Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tamaka sannanna tau cara’deka. Naassengi pialinna sikamma parkaraya. Kacara’dekanga ampa’jari rannui siagang ta’muri, sa’genna tuli accaya rupanna.
2 Mannurukiko punna nasareko parenta karaenga, teako sambarangngi a’janji mae ri Allata’ala.
3 Karaenga akkullei appaero’-ero’ ampanggaukang, punna tamangngaia, bajikangngang pakabellai kalennu ri ia.
4 Appanggaukangi karaenga lanri koasana; tena barani anggeakki!
5 Tau mannurukia ri ia, laamangi na salewangang; tau cara’deka naassengi angkana ringngapanna siagang antekamma carana mannurukia ri karaenga.
6 Yangasenna apa-apaya nia’ wattunna siagang nia’ massing carana, mingka sike’de’ duduji nipahanga!
7 Tena manna sitau angngassengi angkana sare antekamma attayanga, na tena akkulle ampaui apa lakajarianga.
8 Tena manna sitau akkulle antahangi yareka ampamonoki wattu kamateanna. Anjo parjuangang kammaya takkulleai naliliang, takkulleai ta’lappasa’ battu ri ia, manna pole appare’ akkala’ yareka annipu.
9 Yangasenna anne kuciniki ri wattunna kuparhatikang sikontu apa kajarianga ri linoa. Nia’ wattunna nanapake kakoasanna taua untu’ ancilakai paranna tau.
10 Le’baki kucini’ tau ja’dalaka mate siagang nitarawang. Mingka ri wattunna ammotere’ taua battu ri jera’na, nipujimi anjo tau matea ri ke’nanga anjoreng ri kota tampa’na anggaukangi kaja’dallanga. Jari, anjo sia-sia tonji.
11 Angngapa nagampang kamma taua anggaukangi kaja’dallanga? Lanri tenana nalinta’ nipitabai hukkungang.
12 Manna sibilangngang kaja’dallang nagaukang se’rea tu doraka, tuli attallasa’na, ba’lalo la’bui umuru’na. Bedeng, nakana taua inai mannuruki ri Allata’ala, mattantu sarro bajiki tallasa’na.
13 Kabalekanna, tau ja’dalaka anggappai jai kasukkarrang. Lintaki allalo tallasa’na rapang bayang-bayang. Lamatei ri wattu rungkana lanri tena namannuruki mae ri Batarana.
14 Mingka yangasenna anjo sangnging bicara kosong. Cinikimi apa kajarianga ri lino: Nia’ tau baji’ nihukkung sangkamma tau doraka lompo, nia’ tau ja’dala’ nisare pahala kamma tau baji’. Jari, anjo sia-sia tonji.
15 Bodona pikkirangku iamintu angkana musti rannui taua. Lanri lalang tallasa’na ri lino tena kasannangngang untu’ kalenna pantaranganna angnganrea, angnginunga siagang a’rannu-rannua. Iaji anjo bawang akkulle nakasia’ battu ri kaposoanna, lalang tallasa’ Napassareanga Allata’ala mae ri ia.
16 Ri wattunna kuusahai anggappa kacara’dekang, na kuparhatikang sikontu apa kajarianga ri linoa anne, kuassemmi angkanaya manna kisusa tojeng attuju allo bangngi tammari-maria,
17 takkulleaki’ ampahangi apa ero’Na Allata’ala. Manna antekamma bateta usaha, tena olona lakkulle nipahang. Tau cara’deka nakana kalenna napahangi, mingka sikontutojenna tanapahangngai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA