Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Madin man la erbengkau tapi dame, asangken man rula-ula i bas rumah si dem perjengilen.

² Suruh-suruhen si cerdik engkuasai anak si gutul, dingen ngaloken tading-tadingen tuanna ras senina-senina anak ndai.

³ Emas ras pirak iane i bas api, tapi pusuh manusia Dibata si ngujisa.

⁴ Kalak jahat megiken perukuren si jahat, kalak perbual ndengkehken kata guak.

⁵ Si nokoh-nokohi kalak musil dingen mesera, igombangina kap Dibata. Si meriah iakapna ngidah kalak kena cilaka, iukum kap ia.

⁶ Orang tua gedang atena ngenen kempuna, kemegahen anak-anak eme kap orang tuana.

⁷ Kalak si mehamat la nggit melasken kata la tuhu, kalak lenge ibelaskenna ranan si la erguna.

⁸ Lit kalak si erpengakap maka uang sogok desken kuasa-kuasa, iakapna alu uang sogok kai pe banci jadi.

⁹ Adi atendu isenangi kalak, alemi kalak si ersalah man bandu, adi salah kalak ipeinget-inget, e encedaken perkade-kaden kap.

¹⁰ Sekali iajarken, kalak pentar mbue dat pelajaren seratus kali icambuk, kalak lenge la nggit megiken kata.

¹¹ Man kalak si rusur peturah kiniseran, kematen reh ndahi ia desken sada persuruhen si merawa.

¹² Madin jumpa ras beruang si kebenen anak, asangken jumpa ras kalak bodoh si sangana ngelakoken kebodohenna.

¹³ Kalak si mbalas kiniulin alu kejahaten, i bas rumahna nari pe la terpelawes kejahaten.

¹⁴ Menaken perjengilen seri ras murtasken paya, emaka tambaklah ope denga ndauh maler launa.

¹⁵ Nembeh ate TUHAN man kalak si mulahi kalak jahat, bage pe ngukum kalak si la ersalah.

¹⁶ Percuma kalak bodoh ngkeriken duitna lako ndarami kepentaren, sabap la lit pengertin i bas ia.

¹⁷ Teman tetap encidahken atena keleng, kai gunana sekalak senina adi labo ikut i bas nggejapken kiniseran?

¹⁸ Kalak si la rukur ngenca, si njamin utang kalak si deban.

¹⁹ Kalak si erngena ate man dosa, ngena atena erbahan perubaten. Kalak si encidah-cidahken kebayakenna eme si ndarami kiniseran.

²⁰ Kalak si rukur dingen pengeranana jahat, asa ndigan pe la jumpa si mehuli, tapi cilaka.

²¹ Anak si rusur erbahan kebodohen, melala iberekenna man bapana kendelen.

²² Keriahen desken tambar si mereken kejuah-juahen, adi ukur serbut erbahanca daging kertang tading tulan.

²³ Hakim si korupsi erbuni-buni ia ngaloken sogok, eme sabapna la banci jumpa keadilen.

²⁴ Perayaken kalak pentar eme pemeteh, tapi kalak bodoh la ertentun tujunna.

²⁵ Anak si bodoh nuhsahi bapana, dingen ceda ibahanna pusuh nandena.

²⁶ La patut adi kalak si la ersalah idenda; adi kalak si mehuli iukum, keadilen jadi ceda.

²⁷ Kalak si beluh rukur iangkarna nge ngerana, kalak si saber ukurna ia kap kalak si pentarna.

²⁸ Kalak bodoh pe iakap cerdik dingen pentar, adi ia sinik dingen la ngerana.