Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Korah ana’na Yizhar dhari kaom Kehat, suku Lewi, aberonta’ ka Mosa. Korah jareya etolonge oreng katello dhari suku Ruben, iya areya Datan ban Abiram na’-ana’na Eliyab, ban On ana’na Pelet, sarta dhu ratos saeket pamimpin se kasohor se epele ra’yat.
2 (16:1)
3 Reng-oreng jareya areng-bareng padha ngadhep ka Mosa ban Harun laju mator, "Ampon cokop, Mosa! Sadajana ommat Isra’il paneka kaagunganna PANGERAN, ban PANGERAN badha e nga’-tengnga’anna ommat paneka. Tape aponapa sampeyan me’ nganggep alebbiyan dhari ommadda PANGERAN se laen?"
4 Saellana meyarsa oca’ jareya Mosa asojud e tana adu’a ka PANGERAN.
5 Samarena laju adhabu ka Korah ban reng-orengnga, "Lagguna gu-laggu PANGERAN bakal noduwagiya ka ba’na kabbi sapa se sabendherra kaagunganna, oreng kaagunganna, iya areya reng-oreng se epele Salerana, bakal eedinana nyemma’e Salerana e mezba.
6 Lagguna gu-laggu, Korah, ba’na ban reng-orengnga ngala’ padupa’an, esse’e mardha ban dupa, pas giba ka mezba. Dhaggi’ mara pas tenggu sapa e antarana sengko’ ban ba’na kabbi reya se epele PANGERAN. Ba’na reng-oreng Lewi, se ngalebadi bates!"
7 (16:6)
8 Mosa terros adhabu ka Korah, "Mara edhingngagi reng-oreng Lewi!
9 Apa bi’ ba’na eanggep parkara kene’ ja’ Allahna Isra’il malaen ba’na dhari ommat Isra’il laenna, sopaja ba’na ngennenga nyemma’e Salerana, ban ngalakone kawajiban e Kemah Socce, sarta alako kaangguy ommat Isra’il ban aladine ommat jareya?
10 Ba’na, Korah, ban reng-oreng Lewi laenna bi’ PANGERAN la eparenge kahormadan jareya, ban sateya ba’na agugat terro daddiya imam keya!
11 Mon ba’na ban reng-orengnga ango’ngo’an ka Harun, jareya padha ban ba’na alaban ka PANGERAN!"
12 Mosa laju makon oreng ngolok Datan ban Abiram, tape se kadhuwa jareya ngoca’, "Bunten, kaula ta’ entara!
13 Ponapa gi’ ta’ cokop sampeyan ngeba kaula dhari Messer se landhu, epamateya e ra-ara beddhi paneka? Me’ sampeyan gi’ marenta’a kaula?
14 Sanyatana sampeyan ta’ ngeba kaula ka tana se landhu, otaba marenge kaula teggal sareng kebbun anggur menangka sangkolan! Samangken sampeyan nepo kaula! Bunten, kaula ta’ entara ka sampeyan!"
15 Mosa ce’ dukana, laju mator ka PANGERAN, "GUSTE, ja’ tarema tor-atorra reng-oreng paneka. Abdidalem ta’ oneng marogi settonga dhari reng-oreng ka’dhinto; la’-mala’ abdidalem ta’ oneng ngala’ hemarra reng-oreng ka’dhinto sanare settonga."
16 Mosa laju adhabu ka Korah, "Lagguna ba’na entar ka Kemah Socce, abareng ban reng-orengnga ba’na se dhu ratos saeket oreng bannya’na rowa. Harun lagguna badha’a e dhissa’ keya. Ba’na kodu padha ngeba padupa’anna bang-sebang, padupa’an jareya esse’e dupa, pas atorragi ka PANGERAN, saba’ e mezba."
17 (16:16)
18 Daddi reng-oreng jareya padha ngala’ padupa’anna bang-sebang, eesse’e mardha ban dupa, pas manjeng e labangnga Kemah Socce abareng Mosa ban Harun.
19 Saellana jareya Korah makompol sakabbinna ommat, se laju padha manjeng dhep-adhebban bi’ Mosa ban Harun e adha’anna labangnga Kemah Socce. Sakabbinna ommat jareya daksakala laju nangale’e sonarra PANGERAN se ngadirap.
20 Dhabuna PANGERAN ka Mosa ban Harun,
21 "Nyorot ba’na ja’ apolong ban reng-oreng jareya; bi’ Sengko’ reng-oreng jareya epatompessa kabbi sateya keya."
22 Tape Mosa ban Harun asojud sampe’ nyeyom tana, laju mator, "Adhu, Guste, Junandalem se apareng odhi’ ka sadajana mahlok. Manabi se dusa namong oreng kasorang, ponapa Junandalem duka’a ka sadajana ommat?"
23 Dhabuna PANGERAN ka Mosa,
24 "Soro reng-oreng jareya ajauwi mah-kemahna Korah, Datan ban Abiram."
25 Mosa pas meyos ka kennengnganna Datan ban Abiram, eerengngagi para pamimpinna Isra’il.
26 Dhabuna Mosa ka reng-oreng Isra’il, "Mara padha majau dhari mah-kemahna reng-oreng se jahat reya, ja’ nyedding ka apa’a bai dhari dhi’-andhi’na reng-oreng jareya. Mon ba’na ta’ atoro’, ba’na bakal epatompessa epabareng ban reng-oreng jareya lantaran sa-dusana reng-oreng jareya."
27 Reng-oreng Isra’il jareya laju majau dhari mah-kemahna Korah, Datan ban Abiram. Datan ban Abiram la kalowar sarta manjeng e labangnga kemahna bang-sebang, abareng ban ana’ binena.
28 Mosa laju adhabu, "Kalaban cara se kantha reya ba’na bakal taowa ja’ sengko’ ngalakone reya kabbi polana eotos PANGERAN, banne polana tang karep dibi’.
29 Mon reng-oreng reya mate akantha kapprana, ta’ kalaban okoman pa-apa dhari Allah, jareya tandhana ja’ sengko’ ta’ eotos PANGERAN.
30 Tape mon PANGERAN alampa’agi barang se gi’ ta’ tao ekaedhing ba’na sampe’ sateya, ban mon tana maroka adalgep reng-oreng reya ban sakabbinna dhi-andhi’na, sampe’ reng-oreng jareya maso’ dhi’-odhi’ ka dhalem dunnyana oreng mate, ba’na bakal taowa ja’ reng-oreng jareya ta’ esto ka PANGERAN."
31 Mosa buru mare se adhabu kantha jareya, tana e baba’anna Datan ban Abiram maroka,
32 se kadhuwa jareya ban ana’ binena ban reng-oreng se noro’ Korah sarta dhi’-andhi’na kabbi edalgep tadha’ karena.
33 Reng-oreng jareya kabbi nyono’ dhi’-odhi’ ka dunnyana oreng mate ban sakabbinna dhi’-andhi’na. Tana se maroka gella’ laju adalgep pole, ban reng-oreng gella’ mosna edalgep bume.
34 Reng-oreng Isra’il se badha e jadhiya padha buru kabbi e bakto ngedhing pacerrengnga reng-oreng se edalgep bume jareya. Reng-oreng Isra’il laenna padha aera’, "Duli buru! Dhaggi’ ba’na edalgep bume!"
35 PANGERAN laju madhateng apoy se ngello’ oreng se dhu ratos saeket se ngatorragi dupa jareya.
36 Dhabuna PANGERAN ka Mosa,
37 "Soro Eleyazar ana’na Imam Harun ngangka’ padupa’an-padupa’an dhari re-karena sabarang se katonon gella’, abuna arengnga tabur ka kennengngan laen, sabab padupa’an jareya socce.
38 Rang-barang jareya socce polana la eatorragi ka adha’anna Sengko’, PANGERAN. Daddi kala’ padupa’anna reng-oreng se padha eokom mate polana dusana jareya, tempa padaddi lambaran-lambaran se tepes, kagabay kole’ lowarra mezba. Jareya menangka parengeddan ka bangsa Isra’il."
39 Daddi Imam Eleyazar mondhut padupa’an-padupa’an jareya, pas esoro tempa ka reng-oreng, esoro kagabay lembaran se pes-tepes kaangguy kole’ lowarra mezba.
40 Jareya menangka parengeddan ka bangsa Isra’il ja’ salaenna toronanna Harun, ta’ olle badha oreng laen se nyander ka seddi’anna mezba ngobbara dupa e ajunanna PANGERAN. Oreng se ta’ atoro’ ka atoran jareya bakal epateyana akantha Korah ban reng-orengnga. Parkara jareya elakone kabbi akantha se epakonnagi PANGERAN ka Eleyazar kalaban parantara’anna Mosa.
41 Kalagguwanna ommat Isra’il padha ca’-ngoca’e Mosa ban Harun. Oca’na, "Sampeyan mate’e ommadda PANGERAN."
42 Teppa’na akompol ngadhebbi Mosa ban Harun, reng-oreng jareya atole ka Kemah Socce, laju nangale’e ondhem notowe Kemah jareya, sonar tandha kahadiranna PANGERAN pas etangale’e e jadhiya.
43 Mosa ban Harun nyander ka adha’anna Kemah Socce jareya,
44 PANGERAN laju adhabu ka Mosa,
45 "Ba’na nyorot, ja’ akompol ban reng-oreng jareya. Reng-oreng jareya bi’ Sengko’ epatompessa kabbi neng e kennengngan jareya keya!" Se kadhuwa jareya asojud,
46 ban Mosa laju adhabu ka Harun, "Kala’ padupa’anna ba’na, esse’e mardha dhari mezba, pas pobuwi dupa. Duli giba ka ommat, pas mabadha opacara nyo’onnagi saporana sa-dusana ommat jareya. Mara duliyan! PANGERAN la talebat dukana ban wabah la molae."
47 Harun alampa’agi papakonna Mosa jareya, berka’ ka nga’-tengnga’anna ommat se teppa’na akompol ban molae ekenneng panyaket se alleyan. Mardhana epobuwi dupa, saellana jareya laju mabadha opacara nyo’onnagi sapora dusana ommadda.
48 Wabah jareya laju ambu, ban Harun paggun manjeng e antarana reng-oreng se gi’ odhi’ ban se la mate.
49 Se mate e bakto jareya badha pa’ bellas ebu pettong ratos oreng, ta’ tamaso’ se mate e dhalem pamberontaganna Korah.
50 Saellana wabah jareya la tadha’, Harun abali ka Mosa e labangnga Kemah Socce.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA