Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dhabuna PANGERAN ka Mosa,
2 "Parenta’agi ka oreng Isra’il: Reng-oreng se nyandhang panyaket kole’ budhuk, otabana panyaket matakao, otabana se la nyedding ka mayyit, kabbi kodu padha epakalowar dhari parkemahanna oreng Isra’il.
3 Reng-oreng jareya kodu esoro nyengga sopaja ta’ manajjis parkemahan, se ekennengnge Sengko’ ban Tang ommat."
4 Oreng Isra’il ajalannagi papakon jareya ban makalowar sakabbinna oreng se kantha jareya dhari parkemahan.
5 Dhabuna PANGERAN ka Mosa,
6 "Kabala ka reng-oreng Isra’il: Mon oreng ta’ esto ka Sengko’ ban agabay sala ka oreng laen,
7 oreng jareya kodu ngakone dusana ban nebbus kasala’anna sagenna’na, etambai dhu polo persenna ka oreng se eparogi jareya.
8 Tape mon oreng se eparogi jareya la mate ban ta’ andhi’ ana’ otaba bala se semma’, tebbusanna kasala’an jareya kodu eatorragi ka Sengko’, ban daddi bagiyanna imam. Tebbusanna kasala’an jareya ta’ tamaso’ dumba lake’ kaangguy opacara palebbaranna dusana oreng se sala jareya.
9 Bariya keya apa’a bai se eatorragi oreng Isra’il ka Sengko’, tor-ator se emaksottagi ka Sengko’ malolo, daddi bagiyanna imam se narema tor-ator jareya.
10 Pa-apa se epassra’agi ka imam daddi bagiyanna imam jareya."
11 PANGERAN ngotos Mosa
12 marengngagi atoran-atoran reya ka reng-oreng Isra’il: Olle daddi badha lalake’ se andhi’ panyangka juba’ ka binena, nyangka binena ta’ esto ka aba’na ban macemmer aba’na dibi’ lantaran tedhung apolong ban lalake’ laen. Tape lakena jareya ta’ yakin, sabab binena se alako kantha jareya tek-ngetek. Tadha’ saksena, ban binena jareya ta’ tajuguk teppa’na alako cemmer jareya. Otabana olle daddi oreng lalake’ andhi’ panyangka juba’ ka se bine’, mangkana binena ta’ alako serong.
13 (5:12)
14 (5:12)
15 E dhalem parkara se dhu macem jareya, lalake’ buru kodu ngeba binena ka imam. Lalake’ jareya kodu ngeba keya tor-ator se ekaparlo, iya areya teppong gandum sakilo. Teppong jareya ta’ olle epobuwi mennya’ jaitun otaba dupa, sabab jareya tor-ator panyangka se juba’ ban maksodda nandha’agiya badhana panyangka juba’ dhari lake ka binena.
16 Imam kodu nyoro babine’ jareya entar ka adha’na mezba ban manjeng ngadhep ka PANGERAN.
17 Saellana jareya imam kodu ngala’ pennay tana ban ngesse’e pennay jareya bi’ aeng socce sakone’, pas ngala’ abu sakone’ dhari palesteranna Kemah Socce, abu jareya kodu epamaso’ ka dhalem aeng gella’ sopaja pae’a.
18 Saellana jareya imam buru kodu abarbar obu’na babine’ jareya, ban nyaba’ teppong tor-ator panyangka se juba’ ka tanangnga, dineng imam jareya dibi’ kodu neggu’ pennay se aesse aeng se pae’ se madhateng babaston.
19 Saellana jareya imam kodu nyompa babine’ jareya kantha reya, "Mon ba’na ta’ azina, ba’na lopot dhari babaston se epadhateng aeng reya.
20 Tape mon ba’na la azina,
21 mandar nyamana ba’na bi’ PANGERAN epadaddiya babaston e antarana bangsana ba’na. Mandar bi’ PANGERAN kamalowanna ba’na epakero’a ban tabu’na epakembunga.
22 Aeng se madhateng babaston reya bakal maso’a ka tabu’na ba’na sampe’ tabu’na ba’na kembung ban kamalowanna ba’na kero’." Babine’ jareya kodu nyaot, "Kaula mator enggi; moga-moga sareng PANGERAN epasapaneka’a."
23 Imam jareya pas kodu noles babaston jareya e dalubang gulungan, tolesan jareya pas ekosot ban aeng se pae’ rowa.
24 Imam jareya pas nyoro babine’ jareya ngenom aeng se pae’ se madhateng babaston gella’. Mon eenom, aeng jareya madhateng rassa sake’.
25 Imam kodu ngala’ tor-ator se aropa teppong dhari tanangnga babine’ gella’ pas eatorragi ka ajunanna PANGERAN, terros egiba ka mezba.
26 Saellana jareya pas kodu ngala’ teppong sapergem menangka tandha ja’ teppong jareya kabbi la eatorragi ka PANGERAN, teppong jareya pas eobbar e attassa mezba. Dhi-budhina aeng gella’ pas eenommagi ka babine’ jareya.
27 Mon babine’ jareya pajat azina onggu, samarema ngenom aeng jareya pas arassa ce’ sake’na; tabu’na kembung ban kamalowanna laju kero’. Nyamana bakal daddiya babaston e antarana bangsana.
28 Tape mon ta’ sala, babine’ jareya ta’ ekenneng babaston ban gi’ bisa andhi’ ana’.
29 Kantha jareya atoranna mon badha lalake’ se andhi’ panyangka juba’ ja’ binena alako serong ban lalake’ laen. Babine’ jareya kodu eadhebbagi ka PANGERAN, egiba ka adha’anna mezba, ban imam kodu ajalannagi atoran gella’ ka babine’ jareya.
30 (5:29)
31 Lakena lopot dhari kasala’an, tape binena mon etemmo ja’ sala, kodu nanggung okomanna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA