Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakana Batara mae ri Musa,
2 "Pabattui anne parentaya mae ri tu Israel: Sikontu tau natabaya garring sala, yareka natabaya garring katauang, yareka tau le’baka anseroi mayaka, musti nipasuluki battu ri pakkemaanna tu Israel.
3 Musti nisuroi ke’nanga a’lampa sollanna tena nara’massi pakkemaanga, iamintu tampa’ Kupammantangia siagang ummakKu."
4 Nagaukammi tu Israel anjo parentaya siagang napasulu’mi sikontu tau garring kammaya anjo battu ri pakkemaanga.
5 Napassareangi Batara mae ri Musa
6 anne paratorang-paratorang kammaya untu’ tu Israel: Punna nia’ tau tamajarreka mae ri Batara iamintu salai panggaukanna mae ri paranna tau,
7 anjo taua musti namangakui dosana siagang a’bayaraki pappasulu’ siganna’na, nampa nitambai ruampulo parseng mae ri anjo tau nipakarugia.
8 Punna matemo anjo tau napakarugia siagang tena bija pammanakang ma’reppese’na, anjo pappasuluka musti nipassareangi mae ri Batara, siagang a’jari bageannami imanga. Anjo pappasuluka tantamakkapi gimbala’ lakia untu’ upacara pannangkasi dosana anjo tau kasalanga.
9 Apa-apa mamo napassareang tu Israel mae ri Batara, anjo passare nisa’la’na a’jari bageannai imang antarimayai anjo passarea.
10 Apa napassareanga se’rea tau mae ri Batara, bageanna todong anjo tau assarea. Poro anjo bawang napassareanga mae ri imanga, a’jari bageanna anjo imanga.
11 Nasuroi Batara anjo Musa
12 ampassareangi anne paratorang-paratorang kammaya mae ri tu Israel. Gassingka nia’ tu bura’ne ambata-batai bainenna. Punna nakapangi angkanaya anjo bainenna tena namajarre’ pa’mai’na mae ri kalenna siagang nara’massimi kalenna lanri sikatinroangi siagang bura’ne maraeng. Mingka punna tena nattantu pangngissenna anjo bura’nenna, lanri nagaukanna bainenna anjo kammaya siagang accokko-cokko: tena sa’binna, siagang tena todong narapikangi appanggaukang. Yareka, gassingka nia’ tu bura’ne ambata-batai bainenna, nampa tenaja na’gau’ sala bainenna.
13 (5:12)
14 (5:12)
15 Lalang ruaya anjo passala’, anjo bura’nea musti naerangi bainenna mange ri imanga. Musti angngerang tongi passare niparalluanga, iamintu sikilo labu’ gandung. Anjo labuka takkulleai nitiriki minynya’ zaitun yareka takkulleai nisarei dupa, lanri anjo passarea iamintu lanri bata-bata siagang a’jari pammatei angkanaya nia’ bata-batana tu bura’nea mae ri bainenna.
16 Imanga musti nasuroi anjo bainea mange ri dallekanna tampa’ pakkoro’bangnganga nampa ammenteng andallekang ri Batara.
17 Nampa angngalle imanga se’re mangko’ butta siagang napatiri’ sike’de’ je’ne’ matangkasa’ antama’ ri anjo mangkoka. Le’baki anjo musti angngallei sike’de’ au battu ri dapara’na KemaNa Batara nampa napantama’ ri anjo je’neka.
18 Nampa musti naruntungi uu’na anjo bainea, siagang naboli’ anjo labu’ passare lanri bata-bataya antama’ ri limanna anjo bainea, nampa kalenna anjo imanga anna’galaki je’ne’ pai’ appabattua pattunra.
19 Le’baki anjo musti appasuluki kana sumpa imanga nampa napala’ passitujuanna anjo bainea. Musti angkanai imanga, "Punna tena nu’gau’ bawang, tena nanatabako pattunra napabattua anne je’neka.
20 Mingka punna le’bako a’gau’ bawang,
21 poro Batara ampa’jari arennu passumpa pattunra ri alla’na bansanu. Poro Napa’jari poko’ bonggannu akkapurru’ siagang akkambang battannu.
22 Anne je’ne’ angngeranga pattunra lantamaki ri battannu siagang napakkambangi battannu kammayatompa ampakapurruki poko’ bonggannu." Anjo bainea musti appiali angkana, "Kusitujui; poro kamma laloi anjo Nagaukang Batara."
23 Nampa musti natulisi’ imanga anjo kana pattunraya lalang ri gulungang karattasaka nampa nalu’lu’ siagang anjo je’ne’ paika.
24 Imanga nasuroi anjo bainea angnginungi anjo je’ne’ paika, angngeranga pattunra. Punna niinungi, amma’risi nisa’ring anjo je’neka.
25 Imanga musti naallei anjo passare labuka, siagang napappicinikang mae ri dallekanNa Batara, nampa naerang mae ri tampa’ pakkoro’bangnganga.
26 Nampa musti angngalle sikangkang labu’ salaku pammatei angkanaya sikontu anjo labuka le’ba’mi nipassareang, nampa natunu irate ri tampa’ pakkoro’bangnganga. Kala’busanna, anjo je’neka nipainungangi anjo bainea.
27 Ebara’ angkana le’baki a’gau’ bawang anjo bainea, anjo je’neka langngerangi kapa’risang sannaka mae ri anjo bainea; akkambangi battanna siagang akkapurruki poko’ bongganna. Arenna la’jarimi sumpa pattunra ri tangnga-tangngana bansana.
28 Mingka ebara’ angkana tena nasala, tena nanitabai pattunra siagang lakkulle iji pole ammana’.
29 Kammaminjo paratoranna punna nia’ tu bura’ne akkimburu siagang bata-bata angkanaya anjo bainenna le’baki a’gau’ bawang siagang nara’massi kalenna. Anjo bura’nea musti naerangi mange bainenna andallekang ri Batara siagang imanga musti nagaukangi anjo paratoranga mae ri ia.
30 (5:29)
31 Anjo bura’nea ta’lappasaki battu ri kasalanga; mingka bainenna, punna ma’nassa kasalang tojengi, musti natanggongi kodina kale’bakkanna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA