Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai martahi-tahi ma si Kora, anak ni si Izhar, anak ni si Kahat, anak ni si Levi rap pakon si Datan pakon si Abiram, anak ni si Eliab pakon si On, anak ni si Pelet, anak ni si Ruben.
2 Jongjong ma sidea manggeori dompak si Musa rap pakon dua ratus lima puluh dahali humbani halak Israel, kopala-kopala ni tumpuan ai, halak na tarpilih hu parrapotan anjaha na tarbarita.
3 Jadi martumpu ma sidea mangimbang si Musa pakon si Aron, nini ma dompak sidea, “Na ma lobihtu do pambahennima. Na pansing do ganup tumpuan in, sidea ganup, anjaha i tongah-tongah ni sidea do Jahowa; mase ma pagijang-gijangonnima dirinima manggomgom kuria ni Jahowa?”
4 Jadi dob ibogei si Musa hata ai, marrogop ma ia hu tanoh.
5 Dob ai nini ma hubani si Kora pakon hubani haganup hasomanni sapartahian, “Patar ma patugahon ni Jahowa barang ise jujungan na pinabangkit-Ni, anjaha ise na pansing, na bulih dohor hu Bani; anjaha ise na pinilih ni Jahowa, ai ma na bulih dohor hu Bani.
6 On ma bahen hanima, si Kora pakon ganup hasoman sapartahianni: Buat ma batil pardahupaan;
7 nahkon ma apuy hubagas, anjaha bahen ma dahupa hu atasni i lobei ni Jahowa patar; jadi barang ise na pinilih ni Jahowa, ai ma na pansing. Pambahenannima do na malobihtu, hanima ginompar ni si Levi.”
8 Nini si Musa ma hubani si Kora, “Tangihon ma hatangkon hanima ginompar ni si Levi.
9 Maotiktu ope ninuhurnima, na dob pinapulig ni Naibata ni Israel hanima hun tumpuan ni Israel, ase bulih hanima roh hun dohor hu bani, laho mangkoseihon horja bani ianan ni Jahowa, anjaha jongjong i lobei ni tumpuan in, marugas bani sidea?
10 Domma ilopas ho roh hun dohor, rap pakon saninamu halak Levi, sihol buatonnima ope hamalimon in?
11 Halani ai, ho pakon ganup hasomanmu sapartahian, na mangimbang Jahowa do hanima in. Ai ise ma si Aron, ase marungut-ungut hanima hubani?”
12 Dob ai isuruh si Musa ma na mardilo si Datan pakon si Abiram, anak ni si Eliab, tapi nini sidea ma, “Seng ra hanami tangkog hujai.
13 Maotiktu ope gakni ninuhurmu, na dob niarahkonmu in hanami luar hun tanoh habaoran ni dadih pakon manisan ni lobah, laho mambunuh hanami i halimisan on? Sihol gakni use pabangkitonmu dirimu gabe raja bennami?
14 Seng dong iboban ho hanami hu tanoh habaoran ni dadih pakon manisan ni lobah, anjaha seng dong ibere ho juma pakon pohon anggur bahen parbagianannami. Sihol use pakon mata ni dalahi pulsitkononmu? Seng ra hanami tangkog hujin.
15 Jadi nahit ma ringis ni si Musa, anjaha nini ma hubani Jahowa, “Sai ulang ma marpanatap Ham bani galangan sipanganon ni sidea. Seng ongga age sada halode hubuat humbani sidea, anjaha seng ongga hubahen na masambor hubani atap ise humbani sidea.”
16 Dob ai nini si Musa ma hubani si Kora, “Patar maningon roh do ho rap pakon hasomanmu sapartahian hu lobei ni Jahowa, ho, sidea pakon si Aron.
17 Dob ai ganup hanima ibuat bei ma batil panutungan ni dahupani anjaha inahkon ma hu atasni dahupa, dob ai ganup ma mamboan hun dohor batil pardahupaanni hu lobei ni Jahowa, ganup dua ratus lima puluh batil pardahupaan, ho pe pakon si Aron iboan bei ma pardahupaanni.”
18 Jadi ganup ma mambuat batil pardahupaanni, inahkon ma apuy hu atasni, anjaha ibahen ma dahupa hu atasni ai, dob ai jongjong ma sidea bani labah ni lampolampo ai rap pakon si Musa ampa si Aron.
19 Domma ipatumpu si Kora hinan haganup tumpuan ai hulabah ni lampolampo partumpuan ai mangimbang sidea. Dob ai taridah ma hamuliaon ni Jahowa bani ganup tumpuan ai.
20 Dob ai nini Jahowa ma hubani si Musa pakon si Aron,
21 “Paholang hanima ma dirinima humbani tumpuan in, ase Husiapkon sidea ibagas na tongkin.”
22 Dob ai marrogop ma si Musa pakon si Aron, anjaha nini sidea ma, “Ham Naibata, Naibata ni tonduy ni sagala angkula, anggo mardousa sahalak, mintor ringisan-Mu ma ganup tumpuan in?”
23 Nini Jahowa ma hubani si Musa,
24 “Hatahon ma hubani tumpuan in, ʻLaho ma hanima hun lambung ni lampolampo ni si Kora, si Datan pakon si Abiram.ʼ”
25 Dob ai laho ma si Musa mangayaki si Datan pakon si Abiram, anjaha iirikkon pangintuai ni halak Israel do ia.
26 Anjaha nini ma hubani tumpuan ai, “Laho ma nasiam hun lampolampo ni parjahat on, anjaha ulang ma ijamah nasiam barang aha pe ugas ni sidea, ase ulang dihut nasiam siap halani dousa ni sidea ai.”
