Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Korah anak Isar, i bas kalak Lewi terpuk Kohat nari, berontak ngelawan Musa. Ikut pe ras ia telu kalak i bas suku Ruben nari, eme Datan ras Abiram anak Eliap, ras On anak Pelet, ras bage pe dua ratus lima puluh kalak Israel si deban, peminpin-peminpin si terberita si ipilih perpulungen.
2 (Bil 16:1)
3 Pulung ia kerina i lebe-lebe Musa ras Harun jenari nina, "Nggo lebihsa perbahanenndu e! Kerina anggota perpulungen enda TUHAN empuna, janah TUHAN rembak ras kita kerina. Ngkai dage, o Musa, maka ipeganjangkenndu man bandu i babo perpulungen TUHAN?"
4 Tupung ibegi Musa enda, minter idampeskenna bana ku taneh jenari ertoto ia.
5 Kenca bage nina man Korah ras kerina pengikutna, "Erpagi-pagi e pagi ituduhken TUHAN man banta ise kin SikerajangenNa; kalak SikerajangenNa, ntah pe kalak si nggo IpilihNa, IpelepasNa ndeheri Ia i bas batar-batar.
6 Pagi erpagi-pagi, kam ras kerina pengikutndu muat talam ingan api, tamaken rara arang ras rempah-rempah si merim i je, jenari baba ku batar-batar. Kenca bage siidah me ise i bas kita si nggo ipilih TUHAN. Kam nge, o kalak Lewi, si nggo lebihsa perbahanenndu!"
7 (Bil 16:6)
8 Tole nina Musa man Korah, "Begiken lah, o kalak Lewi!
9 Akapndu kin soal kitik e adi kam nggo ipeserap Dibata bangsa Israel i bas kerina perpulungen e nari, gelah banci ideherindu ia, ndalanken tugasndu i bas Kemah TUHAN, janah mereken penampat man perpulungen e guna pekena-kenasa?
10 Nggo IberekenNa man bandu ras man kalak Lewi si debanna kehormaten si enda, janah genduari atendu icubakenndu ka muat dahin keimamen!
11 Adi jungut-jungut kam man Harun, si tuhuna nandangi TUHAN nge kam ras pengikut-pengikutndu berontak."
12 Kenca bage isuruh Musa gelah Datan ras Abiram reh ndahi ia, tapi nina duana, "La kami nggit reh!
13 La kin nggo cukup maka nggo ibabandu kami ndarat i bas taneh Mesir si mehumur e nari gelah munuh kami i bas taneh mesawang enda? Ngkai maka ibahanndu dirindu jadi tuan kami?
14 Seh asa genduari langa kami ibabandu ku negeri si mehumur, ntah pe mereken juma ras kebun anggur man kami. Genduari icubakenndu nipu kami. La kami nggit reh!"
15 Merawa kal ate Musa jenari nina man TUHAN, "Ula aloken persembahen kai pe si ibaba kalak enda. Kai pe langa lit kubahan salah man bana kerina; kadena pe langa bo lit kupindo, keledena pe lang."
16 Jenari nina Musa man Korah, "Pagi, kam ras pengikutndu si dua ratus lima puluh kalak la banci la reh ku Kemah Perjumpan; Harun pe i je.
17 Sekalak-sekalak kam muat talam ingan api, tamaken rempah-rempah si merim i je, jenari persembahkenlah i babo batar-batar."
18 Emaka sekalak-sekalak muat talam ingan api, itamakenna ras arang si merara denga rempah-rempah si merim i je, jenari tedis ia i bas dalan bengket ku bas Kemah e bage pe Musa ras Harun.
19 Kenca bage ipepulung Korah kerina perpulungen e, jenari tedis ia kerina petala-tala ras Musa bage pe Harun i bas dalan bengket ku bas Kemah e. Sinalsal TUHAN rempet teridah man perpulungen e kerina,
20 janah nina TUHAN man Musa ras Harun,
21 "Surutlah kam i bas kalak e nari kerina, gelah Kukernepken ia minter."
22 Tapi Musa ras Harun minter mungkuk ersembah, ayona seh ku taneh, janah nina, "O Dibata, kam kap sumbul kerina kegeluhen. Adi sekalak jelma erdosa, kerina kin itembehindu perpulungen e?"
23 Nina TUHAN man Musa,
24 "Suruhlah jelma si nterem nadingken kemah Korah, Datan, ras Abiram."
25 Kenca bage, Musa, itemani peminpin-peminpin Israel, lawes njumpai Datan ras Abiram.
26 Ikatakenna man bangsa e kerina nina, "Ula kam tedis deherken kemah kalak si jahat e janah ula dadapndu kai pe sikerajangenna. Adi ideherindu, kam pe ikernepken ras ia erkite-kiteken kerina dosana!"
