Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E lao’na nagara Kana’an badha kottha se anyama Arad. E bakto ratona meyarsa ja’ bangsa Isra’il lebat e jalan Atarim, bangsa Isra’il laju eserrang, reng-orengnga badha se etangkep.

² Oreng Isra’il laju asompa ka PANGERAN, "Manabi sareng Junandalem bangsa Isra’il epamennang ka bangsa ka’dhinto, bangsa ka’dhinto sareng tha-kotthana sareng abdidalem epatompessa."

³ Parnyo’onanna bangsa Isra’il jareya ekabbuli bi’ PANGERAN; bangsa Isra’il epamennang ka bangsa Kana’an. Bangsa Kana’an sarta tha-kotthana epatompes kabbi bi’ bangsa Isra’il. Daddi kennengngan jareya enyamae Horma.

⁴ Reng-oreng Isra’il mangkat dhari Gunong Hor lebat lorong se nojju ka Tellok Akaba moterre nagara Edom. Tape e tengnga jalan reng-oreng jareya ta’ sabbar pole,

⁵ pas ango’ngo’an ka Allah ban ka Mosa, oca’na, "Aponapa bi’ sampeyan kaula me’ egiba nyengla dhari Messer? Epamateya e ra-ara beddhi paneka? Sabab e ka’iya tadha’ pa-ponapa se ekennenga teddha, tadha’ aeng se ekennenga enom. Kaula ampon busen ngakan kakanan se tadha’ rassana paneka!"

⁶ PANGERAN pas madhateng lar-olar se mandhi opassa, epangekke’ reng-oreng Isra’il, sampe’ bannya’ reng-oreng Isra’il se padha mate.

⁷ Reng-oreng Isra’il pas padha nyabis ka Mosa, atorra, "Kaula paneka dusa, ango’ngo’an ka PANGERAN sareng ka sampeyan. Tore nyo’onnagi ka PANGERAN sopaja lar-olar paneka epatadha’a." Daddi Mosa laju adu’a nyo’onnagi bangsa jareya ka PANGERAN.

⁸ Dhabuna PANGERAN ka Mosa, "Kassa’ ba’na agabay lar-olaran dimbaga, pacangke’ ka cangga. Reng-oreng se ekekke’ olar gella’ mon ngabas ka olar dimbaga jareya tanto pas baras."

⁹ Daddi Mosa abadhi lar-olaran dimbaga; lar-olaran jareya epacangke’ ka cangga. Reng-oreng se ekekke’ olar gella’, mon ngabas ka lar-olaran jareya, laju baras.

¹⁰ Oreng Isra’il mangkat pole, laju akemah e kottha Obot.

¹¹ Samarena mangkat dhari kennengngan jareya, laju akemah e jur-gujuran Abarim e ra-ara beddhi e temoranna baba Mo’ab.

¹² Laju terros sampe’ gan Cora Zered pas akemah e jadhiya.

¹³ Dhari jadhiya pas mangkat pole laju akemah e penggirra Songay Arnon, e ra-ara beddhi se malanjang ka babana oreng Amori. Songay Arnon jareya daddi batessa babana oreng Mo’ab ban babana oreng Amori.

¹⁴ Lantaran jareya e dhalem ‘Buku Paperranganna PANGERAN’ esebbuttagi, "… Disa Waheb, e baba Sufa ban ra-corana; Songay Arnon

¹⁵ ban bung-lambungnga ra-cora se malanjang sampe’ ka disa Ar nojju ka batessa babana oreng Mo’ab."

¹⁶ Dhari jadhiya reng-oreng jareya mangkat, pas napa’ ka kennengngan se anyama Be’er, artena mor-somor. E jadhiya PANGERAN tao adhabu ka Mosa, "Soro ommat akompol; bi’ Sengko’ eberri’ana aeng."

¹⁷ E bakto jareya bangsa Isra’il anyanye lagu reya, "He, mor-somor, pakalowar aengnga ba’na, bi’ sengko’ eamba’a ban nyanyeyan.