27 Dob ai surut bei ma sidea hun lambung ni lampolampo ni si Kora, si Datan pakon si Abiram. Jadi luar ma si Datan pakon si Abiram, lanjar jongjong i labah ni lampolampo ni sidea rap pakon parinangon ni sidea, anak ni sidea pakon dakdanak ni sidea.
28 Dob ai nini si Musa ma, “Hunjon ma botohon nasiam, paboa Jahowa do na marsuruh ahu mangkorjahon horja on, anjaha sedo humbani uhur-uhurhu sandiri.
29 Anggo songon parmatei na somal do parmatei ni halak on, atap anggo songon hinamagou na somal do mangonai hubani halak on, na so sinuruh ni Jahowa ma ahu tongon.
30 Tapi anggo ijadihon Jahowa na so ongga tarjadi, gabe ipangangang tanoh in babahni anjaha ibondut sidea rap pakon na adong bani sidea, gabe manggoluh sidea tuad hu nagori toruh, jadi botoh nasiam ma, na dob iapasi halak on do Jahowa.”
31 Jadi dob siap ihatahon hata ondi, marigat ma tanoh ai i toruh ni sidea.
32 Ipangangang tanoh ai ma babahni lanjar ibondut ma sidea, rumah ni sidea pakon haganup halak na mangirikkon si Kora sonai ganup ugas-ugas ni sidea.
33 Jadi sonai ma manggoluh tuad sidea hu nagori toruh ronsi ganup ugas-ugas ni sidea, lanjar irongkob tanoh ai ma sidea. Jadi magou ma sidea hun tongah-tongah ni tumpuan ai.
34 Anjaha haganup halak Israel, na inggot bani sidea, lintun bei ma mambogei doruh-doruh ni sidea ai, ai nini sidea do, ʻAse ulang dihut hita ibondut tanoh in.ʼ
35 Luar ma homa apuy humbani Jahowa, gabe bois ipangan dalahi sidua ratus lima puluh halak ai, na manggalangkon dahupa ai.
36 (17-1) Dob ai nini Jahowa ma hubani si Musa,
37 (17-2) “Hatahon ma si Eleasar, anak ni Malim Aron, mambuat pardahupaan ai humbagas gajag ni apuy ai, tapi apuy ai daoh ma iambukkon ai.
38 (17-3) Ai na pansing do pardahupaan ni halak ai, na matei halani dousa ni sidea; halani ai topaon do ai gabe pamaluti, silampiskononkon bani anjapanjap; domma pala igalangkon sidea ai hu lobei ni Jahowa, halani ai na pansing do ai. Ase gabe tanda ma ai bani halak Israel.”
39 (17-4) Jadi ibuat Malim Eleasar ma pardahupaan tombaga ai, sagala na dob ginalangkon ni halak na dob pinangan ni apuy ai, lanjar itopa ma ai bahen pamaluti ni anjapanjap;
40 (17-5) gabe singat-singat ma ai bani halak Israel, ase ulang roh be hun dohor halak na legan, na so humbani ginompar ni si Aron, sihol manutung dahupa i lobei ni Jahowa, ase ulang magou ia songon si Kora pakon hasoman sapartahianni, songon na dob nilumbahonni hinan bani marhitei si Musa.
41 (17-6) Patarni ai marungut-ungut ma use tumpuan ni halak Israel hubani si Musa pakon si Aron, nini sidea ma, “Nasiam do na mamunuh bangsa ni Jahowa.”
42 (17-7) Jadi dob martumpu tumpuan ai hu lambung ni si Musa pakon si Aron, marhusor ma sidea dompak lampolampo partumpuan ai, jadi tonggor ma, irongkob hombun ma lampolampo ai, anjaha taridah ma hamuliaon ni Jahowa.
43 (17-8) Roh ma si Musa pakon si Aron hu lobei ni lampolampo partumpuan ai.
44 (17-9) Nini Jahowa ma hubani si Musa,
45 (17-10) “Laho ma hanima hun tongah-tongah ni tumpuan on, ase Huboiskon sidea ibagas na satongkin.” Jadi marrogop ma sidea na dua.
46 (17-11) Nini si Musa ma hubani si Aron, “Buat ma pardahupaan in, bahen ma hubagas apuy na hun anjapanjap in, nahkon ma dahupa hu atasni anjaha podas ma ho laho marayak tumpuan in laho mambahen pardearan bani sidea, ai domma pala luar rimas hun lobei ni Jahowa, anjaha domma pala mamungkah masa papa ai.”
47 (17-12) Dob ai ibuat si Aron ma pardahupaan ai, songon na hinatahon ni si Musa, jaha marlintun ma ia hu tongah-tongah ni tumpuan ai, hape tonggor ma, domma pala mamungkah masa papa ai i tongah-tongah ni bangsa ai; itutung ma dahupa ai laho mambahen pardearan hubani bangsa ai.
48 (17-13) Jongjong ma ia i tongah-tongah ni na matei pakon na manggoluh ai, gabe maronti ma papa ai.
49 (17-14) Ia buei ni halak na matei binahen ni papa ai sapuluh ompat ribu pitu ratus halak do, sobali na matei na mangirikkon si Kora.
50 (17-15) Mulak ma si Aron hubani si Musa hu lampolampo partumpuan ai, dob maronti papa ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA