Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 U’rangi Ampa’jariako ri wattu rungkanu ija, ri tenanapa nabattu taung-taung jai sessa. Anjo wattua lanukanai, "Tena namate’ne tallasakku."
2 Punna battu anjo wattua tenamo nasingara’ paccini’nu, sa’genna tenami singara’na alloa, bulanga siagang bintoenga. Rammang le’leng angngeranga bosi, tuli narurungangko kamma napakamallakko.
3 Annekkereki limannu, takkulleami anjagaiko. Bangkeng kassa’nu lalammami, tena kagassinganna. Tagannakami giginnu untu’ akka’lero kanre. Tabajikami paccini’na matannu sa’genna appakamalla’ nicini’.
4 Tabajikami nulangngere’na kasuarrang niaka ri aganga. Sa’ra musika siagang panggilinganga a’birimmi tanulangngera. Takkulleami baji’ tinronu. Manna sa’ra jangang-janganga napabangka tonjako.
5 Mallakko angngambi’ ri tampa’ tinggia na musti tutuko a’jappa. Uu’nu kebo’mi napakamma uang na nure’resang bangkennu punna a’jappako. Na tappela’ ngasemmo sikamma ero’nu siagang cinnanu. A’lampa mangeki’ ri tampa’ pammantangngang kala’busanta, susa ngasengi taua siagang nakarrukiki’ ri aganga.
6 Rante peraka latappuki na sisa’la’-sa’la’; lampu bulaenga tu’guruki na reppe’; otere’ se’roka tappuki na panra’; gucia ancuruki na tassiara’.
7 Tubuta lammotereki, a’jari limbu’bu ri buttaya Nappasa’ tallasatta lammotereki mae ri Allata’ala. Ia assareki’ a’jari passare kalammoranNa.
8 Kukanamo, memang yangasenna anjo sia-siaji bawang, yangasenna tena matu-matunna, tena anggaranna.
9 Anjo lapung Tau Assarea Pangngajarang bajiki akkala’na siagang cara’deki. Lanri kammana anjo napangngajarrangi anjo pangngassenganna mae ri rupataua. Jai pangngebarang napappilajari nampa nauji katojenganna.
10 Nausahaimi a’boya kana-kana panynyaleori, na anjo kana-kana natulisika ma’nassa lambusuki.
11 Kananna anjo tau annabaya sangkammai takkang cidu’na sitaua pakalawaki, takkang napakea, untu’ anjagai gimbala’na. Passe’reang pangngebarang siagang pappakainga’, sangkammai paku tatto’do’ jarreka. Yangasenna anjo pasarreNa tonji Allata’ala, Pakalawakinta tenaya ruanna.
12 Anakku, ri se’rea passala’ paralluko tutu. Pannulisang kittaka tena kala’busanna, na jai dudua appilajara’ naposoi nyawaya siagang kalea.
13 Le’ba’ ngasenna kutimbang, iaminne bodona panggappaku. Mallakko ri Allata’ala siagang turuki sikontu parentaNa, nasaba’ lanri iaminjo bawang naNapa’jari rupataua.
14 LaNaadeli ngasengi Allata’ala sikontu panggaukanta; ia bajika siagang kodia, ba’lalo manna pole toccokkoa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA