Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Areya babala’anna Sulaiman: Ana’ se bicaksana magumbira atena eppa’na; ana’ se budhu masossa atena ebuna.
2 Kasogiyan se ekaolle kalaban cara se roce ta’ madhateng kaontongan; sabaligga, kajujuran bakal madhatengnga kasalameddan.
3 Oreng becce’ bi’ PANGERAN ta’ kera epakalaparan; tape pangaterrona oreng jahat elang-alange sopaja ta’ ekaolleya.
4 Oreng males tanto daddi oreng ta’ andhi’ oreng se bajeng tanto daddi oreng sogi.
5 Oreng se bicaksana makompol hasella anye mon teppa’ mosem, tape oreng se tedhung malolo e mosem anye, madhateng malo ka aba’na.
6 Oreng becce’ bakal narema’a berkat. Tape cacana oreng jahat agandhu’ kakejjemman.
7 Ngen-angen ka oreng becce’ madhateng berkat, tape oreng jahat lekkas ekaloppae oreng.
8 Oreng penter lebur narema babala’an; oreng se budhu cacana bakal sala’a jalan.
9 Oreng jujur aman odhi’na, tape tokang tepo bakal etemmowa.
10 Sapa se ngerrep se bendher, parkara bakal madhatengnga kasossa’an, tape oreng se nyale rang-terrangan padha ban se aehteyar madhatengnga kasejahtera’an.
11 Pacacana oreng se becce’ masenneng odhi’na oreng, tape cacana oreng jahat notobi ate se kejjem.
12 Kabaji’an madhateng tokar; kataresna’an nyapora sakabbinna kasala’an.
13 Oreng se tajem pekkeranna notorragi ca’-oca’ se bicaksana; oreng se budhu parlo narema okoman.
14 Oreng se bicaksana makompol pangataowan; mon oreng budhu acaca manceng kacalaka’an.
15 Kasogiyan ngaobi oreng sogi, kamalaradan maancor oreng se ta’ andhi’.
16 Mon alako becce’ opana odhi’ senneng taremtem, mon alako dusa, se ekaolle dusa se abannya’an.
17 Sapa se endha’ epaenga’ bakal taremtemma odhi’na, sapa se ta’ endha’ ngakone kasala’anna badha e dhalem babaja.
18 Oreng se notobi kabaji’anna atena jareya tokang tepo. Oreng se abirbir petenna jareya oreng budhu.
19 Sajan bannya’ acaca, sajan semma’ ka dusa; oreng se bisa neggu’i jilana jareya oreng bicaksana.
20 Cacana oreng becce’ akantha salaka se asli; pekkeranna oreng se jahat tadha’ artena.
21 Cacana oreng becce’ daddi berkat ka oreng bannya’, kabudhuwanna oreng se budhu mate’e aba’na dibi’.
22 Oreng bisa sogi coma lantaran berkadda PANGERAN; alako berra’ ta’ bisa nambai kasogiyan.
23 Oreng budhu lebur agabay sala; oreng bicaksana lebur nyare hekmat.
24 Oreng se berse atena narema sabarang se daddi pangaterrona; oreng jahat narema se paleng ekatako’e atena.
25 Mon dhateng kaleng busbus, oreng jahat mosna, tape oreng jujur teptep teggu salanjangnga.
26 Ja’ nyoro oreng males, oreng males mapeggel ate; akantha cokka se manyelo gigi otaba okos se mapeddi mata.
27 Hormadi ALLAH, tanto ba’na abit odhi’na; oreng jahat mate sabellunna baktona.
28 Pangarebbanna oreng becce’ masenneng atena; pangarebbanna oreng jahat kosong tadha’ pa-apana.
29 PANGERAN ngaobi oreng se jujur, tape matompes oreng se alako jahat.
30 Oreng se berse atena odhi’na taremtem ban aman, oreng se jahat ta’ kera ngennengnge tana sangkolan.
31 Oreng se berse atena notorragi ca’-oca’ se bicaksana; oreng jahat bakal edunggemma colo’na.
32 Ca’-oca’na oreng se berse atena masenneng ate, cacana oreng jahat nyake’e ate.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA