Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Arad, iamintu se’re kota ri bageang timboranna pa’rasangang Kanaan. Ri wattu nalangngere’na karaenna anjo kotaya angkanaya niaki battu tu Israel ammalo ri oloang nikanaya Atarim, a’lampami mange ambunduki ke’nanga, siagang nia’mo siapa are tau natahang ke’nanga.
2 Jari attinja’mi tu Israel mae ri Batara angkana, "Punna Kisare mamo pammetang ikambe mae ri anjo bansaya, anjo ke’nanga siagang sikamma kota-kotana lanitumpasaki ri kambe sa’genna cappu’."
3 Natarimami Batara pappala’na anjo tu Israel; Natulummi ke’nanga sa’genna nabeta anjo tu Kanaan. Jari niancuru’mi anjo tu Kanaan siagang sikamma kotana ke’nanga ri tu Israel; nampa naareng ke’nanga anjo tampaka Horma.
4 Nampa nabokoi tu Israel anjo Moncong Hor, nampa angngalle oloang mange ri biring Tamparang Akaba, untu’ angnginroi daera Edom. Mingka ri tangngana aganga, kala’busang kasa’barrami ke’nanga,
5 siagang a’moro-moromi ke’nanga mae ri Allata’ala siagang mae ri Musa. Angkanai ke’nanga, "Angngapa nanuerangi ikambe assulu’ battu ri butta Mesir? Apaka erokko ambunoi ikambe ri anne parang lompoa? Anrinni tena kanre, siagang manna je’ne’ tena todong. Ero’mi ta’langnge ikambe napakamma anne kanre la’baya!"
6 Jari appabattumi Batara ulara’ a’racung ri tangnga-tangngana anjo bansaya. Jaimi tu Israel mate nitotto’ ri anjo sikamma ularaka.
7 Nampa battumo anjo bansaya andallekang ri Musa angkana, "Dorakami ikambe lanri a’moro-morona mae ri Batara siagang mae ri kau. Appala’ doang mako mae ri Batara sollanna nipakabella anne sikamma ularaka battu ri kambe." Jari appala’ doammi Musa untu’ anjo bansaya.
8 Nampa nisuro Musa ri Batara appare’ sikayu ulara’ battu ri tambaga siagang naboli’ irate ri se’reang benteng. Inai-nai tau nitotto’ ri ulara’, lammollei punna naciniki anjo ulara’ tambagaya.
9 Jari napare’mi Musa anjo ulara’ tambagaya nampa napadongko’ irate ri se’reang benteng. Inai-nai nitotto’ ri ulara’, akkullei ammolle punna naciniki anjo ulara’ tambagaya.
10 A’lampami pole tu Israel, nampa akkema ri kota Obot.
11 Le’ba’na nabokoi anjo tampaka, akkemami ke’nanga ri rumbanganna Abarim ri parang lompo bageang rayanganna daera Moab.
12 Nampa akkema ke’nanga ri Ka’bung Lappara’na Zered.
13 Battu anjoreng a’lampami pole ke’nanga nampa akkema ri ba’leanna Binanga Arnon, ri parang lompo niaka ri daera Amori. Iaminjo Binanga Arnon a’jari pa’baeng-baenna daera Moab siagang daerana tu Amori.
14 Iaminjo saba’na nania’ tattulisi’ lalang ri ‘Kitta’ Pa’bundukanna Batara’ angkanaya: "… Desa Waheb, ri daera Sufa siagang ka’bung-ka’bunna; Binanga Arnon
15 siagang tubiri’na sikamma ka’bunga sa’genna mange ri Desa Ar siagang mangea ri pa’baeng-baenna daerana tu Moab."
16 Battu anjoreng a’lampami ke’nanga mange ri tampa’ niarenga Beer, battuanna bungung-bungung. Anjoreng le’baki angkana Batara mae ri Musa, "Suroi ummaka asse’re; laKusarei je’ne’ inung ke’nanga."
17 Anjo wattua nakelongangi tu Israel anne kelong kammaya, "He, bungung-bungunga, panaiki je’ne’nu, laniruppai ri kambe siagang kelong.
18 Bungung nikekea ri sikamma tunipare’ tutoa siagang ri sikamma pamimping bansaya nikeke siagang takkang pamimpinna siagang takkang pammatei kakoasanna ke’nanga." Battu anjoreng ri parang lompoa a’lette’mi ke’nanga mange ri Matana,
19 nampa battu anjoreng mange ri Nahaliel, nampa mange ri Bamot,
20 nampa mange ri ka’bunga ri daerana tu Moab, irawanganna coppo’na Moncong Pisga a’dalle’ mangea ri parang lompoa.
21 Nampa assuro tu Israel siapa are tau mange ri Sihon, karaeng Amori, untu’ ampabattui anne pasanga, angkana,
22 "Napalaki ikambe poro kikellai ammalo ri pa’rasanganta karaeng. Ikambe siagang sikamma olo’-olo’ piarana ikambe tenaja nalammengka battu ri aganga siagang tenaja nalantama’ ri koko-kokoa yareka koko-koko anggoroka yareka tenaja nalangnginung battu ri sikamma bungunga. Tenaja nalammengka ikambe battu ri agang lompoa sa’genna assulu’ ikambe ri daerata karaeng."
23 Mingka tena nanipa’biangi ke’nanga ri Karaeng Sihon ammalo ri pa’rasanganna. Napasse’rei pasukanna nampa a’lampa mange ri Yahas ri parang lompoa nampa nabunduki tu Israel anjoreng.
24 Mingka jai tu Amori nibuno ri tu Israel lalang ri anjo pa’bundukanga. Nampa niempoimo ri tu Israel daerana ke’nanga appakkaramula battu ri Binanga Arnon sa’genna mange ri Binanga Yabok, iamintu pa’baeng-baenna daera Amon, nasaba’ anjo pa’baeng-baenga sanna’ kassa’na pattahanganna.
25 Lanri kammana anjo naalle ngasemmi tu Israel sikontu kota-kotana tu Amori, kammayatompa Hesybon siagang sikontu kota-kota ca’di niaka ri tammulilina, nampa ammantang tulimo ke’nanga anjoreng.
26 Anjo Hesybon iami ibukotana Karaeng Sihon. Le’baki a’bundu’ siagang karaeng Moab nampa naalle daerana sa’genna mange ri Binanga Arnon bellana.
27 Iaminjo saba’na nania’ tau annulisi’ kana-kana kamma anne, "Battu mako mae ri Hesybon, ri kotana Karaeng Sihon. Eroki ikambe anciniki anne kotaya nibangung siagang nibajiki ammotere’.
28 Nia’ se’re wattu nabattu ri anne kotaya namaju pasukanna Sihon sanrapang pepe’. Angngancuruki kota Ar ri Moab, siagang angkoasai bulu’-bulu’ niaka ri Arnon.
29 He bansa Moab, cilaka mako! Tu manynyombaya ri Kamos, panrakko! Nibalang parekangko ri rewatanu a’jari tau a’lampa annompang, tubai’-bainenu a’jari tunitahangi ri karaeng Amori.
30 Mingka kamma-kamma anne panra’mi jari-jarina ke’nanga, ri sikontu oloang battua ri Hesybon mange ri Dibon, battu ri Nasyim mange ri Nofah ri ampi’na Medeba."
31 Kammaminjo nammantammo bansa Israel ri daerana tu Amori.
32 Nampa nasuro Musa a’lampa taua mange a’boya oloang kaminang bajika untu’ mange ambunduki kota Yaezer. Nampa naallemo tu Israel anjo kotaya siagang sikamma kota-kota ca’di niaka ri tammulilina, kammayatompa nabongkami tu Amori niaka ammantang anjoreng.
33 Le’baki anjo a’lekkomi tu Israel nampa angngalle oloang mange ri Basan. Karaeng Og battu ri Basan majumi siagang pasukanna untu’ ambunduki tu Israel ri kota Edrei.
34 Nakanamo Batara mae ri Musa, "Teako mallakki mae ri ia. LaKusareko pammetang. Lanubetai anjo karaenga, sikontu ra’ya’na kammayatompa pa’rasanganna. Gaukammi ri ia sangkamma apa le’baka nugaukang mae ri Karaeng Sihon ammarentaya ri Hesybon."
35 Nanabetamo tu Israel siagang nabunomi anjo Karaeng Og, kammayatompa sikamma ana’-ana’na siagang sikontu ra’ya’na; tenamo ammantang tassesa. Nampa naempoimo ke’nanga anjo pa’rasanganga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA