Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Gelar mehuli ergan kap, asangken erta-erta, kekelengen kalak ergan asangken pirak ras emas.

² Kalak bayak ras kalak mesera lit perserina, TUHAN kap si nepasa kerina.

³ Kalak pantas idahna kiniseran, nilah ia, tapi kalak si la rukur iteruskenna emaka mesui atena.

⁴ Kalak si patuh man TUHAN, meteruk rukur, emaka datca kebayaken, kemulian dingen kegeluhen.

⁵ Siding ras ragum, lit i bas dalan kalak jahat, sirangilah e kerina adi atendu selamat.

⁶ Ajarkenlah man anak uga kearusen nggeluh, maka ikutkenna asa umurna nggeluh.

⁷ Kalak musil jadi suruh-suruhen kalak bayak, si ngeraih jadi budak kalak si peraihken.

⁸ Kalak si ngajarken si la bujur buahna kiniseran, dungna kuasana pe bene.

⁹ Kalak bujur ipasu-pasu TUHAN, perban ibagikenna rejekina man kalak si kekurangen.

¹⁰ Pelawes kalak si penghina, gelah ngadi perjengilen, perubaten, ras si panjang-punjuten.

¹¹ Kalak si ngena atena kebujuren dingen mehuli pengeranana, ia me kap teman raja.

¹² Pemeteh si benar idah TUHAN kap, ilesapkenna ranan kalak si la bujur.

¹³ Kalak malas ngada-ngada saja i rumah, nina: adi ndarat ia banci ia irigep singa i tengah dalan.

¹⁴ Cakap penaki-naki diberu perlua-lua desken siding kap, nggulingken kalak si kena pernembeh TUHAN.

¹⁵ Biasa kap adi anak ngelakoken perbahanen si la payo, tapi perligas banci ngobah langkahna si la payo.

¹⁶ Kalak si ndedeh kalak si musil-musil, tujunna eme gelah bayak, jenari iberekenna hadiah man kalak bayak, tapi kedungenna ia nge si musilna.

¹⁷ Dengkehkenlah, maka kuajarken man bandu perkatan kalak pentar. Perdiatekenlah,

¹⁸ gelah meriah ukurndu kune banci ingetndu dingen banci melaskenca saja pe.

¹⁹ Sura-surangku gelah kam tek man TUHAN, eme sabapna maka genduari ateku pebetehken ajaren-ajaren enda man bandu.

²⁰ Telu puluh pertenget nggo kusuratken man bandu, pertenget si isina kepentaren dingen ajar si mehuli,

²¹ janah ngajarken man bandu kai si benar. Dage, adi kam isuruh pelajarisa, ietehndu me uga njabap alu payo.

²² Ula rugiken kalak musil, erkiteken kam ngasup engkuasai ia; dingen i bas sidang pengadilen ula rugiken kalak si la meherga.

²³ TUHAN kap si mbela perkarana, janah ngancam kesah kalak si ngancam ia.

²⁴ Ula pertemani kalak si pedas naik darehna.

²⁵ Iusihndu denggo ia, jenari lanai kam ngasup meneken kebiasan si bage rupana.

²⁶ Ula erpadan nggalari utang kalak si deban.

²⁷ Kune la kam ngasup nggalarisa, ingan medemndu pe ilelangna.

²⁸ Ula kal cuba-cubakendu miser baleng si nggo itetapken nini-ninindu.

²⁹ Pernah kin idahndu kalak pantas ndahiken dahinna? I bas istana raja-raja kap ia isuruh erdahin, labo i bas rumah kalak biasa.