27 Emaka miser ia kerina nadingken kemah Korah, Datan, ras Abiram. Datan ras Abiram nggo ndarat jenari tedis ia i lebe-lebe pintu kemahna, ikut pe ndeharana ras anak-anakna.
28 Ikataken Musa man bangsa e nina, "Gelah itehndu maka TUHAN nge si nggo nuruh aku erbahan si enda kerina janah labo erkite-kiteken bekasku milih maka kulakoken.
29 Adi kalak enda kari mate bagi biasa alu la lit ukumen i bas Dibata nari, e tandana maka la TUHAN nuruh aku.
30 Tapi adi TUHAN erbahan si la nggo pernah ibegi, janah taneh erbelah jenari itelenna ia ras kerina sikerajangenna, seh maka ia lawes kempak doni kematen alu geluh-geluhen, i je maka itehndu kalak enda nggo nulak TUHAN."
31 Kenca Musa dung ngerana, minter erbelah dingen talang taneh si idedeh Datan ras Abiram.
32 Jenari itelenna ia kerina ras keluargana, bage pe kerina pengikut Korah rikut ras ertana.
33 Emaka nusur ia kerina ku teruh geluh-geluhen ku bas doni kematen rikut ras kerina erta-ertana. Taneh tertutup mulihken i babona, masap ia kerina.
34 Kerina kalak Israel si lit i bas ingan e lompaten tupung ibegina sora kalak ndai nderkuh. Serko ia kerina nina, "Kiamken! Itelen taneh enda ka kita kari!"
35 Kenca bage ipesusur TUHAN api si gara seh keri ipanganina si dua ratus lima puluh kalak si mpersembahken rempah-rempah si merim ndai.
36 Kenca bage nina TUHAN man Musa,
37 "Suruh Eleasar anak Imam Harun mindahken talam-talam tembaga ingan api e i bas mait kalak si nggo meseng e nari, jenari amburkenlah arang si lit i bas talam-talam ingan api e ku ingan si deban, sabap talam-talam ingan api e badia kap.
38 Si e kerina jadi badia erkite-kiteken nggo ipersembahken i lebe-lebe batar-batar TUHAN. Emaka buatlah talam-talam kalak si nggo ibunuh erkite-kiteken dosana e, tepa seh menipes, jenari bahanlah e jadi tutup batar-batar e. Si enda ibahan gelah jadi sada pertenget man bangsa Israel."
39 Ibuat Imam Eleasar talam-talam ingan api e jenari isuruhna gelah itepa seh menipes guna ibahan jadi lapis batar-batar.
40 Enda jadi sada pertenget man bangsa Israel maka ise pe si la kesusuren Harun la banci reh ku batar-batar nutung rempah-rempah si merim man TUHAN. Adi bage ibahanna la banci la ia ikernepken bagi Korah ras pengikut-pengikutna. Kerina enda ibahan sue ras si nggo iperentahken TUHAN man Eleasar arah Musa.
41 Pepagina kerina perpulungen e jungut-jungut man Musa ras Harun nina, "Nggo ibunuhndu piga-piga kalak bangsa TUHAN."
42 Kenca nggo pulung ia kerina nehken keberatenna man Musa ras Harun, itulihkenna kempak Kemah Perjumpan jenari iidahna maka embun nutupisa janah sinalsal TUHAN mbincar.
43 Berkat minter Musa ras Harun jenari tedis ia i lebe-lebe Kemah e.
44 Nina TUHAN man Musa,
45 "Surutlah kam i bas kalak enda nari, gelah Kukernepken ia minter kerina i jenda!" Mungkuk ia duana, ayona seh ku taneh,
46 jenari nina Musa man Harun, "Buatlah talamndu, tamaken arang si merara i bas batar-batar nari i je, kenca bage tamaken rempah-rempah si merim i babo arang e. Kenca bage pedasken baba e ku jelma si nterem, bahan acara pembersihen man bana. To, pedasken! Nggo mulai gara rawa TUHAN janah penakit nggo mulai ngkenai nterem jelma."
47 Minter lawes Harun, ibuatna talam ingan api, jenari kiam ia ku tengah-tengah jelma si nterem si sangana pulung e. Kenca idahna maka penakit e nggo mulai ngkenai kalak Israel, itamakenna rempah-rempah si merim e i babo arang e jenari ibahanna acara pembersihen man bangsa e.
48 Erkiteken si enda, ngadi minter penakit ndai. Harun teridah sangana tedis kelang-kelang kalak si nggo mate ras si nggeluh denga.
49 Teremna si mate lit 14.700 kalak langa ikira kalak si mate i bas pemberontaken Korah.
50 Kenca penakit e nggo ngadi, mulih Harun ndahi Musa i bas dalan bengket ku bas Kemah e.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA