Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dearan do sansayat ruti na mapir marhasoman uhur na sonang, humbani rumah na gok gulei marhasoman paringoran.

² Jabolon na pentar do sirajai anak paruhur na bajan, anjaha dapotan tean-teanan do ia rap pakon saninani.

³ Balanga panlalaan manguji pirak, liang panloburan manguji omas, tapi Jahowa do siuji uhur.

⁴ Halak parjahat patangi-tangi sahap na masambor, halak siparladung manareihon pinggolni bani hata na parsedahon.

⁵ Sipahiri-hiri halak na masombuh, pahirihon na manompasi do, anjaha na marmegah-megah pasal hamagouan ni hasomanni, lang tarbahen lang hona uhum do.

⁶ Sortali ni halak na matua ai ma pahompuni, anjaha hamuliaon ni anak ai ma bapa ni sidea.

⁷ Seng domu bani halak na oto sahap na mantin, samintolah hata ladung ma patut bani na sangap?

⁸ Mata intan do sisip, ninuhur ni sibere ai, iagan maruntung ma ia bani sagala langkah-langkahni.

⁹ Halak sirungkub hasalahan, ai ma siadongkon uhur na marsihaholongan, tapi halak na pararatkon sahap-sahap manirang na marhuan do.

¹⁰ Margogohan do sada hata pinsang-pinsang bani halak na maruhur, ase saratus lonsing-lonsing bani halak na bodoh.

¹¹ Halak parjahat pitah mangindahi parlawanan do, tapi suruhan na mabajan do isuruh mangimbangsi.

¹² Rahanan do pajumpah pakon gipul na magouan anak, humbani na pajumpah ampa halak na oto ibagas habodohonni.

¹³ Halak na mambalaskon na jahat bani na madear, seng morot be na masambor hun rumahni.

¹⁴ Sitolkas bah binongbong do halak sibahen paringoran, halani ai, paima pultak paringoran, intopi ma ai.

¹⁵ Halak na mamintori parjahat ampa halak sisalahkon na bujur, haduasi do ai hagigi bani Jahowa.

¹⁶ Aha ma gunani duit bani tangan ni halak na bodoh, laho mamboli hapentaran, hape seng dong uhur bani?

¹⁷ Bani sagala panorang do marholong atei huan-kuan, gabe sanina ibagas hasosakan do ia, ase tubuh.

¹⁸ Jolma na hurang uhur, urah do marjabat tangan, laho mambere jaminan bani hasomanni.

¹⁹ Halak na marosuh bani paringoran, siharosuhkon dousa do ai, anjaha na mambahen gijang hu atas labah ni rumahni, ai ma sipindahi hamagouan.

²⁰ Halak paruhur na geduk, seng jumpahan na madear, anjaha halak pardilah na lekluk, madabuh hubagas hamagouan.

²¹ Halak siparanak na bodoh, pusok ni uhur do ai bani, seng marmalas ni uhur bapa ni halak na oto.

²² Uhur na megah paminar bohi, tapi tonduy na marosak pamerung angkula.

²³ Sisip na hunja pe ijalo parjahat do, laho papeol pardalan ni uhum.

²⁴ Bani panonggor ni halak na maruhur dong do hapentaran, tapi anggo mata ni na oto maor do ronsi ujung ni tanoh on.

²⁵ Borit ni uhur do bani bapa anak na oto, anjaha pusok ni uhur bani na manubuhkonsi.

²⁶ Mandonda halak parpintor seng dear, manlonsing halak na sangap salah tumang do ai.

²⁷ Halak siantan parsahap, ai ma na marpambotoh, anjaha halak partonduy na lamlam siparuhur do ai.

²⁸ Halak na bodoh pe, anggo masip gabe songon siparuhur do, anggo sai itutup pamanganni, tarhira do ia halak na pentar.