¹⁸ Somor se ekale bi’ sa-pangobasa ban pin-pamimpinna bangsa ekale ban tongket kapamimpinanna sarta tongket tandha kobasana." Dhari ra-ara beddhi reng-oreng jareya ngalle ka Matana,

¹⁹ ban dhari jadhiya ka Nahaliyel, terros ka Bamot

²⁰ saellana laju terros ka cora e babana oreng Mo’ab, e babana konco’na Gunong Pisga se ngadhep ka ra-ara beddhi.

²¹ Bangsa Isra’il pas ngerem reng-oreng otosan ka Sihon, rato Amori, esoro manapa’ pessen kantha reya,

²² "Bangsa abdidalem nyo’ona edi lebada e nagarana junandalem. Bangsa abdidalem sareng bin-ebinna ta’ nyalethong dhari lorong sareng ta’ maso’a ka gal-teggal otabana ka bun-kebbunna anggur, sareng ta’ ngenoma aeng dhari mor-somor e ka’dhinto. Bangsa abdidalem ta’ nyalethong dhari lorong raja kantos kalowar dhari nagaraepon junandalem."

²³ Tape Rato Sihon ta’ kasokan ngedine reng-oreng Isra’il lebat e nagarana. Rato jareya makompol pasukanna, pas meyos ka Yahas e ra-ara beddhi laju nyerrang oreng Isra’il e jadhiya.

²⁴ Tape e dhalem perrang jareya bannya’ tantara Amori epate’e bangsa Isra’il. Bangsa Isra’il laju ngobasane sarta ngennengnge nagarana reng-oreng jareya molae dhari Songay Arnon sampe’ ka Songay Yabok, iya areya batessa babana oreng Amon, sabab bates jareya ce’ kowadda partahananna.

²⁵ Kalaban cara se kantha jareya oreng Isra’il arebbu’ sakabbinna kotthana oreng Amori, tamaso’ Hesybon ban sakabbinna kottha kene’ e sakalenglengnga, sarta laju neptep e jadhiya.

²⁶ Hesybon reya ibu kottha se ekennengnge Sihon, Rato Amori. Rato jareya tao aperrang ban rato Mo’ab sarta arebbu’ bagiyanna nagarana sampe’ ka Songay Arnon.

²⁷ Lantaran jareya bujangga asyi’ir kantha reya, "Mara entar ka Hesybon, ka kotthana Rato Sihon. Sengko’ kabbi padha terro nangaleyana kottha jareya epaddek pole akantha molana.

²⁸ E settong bakto e kottha Hesybon reya pasukan Sihon maju akantha apoy. Se maancor kottha Ar e Mo’ab, ban ngobasane nong-gunong e salanjangnga Arnon.

²⁹ Adhu, bangsa Mo’ab, palang onggu ba’na! Ba’na se mojja Kamos, ba’na la epatompes kabbi! Bi’ Allahna ba’na epanneng epadaddi oreng ngongse, babine’anna ba’na epadaddi tahananna rato Amori.

³⁰ Tape sateya toronanna bangsa jareya padha mate tadha’ karena, e salanjangnga lorong se dhari Hesybon ka Dibon, dhari Nasyim ka Nofah e seddi’anna Medeba."

³¹ Daddi bangsa Isra’il laju ngennengnge babana oreng Amori.

³² Saellana jareya Mosa laju makon reng-oreng nyare jalan se paleng bagus nyerrangnga kotthana Yaezer. Oreng Isra’il laju arebbu’ kottha jareya ban tha-kottha e ma’-semma’na sarta ngojuk oreng Amori se ngennengnge tha-kottha jareya.

³³ Saellana jareya oreng Isra’il abiluk lebat e lorong se ka Basan. Rato Og dhari Basan maju ban pasukanna nyerrang oreng Isra’il e kottha Edrei.

³⁴ Dhabuna PANGERAN ka Mosa, "Ella, ja’ tako’. Ba’na epamennanga bi’ Sengko’. Ba’na bakal makala’a rato jareya, ra’yadda ban nagarana. Rato Og jareya papadha ban Rato Sihon se marenta e Hesybon rowa."

³⁵ Daddi oreng Isra’il mennang ka rato Og. Rato jareya epate’e, bariya keya tra-pottra ban ra’yadda, kabbi epatadha’ karena. Saellana jareya nagarana pas ekobasae sarta ekennengnge.

Bilangan

Video Bilangan 21

Ikuti Kami:

KONTAK | PARTISIPASI | DONASI