Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Enda kap pertenget Salomo: Anak si pentar eme kap keriahen bapana, anak si lenge e kap erbahanca ceda ate nandena.

² Kebayaken ulih kejahaten la kap lit untungna, tapi kebujuren mulahi kalak i bas kematen nari.

³ Kalak bujur kutera pe la ipelepas TUHAN kelihen, tapi sura-sura kalak jahat la IpebentasNa.

⁴ Kalak malas jadi musil kap, tapi kalak mejingkat, kebayaken jadi ulihna.

⁵ Kalak pentar rani kap i bas paksana, tapi man kemelanken adi lit si tunduh tupung paksa peranin.

⁶ Kalak bujur ndatken pasu-pasu, tapi i bas kata-kata kalak jahat terbuni biak pemunuh.

⁷ Kalak bujur jadi kesangapen si lalap inget kalak, tapi kalak jahat meter ilupaken.

⁸ Kalak si rukur nggit megiken ajar si mehuli, tapi kalak si melasken kata-kata si la erluhu bene.

⁹ Kalak bujur nggeluh la biar-biaren, tapi penipu la banci lang ketunduken.

¹⁰ Kalak si la pang encidahken kebenaren, ipeturahna kap perubaten; tapi si mandang alu terang-terangen dame kap atena.

¹¹ Babah kalak bujur desken sumbul kegeluhen, tapi i bas kata-kata kalak jahat terbuni biak pemunuh.

¹² Nembeh ate mabai perjengilen, tapi keleng ate la naktaki kesalahen.

¹³ Kalak si erpemeteh melasken kata-kata si payo, tapi kalak lenge perlu iukum.

¹⁴ Kalak pentar, ipepulungna pemeteh asa bancina, tapi adi kalak lenge ngerana, ipekekena perjengilen.

¹⁵ Kebayaken engkawali kalak bayak, kemusilen engkernepken kalak musil.

¹⁶ Ngelakoken si mehuli kegeluhen kap upahna, tapi dosa mabai kalak gelah tole mahan dosa.

¹⁷ Ise si ngergaken kata ajar, kegeluhen kap sikerajangenna, tapi kalak si la nggit ngakuken salahna, bene me ia.

¹⁸ Kalak si relem-elem perguak kap, janah si percekurak, ia kap kalak lenge.

¹⁹ Reh lalana ngerana, reh belinna dalan erdosa, adi pentar kin kam tentu kam la pet ngerana.

²⁰ Kata-kata kalak bujur desken pirak murni kap; perukuren kalak jahat, la lit sitik pe gunana.

²¹ Kata-kata kalak bujur, erguna man jelma si nterem, tapi kebodohen kalak bodoh erbahanca cilaka dirina jine.

²² Erkiteken pasu-pasu Dibata nge maka kalak jadi bayak, erdahin erbintuas labo nambahi kebayaken.

²³ Kalak bodoh meriah iakapna erbahan salah, tapi kalak pentar meriah iakapna ngelakoken si mehuli.

²⁴ Kalak bujur seh kap sura-surana, tapi kalak jahat kai si ibiarina kal, eme jadi man bana.

²⁵ Adi reh galumbang mbelin, mombak me kalak jahat, tapi kalak bujur paguh rasa lalap.

²⁶ Ula pada suruh kalak malas, sabap erbahanca latih ukur saja nge; bali ras cuka si erbahanca ipen ngilu, bagi cimber si erbahanca meser mata.

²⁷ Patuhlah man TUHAN, gelah kam cawir metua, kalak jahat mate ope denga seh paksana.

²⁸ Pengarapen kalak bujur kempak keriahen kap perlawesna, pengarapen kalak jahat tetap sia-sia.

²⁹ TUHAN kap si ngkelini kalak bujur, tapi IkernepkenNa kalak si erbahan jahat.

³⁰ Kalak bujur nggeluh la biar-biaren, tapi kalak jahat ipelawes i bas taneh pusaka nari.

³¹ Kalak benar pentar kal rananna, tapi kalak jahat isompel me babahna.

³² Kalak bujur ietehna melasken ranan si mehuli, tapi ranan kalak jahat gelgel erbahan pusuh mesui.