsi sadokah ni dokahni do idop ni uhur-Ni.
2 Ise do na boi mambaritahon sagala pambahenan ni Jahowa, anjaha pabogeihon puji-pujian-Ni?
3 Martuah ma halak na manramotkon uhum, na mandalankon hapintoron tongtong.
4 Ingat Ham ma ahu, ale Jahowa, domu hubani pangkaholongi-Mu bani bangsa-Mu, tohu Ham ma ahu rap pakon haluahon na hun Bamu;
5 ase hupaidah-idah hadearon ni na pinilih-Mu, ase marolob-olob ibagas olob-olob ni bangsa-Mu, anjaha mamuji-muji rap pakon pusaka-Mu.
6 Domma mardousa hanami songon ompungnami, domma marsalah anjaha domma manjahati hanami.
7 Ompungnami i Masir seng iartihon halongangan na binahen-Mu, seng idingat sidea buei ni hinalayak-Mu, tapi manlawan do sidea dompak Sitimbulan in i lambung ni laut arung-arung.
8 Tapi ipaluah do sidea halani goran-Ni, laho pabotohkon hagogohon-Ni.
9 Iporjat do laut arung-arung, gabe horah ma, ipadalan ma sidea humbani luhung ni bah songon na bani halimisan.
10 Ipaluah do sidea humbani tangan ni halak pardomdom, anjaha itobus sidea humbani tangan ni munsuh.
11 Irungkub bah do imbang ni sidea, sahalak pe lang na tading.
12 Jadi porsaya ma sidea bani hata-Ni, anjaha idodingkon puji-pujian Bani.
13 Tapi podas-podas do sidea lupa bani pambehanan-Ni, seng ra sidea marguru bani rosuh-Ni.
14 Isuhun-suhuni sidea do hisap-hisapni i halimisan, anjaha ilajou do Naibata i tanoh dorging.
15 Ibere do bani sidea na hinarosuhkon ni sidea, tapi ibahen do sobalan tonduy ni sidea.
16 Simburu do sidea bani si Musa i parlampolampoan ai, sonai homa bani si Aron na pinapansing bani Jahowa,
17 Jadi ipangangang tanoh ma babahni mamondut si Datan, anjaha irungkub humpulan ni si Abiram.
18 Apuy pe gara ma bani hulanan ni sidea, anjaha jirlam ni ai mangankon parjahat ai.
19 Ipauli sidea do sada anak ni lombu i Horeb anjaha isombah sidea ma gana-gana na tinuang ai.
20 Igantihkon sidea do hasangapon ni Naibata, bani gana-gana ni lombu sipangan poyon-poyon.
21 Lupa do sidea bani Naibata na paluahkon sidea, na mambahen habanggalon i tanoh Masir,
22 halongangan na i tanoh ni si Ham ai ampa pambahenan na majangin i lambung ni laut arung-arung.
23 Jadi ihatahon Jahowa ma boiskonon sidea, ambit ulang si Musa, pinilih-Ni ai, jongjong mangapiti sidea, pahombun ringis-Ni, ase ulang iboiskon sidea.
24 Itulak uhur ni sidea do tanoh harosuh ai, seng porsaya sidea bani hata-Ni.
25 Marmungut-mungut do sidea ibagas lampolampo ni sidea, seng itangihon sidea sora ni Jahowa.
26 Jadi ipatoltol ma tangan-Ni dompak sidea, laho manraseihon sidea i halimisan.
27 laho mangamburhon ginompar ni sidea, i tongah-tongah ni sipajuh begu-begu, anjaha mangerap sidea bani nagori-nagori.
28 Ipadohor sidea do dirini bani Baal-Pear, anjaha ipangan sidea do galangan bani na matei.
29 Ipuhoi sidea do ringis ni Jahowa marhitei pambahenanni, jadi sogop ma sampar i tongah-tongah ni sidea.
30 Jadi jongjong ma si Pinehas, idalankon ma uhum, gabe sonto ma sampar ai,
31 anjaha ihira ma ai gabe hapintoronni, marsundut-sundut ronsi sadokah ni dokahni.
32 Dob ai ipuhoi sidea do ringis-Ni bani Bah Meriba, gabe mangonai hasedaon bani si Musa halani sidea;
33 ai sai igitiki sidea do uhurni, gabe tarlopus bibirni marsahap.
34 Seng iboiskon sidea sagala bangsa, songon na dob hinatahon ni Jahowa hubani sidea.
35 tapi ipasaor-saor sidea do dirini bani sipajuh begu-begu, anjaha iguruhon do pambahenan ni sidea.
36 Ibalosi sidea do sisombahon ni sidea, ai ma gabe siding bani sidea.
37 Igalangkon sidea do anak ni sidea pakon boru ni sidea, bani setan-setan.
38 Iduruskon sidea do daroh na so marpipot, ai ma daroh ni anak pakon boru ni sidea, ginalangkon ni sidea bani sisombahon ni halak Kanaan, gabe mabutak tanoh in ibahen sapata ni daroh.
39 Ipabutak sidea do dirini marhitei parlahouni, gabe marbangkis sidea marhitei horjani.
40 Jadi gara ma ringis ni Jahowa dompak bangsa-Ni, gabe magigi Ia bani pusaka-Ni.
41 Iondoskon ma sidea hu tangan ni sipajuh begu-begu, gabe halak na mandomdomi sidea ma manggomgomi sidea.
42 Iodoh-odoh munsuh ni sidea ma sidea, gabe tunduk ma sidea hu toruh ni tanganni.
43 Gati tumang do ipaluah sidea, tapi sai ilawan sidea do rosuh-Ni, gabe mogap halani hajahatonni.
44 Tapi itatap Jahowa do hasosakan ni sidea, sanggah na itangar doruh-doruh ni sidea.
45 Idingat ma padan-Ni na bani sidea, anjaha isolsoli uhur-Ni domu hubani banggal ni idop ni uhur-Ni.
46 Jadi dapotan idop ni uhur ma sidea ibahen, humbani halak na manaban sidea.
47 Paluah Ham ma hanami, ale Jahowa, Naibatanami, pahumpul Ham ma hanami humbani sipajuh begu-begu, ase martarima kasih hanami bani goran-Mu na pansing in, anjaha marmegah-megah hanami mamuji Ham.
48 Na puji ma Jahowa, Naibata ni Israel, humbani sadokah ni dokahni ronsi sadokah ni dokahni, anjaha haganup ma bangsa mangkatahon, “Amen! Haleluya!”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA