Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pujilah TUHAN! Kataken bujur man BaNa, sabap mehuli kap Ia. Keleng atena tetap rasa lalap.
2 Ise ngasup nuriken PerbahanenNa si mbelin, dingen mereken pujin si patut man BaNa?
3 Malem kal ate kalak si ngikutken perentah-PerentahNa, kalak si katawari pe ngelakoken si benar.
4 O TUHAN, inget aku tupung Kam mulahi BangsaNdu, aku pe ikut min IsampatiNdu.
5 Bere maka kuidah kesangapen BangsaNdu, dingen ermeriah ate ras BangsaNdu. Bere maka megah ateku, radu ras kalak PilihenNdu.
6 Bali ras nini-nini kami, kami pe nggo erdosa, nggo kami erbahan salah dingen jahat.
7 Nini-nini kami i taneh Mesir la ngerti PerbahanenNdu si mejin la ia nggit ngantusisa. Lupa ia nandangi keleng AteNdu si rusur IcidahkenNdu, si Meganjangna ilawanna i deher Lawit Merah.
8 Tapi IkeliniNdu ia erkiteken GelarNdu maka tangkas teridah KinimbisanNdu.
9 Kam si merentahkenca maka kerah Lawit Merah, BangsaNdu erdalan arah e, i babo taneh si kerah.
10 Emaka pulah ia i bas tan kalak si erelem-elem man bana, i bas kuasa imbang-imbangna nari, IbebaskenNdu ia.
11 Imbang igedapken ku lau; sekalak pe la lit si pulah.
12 Jenari maka tek BangsaNdu man PadanNdu dingen ngendeken ende-enden pujin man BaNdu.
13 Tapi pedas kal ia lupa perbahanen si nggo IbahanNdu, ilakokenna kai atena ibahanna, alu la mindo AjarNdu.
14 I gurun pasir ikuasai kerincuhen ia, emaka icubaina Kam, o Dibata.
15 Emaka IberekenNdu PemindonNa; tapi IberekenNdu ka nge penakit si mejin man BaNa.
16 I bas perkemahen e mecimberu ia man Musa ras man suruh-SuruhenNdu si badia eme Harun.
17 Emaka ibendut doni enda si Datan, Abiram ras keluargana pe ikut tertanem.
18 Nusur api, isilamna si ngkapiti kalak enda, raci kerina kalak si nggo erbahan jahat.
19 Ibanna anak lembu i Sinai, jenari isembahna gana-gana e.
20 Itulakna Kam Dibata si mulia, lako nembah gana-gana rubia-rubia si nggagat dukut.
21 Lupa ia nandangi Dibata si nggo mulahi ia, alu ngelakoken perbahanen si mbelin i Mesir.
22 Tuhu mejin kal perbahanen TUHAN i je, tuhu mbelin kal perkara-perkara si IbahanNa i Lawit Merah.
23 Eme sabapna maka IkernepkenNdu AteNdu BangsaNdu, tapi Musa kalak PilihenNdu e, ngolang-ngolangi Kam. Ngadap Musa man BaNdu, mantak RawaNdu, emaka la ia kernep kerina.
24 Kenca bage itulakna taneh si mehuli e, erkiteken la ia tek padan si IpadankenNdu, o Dibata.
25 Ngadi ia i bas kemahna iherna jungut-jungut, la diatena megiken SoraNdu.
26 Emaka erpadan Kam alu ersumpah, maka mate me kalak enda i gurun pasir.
27 Mbencah me kesusurenna ku kalak si nembah berhala, jenari mate ia i negeri bangsa-bangsa.
28 I Peor isembahna Baal, dingen ipanna persembahen man kalak mate.
29 Erkiteken perbahanenna e, ipekekena me RawaNdu, o TUHAN, IpesusurNdu man bana penakit si mejin.
30 Tapi perban keke si Pinehas ngukum kalak si salah, ngadi me cilaka e.
31 Perbahanenna e iergaken kalak, ersundut-sundut seh rasa lalap.
32 I sumbul Meriba, ipekeke kalak enda ka RawaNdu, erkiteken perbahanen kalak enda, Musa lit i bas kesusahen.
33 Pagit kal iakap Musa iban kalak enda, seh maka luar ranan si la iukurina leben.
34 Bangsa si nembah man berhala la ibunuh kalak enda, ilawanna perentah si ibereken TUHAN man bana.
35 Lebih asang si e, si empon ia ras kalak ah ndai, dingen iusihna perbahanen kalak si la erdibata e.
36 Jenari nembah BangsaNdu man berhala, janah e jadi siding man bana.
37 Anak-anakna si dilaki ras si diberu ipersembahkenna, man setan-setan kalak Kanaan.
38 Ibunuhina anak-anakna si la ersalah, erkiteken pembunuhen e keliamen me taneh.
39 Perbahanenna e ngeliami ia, la ia setia man Dibata.
40 BangsaNdu pekeke RawaNdu, ciga AteNdu ngenehen ia.
41 Emaka IendeskenNdu ia ku bas kuasa bangsa-bangsa si deban, IpediatNdu ia ikuasai musuhna.
42 Jenari itindas musuh e ia, dingen ikuasaina.
43 Piga-piga kali IpulahiNdu BangsaNdu, tapi madin kang akapna berontak, emaka reh bagesna ia ndabuh ku bas dosa.
44 Tapi tupung erlebuh ia bandu, TUHAN, IbegikenNdu, dingen IperdiatekenNdu kesusahenna.
45 Guna kiniulin man bana IngetNdu PerpadanenNdu, dingen IubahNdu KeputusenNdu sabap mbelin kap keleng AteNdu.
46 IkusurkenNdu ukur imbang-imbangna, gelah turah atena mekuah man kalak enda.
47 Pulahi min kami, o TUHAN Dibata kami, dingen baba kami mulihken i bas bangsa-bangsa enda nari, maka banci kami ngataken bujur, dingen muji GelarNdu si badia.
48 Pujilah TUHAN, Dibata Israel, genduari tetap seh rasa lalap, kerinalah kalak ngataken, "Amin!" Pujilah TUHAN.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA