Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini Jahowa ma hubani si Musa,
2 “Hatahon ma hubani halak Israel, ase ipabali sidea hun parsaranan ai sagala halak na gadamon pakon na somal marnipi-nipi ampa haganup halak na butak halani bangkei;
3 age dalahi age naboru, maningon pabalionnima do hu darat ni parsaranan ai, ase ulang ipabutak sidea parsaranannima ai, halani Ahu do marianan i tongah-tongahnima.”
4 Jadi ibahen halak Israel ma sonai, ipabali ma halak ai hu darat ni parsaranan ai; ibahen halak Israel ma, romban hubani hata ni Jahowa hubani si Musa.
5 Dob ai nini Jahowa ma hubani si Musa,
6 “Patugah ma hubani halak Israel, anggo dong sada halak dalahi atap naboru na mangkorjahon dousa aha pe na hinorjahon ni jolma, ai ma manjahati dompak Jahowa, gabe iparroh sapata bani dirini,
7 maningon sopotkononni dousani na binahenni ai, dob ai maningon pasuangonni na binuatni ai, anjaha tambahonni saparlima hujai, anjaha galaronni ai hubani parutanganni ai.
8 Tapi anggo seng dong sindohor ni halak ai parpaulakan ni utang ai, hubani Jahowa ma padason utang ai, bahen rupei ni malim, ambah ni biribiri tunggal pardearan ai, na mambahen pardearan bani.
9 Anjaha ganup galangan tatangan, sagala na pinapansing ni halak Israel, na binoan ni sidea hubani malim, maningon malim ai do simadasi.
10 Atap aha na pinapansing ni sada halak, malim ai do simadasi; atap aha na binere ni sada halak bani malim, malim ai do simadasi.”
11 Dob ai nini Jahowa ma hubani si Musa,
12 “Marsahap ma ho hubani halak Israel anjaha hatahon ma hubani sidea, anggo marriah-riah parinangon ni sada halak, gabe lang hatengeran ia bani paramangonni,
13 anjaha pala saor dalahi na legan bani, tapi ponop do na pinabutakni ai dirini, anjaha seng dong na manaksihon dompaksi barang tardapot ia,
14 gabe sogop hubani uhur parsimburuon, gabe simburu ia mangidah parinangonni ai, halani na dob pinabutakni ai dirini; atap anggo sogop hubani uhur parsimburuon, gabe simburu ia mangidah parinangonni, age pe lang hape ipabutak dirini,
15 jadi boanon ni dalahi ai ma parinangonni ai hubani malim, anjaha iboan galangan marhalanisi, ai ma saparsapuluh efa itak gandum, tapi seng bulih tiriskononni minak hu atasni ai anjaha seng bulih bahenonni dahupa hujai, ai galangan sipanganon parsimburuon do ai, galangan sipanganon pardingatan laho pasingatkon hajahaton.
16 Jadi boanon ni malim ai ma ia hun dohor, anjaha ipajongjong i lobei ni Jahowa.
17 Dob ai buaton ni malim ai ma bah na mapansing ibagas guri-guri tanoh, ibuat ma homa orbuk humbani dasor ni lampolampo ai, anjaha ibahen ma ai hubagas bah ai.
18 Pajongjongon ni malim ai ma naboru ai i lobei ni Jahowa, anjaha janggaanni ma ulu ni naboru ai, anjaha nahkononni hu tanganni galangan sipanganon pardingatan, ai ma galangan sipanganon parsimburuon. Anjaha ibagas tanganni jolomon ni malim ai ma bah na mapaet na parohkon papa.
19 Dob ai pabijaon ni malim ai ma puang-puang ai, anjaha ihatahon bani, ʻAnggo seng dong barang ise marsaor pakon ho, anjaha anggo seng tongon tardogei pinggol ni dalan ho gabe butak, ho na i toruh ni kuasa ni paramangonmu ope, maluah ma ho humbani papa hinorhon ni bah na paet on.ʼ
20 Tapi anggo tongon do ho tardogei pinggol ni dalan, age pe i toruh kuasa ni paramangonmu ope ho, gabe ipabutak ho dirimu, anjaha saor ho hubani dalahi na legan, sobali paramangonmu,
21 jadi, pabijaon ni malim ai ma puang-puang ai marhitei bija bura-bura on, anjaha hatahonon ni malim ai ma hubani puang-puang ai, ʻSai ibahen Jahowa ma ho gabe panginsonohan ni bura pakon papa i tongah-tongah ni bangsamu, ase puhung binongeimu bahenon ni Jahowa, anjaha busungon ia boltokmu,
22 ai masuk ma bah on paparahkon papa hubagas boltokmu, ase busungon boltokmu ibahen anjaha puhung binongeimu.ʼ Anjaha hatahonon ni puang-puang ai ma, ʻNai ma, nai ma tongon.ʼ
23 Dob ai suraton ni malim ai ma bura ai hubagas sada buku, anjaha apusanni use bani bah na paet ai;
24 painumkononni ma use hubani puang-puang ai bah na mapaet ai na parohkon papa ai, ase masuk hubagas boltokni bah na parohkon papa ai gabe hapaeton.
25 Dob ai buaton ni malim ai ma hun tangan ni puang-puang ai galangan sipanganon parsimburuon ai, anjaha tatang-tatangonni ma galangan sipanganon ai i lobei ni Jahowa, lanjar galangkononni ma ai i atasni anjapanjap ai.
26 Buaton ni malim ai ma sampohul humbani galangan sipanganon ai bahen pardingatan, anjaha itutung ma ai i atas anjapanjap ai, dob ai painumkononni ma anggo bah ai hubani puang-puang ai.
27 Ia dob ipainumkon bah ai bani, anjaha anggo tongon domma ipabutak dirini, anjaha ipahiri paramangonni, masuk ma bah na parohkon papa ai hubani gabe hapaeton, gabe busungon ma boltokni anjaha puhung binongeini, anjaha gabe panginsonohan ni bura ma puang-puang ai i tongah-tongah ni bangsani.
28 Tapi anggo seng ipabutak puang-puang ai dirini anjaha pansing do ia, jadi maluah ma ia anjaha boi boratan rumah.
29 Ai ma titah pasal parsimburuon, anggo tardogei pinggol ni dalan sada puang-puang na marparamangon, gabe butak,
30 barang anggo sogop tonduy parsimburuon bani sada dalahi, gabe marsimburu ia bani parinangonni; jadi pajongjongonni ma puang-puang ai i lobei ni Jahowa, anjaha bahenon ni malim ai ma bani haganup romban hubani titah on.
31 Maluah ma anggo dalahi ai humbani hajahaton, tapi manginsonoh do hajahaton ai bani puang-puang ai.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA