Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lebbi becce’ nase’ saompa’an e dhalem kataremtemman, etembang kakanan nyaman ta’ sakera-kera tape atokaran.

² Kabula se penter bakal ngobasa’ana ana’ se matodhusan, ban bakal narema’a sangkolan abareng ban tan-taretanna kana’ jareya.

³ Emmas ban salaka eoji e apoy se panas, tape atena manossa eoji bi’ PANGERAN.

⁴ Oreng jahat atoro’ ka babala’an se juba’, oreng se lecegan lebur ngedhingngagi petenna.

⁵ Sapa se ya-nyeya oreng mesken se nespa, padha ban se ya-nyeya Allah Panceptana. Sapa se perak polana oreng laen palang, tanto narema okoman.

⁶ Se magumbira oreng se la towa reya na’ potona, se magumbira ana’ iya areya oreng towana.

⁷ Oreng se molja ta’ patot acaca lecek; oreng budhu ta’ pantes makalowar ca’-oca’ se aji.

⁸ Badha se nyangka pesse go’-sogo’ bisa madhateng kaajiban; kalaban pesse go’-sogo’ apa’a bai bisa kalakon.

⁹ Mon terro ekaleburana oreng, ba’na kodu nyapora kasala’anna. Nga’-ngenga’e kasala’an marosagan se akanca’an.

¹⁰ Settong parengeddan lebbi raja artena monggu ka oreng penter etembang saratos peccodan ka oreng se budhu.

¹¹ Oreng jahat mabaridhuwan malolo, tape maot dhateng ka oreng jareya akantha otosan se kejjem.

¹² Lebbi becce’ tatemmo ban korbina baruwang se kaelangan budhu’na, etembang ban oreng budhu se repot ban kabudhuwanna.

¹³ Sapa se males kabecce’an ban kajahadan, kajahadan ta’ kera kalowar dhari bengkona.

¹⁴ Amolae tokar padha ban abeddhul tanggulla aeng; daddi duli nyorot sabellunna tokar molae.

¹⁵ PANGERAN baji’ ka oreng se abendherragi oreng daraka, ban se nyala’agi oreng se ta’ sala.

¹⁶ Parcoma oreng budhu matadha’ pesse kaangguy nyare hekmat, sabab aba’na ta’ andhi’ pekkeran sehat.

¹⁷ Kanca kodu esto ka kancana, tape taretan noro’ nanggung kasossa’an.

¹⁸ Oreng se ajanji nanggunga otangnga sasamana jareya oreng budhu nyamana.

¹⁹ Oreng se lebur ka dusa, dujan atokar, oreng se raja caca, nyare kaancoran.

²⁰ Tokang tepo ta’ kera senneng odhi’na, oreng se acangka jilana tanto calaka’.

²¹ Andhi’ ana’ se gendheng artena nemmo kasossa’an, daddi eppa’na oreng budhu ta’ masenneng ate.

²² Ate se gumbira masehat badan; ate se sossa mapotongan samangat.

²³ Hakim se ta’ jujur tek-ngetek narema go’-sogo’, ban ta’ ajalannagi kaadilan.

²⁴ Tojjuwanna oreng se penter nyareya hekmat, tape tojjuwanna oreng budhu ta’ etemmo karowanna.

²⁵ Ana’ se budhu masossa eppa’na, ban masossa atena ebuna.

²⁶ Ta’ patot adhindha oreng se ta’ sala; ta’ pantes nendhes oreng se bagus buddina.

²⁷ Oreng se tajem pekkerra ta’ bannya’ cacana. Oreng se bicaksana terros ayem gulina.

²⁸ Oreng budhu sakale tanto esangka penter ban bicaksana mon oreng jareya neng-enneng ta’ bannya’ caca.