Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Narapiki bulang tuju nia’ ngasemmi tu Israelka ammantang tuli ri massing-massing kotana. Ri tanggala’ se’re anjo bulanga a’rappung ngasengi ke’nanga ri kota Yerusalem, ri paranglakkeng niaka ri dallekanna Pakke’bu’ lompo Je’ne’. Napalaki ke’nanga sollanna naalle Imang Ezra Kitta’ Hukkunga. Anjo Ezra se’re tucara’de’ ri passala’na Hukkung Napassareanga Batara mae ri Israel tete ri Musa.
2 Nampa naerammo Ezra anjo kittaka mae ri dallekanna anjo pa’rappungang tau jaia, iamintu bura’ne, baine siagang ana’-ana’ anggannakamo umuru’na untu’ akkulle ampahangi.
3 Nampa appakaramula bari’basa’ sa’genna tangngallo nabaca Ezra anjo kitta’ Hukkunga mae ri ke’nanga. Na yangasenna ke’nanga mappilangngeri baji’mi.
4 Ammentengi Ezra irate ri podiung kayu le’baka nipare’ untu’ kaparalluanna anjo pa’rappunganga. Ri sa’ri kananna ammentengi siapa are tau iamintu: Matica, Sema, Anaya, Uria, Hilkia, siagang Maaseya; nampa ri sa’ri kairinna ammentengi: Pedaya, Misael, Malkia, Hasum, Hasbadana, Zakharia siagang Mesulam.
5 Anjo tampa’ pammentenganna Ezra la’bi tinggiangangi nasikamma anjo taua, sa’genna akkulle ngaseng ke’nanga anciniki. Tasalloai le’ba’na nasungke anjo kittaka, ammenteng ngasemmi ke’nanga.
6 Nakanamo Ezra, "Nipujimi Batara, Allata’ala malompoa!" Sikontu ra’yaka naangka’ ngasemmi limanna tinggi-tinggi nampa appiali angkana, "Aming, aming!" Nampa su’ju’ ke’nanga anynyomba ri Allata’ala.
7 Le’baki anjo ambangummi nai’ nampa massing ammenteng ngaseng ke’nanga ri tampa’na, nampa lalanna anjo nia’mo siapa are jaina tu Lewi ampakasingaraki battuanna anjo Hukkunga mae ri ke’nanga. Sikamma anjo tu Lewia iamintu: Yesua, Bani, Serebya, Yamin, Akub, Sabetai, Hodia, Maaseya, Kelita, Azarya, Yozabad, Hanan, siagang Pelaya.
8 Napalembai ke’nanga anjo HukkunNa Allata’ala massing-massing bageang bonena, sa’genna akkulle ra’yaka ampahangi anjo nibacaya.
9 Nalangngere’na ke’nanga nibaca anjo Hukkunga, a’jari dinging-dingimmi pa’mai’na ra’yaka allangngereki, nampa angngarru’ ke’nanga. Jari nakanamo guburnur Nehemia siagang Imang Ezra kammayatompa sikamma anjo tu Lewi ampakasingarakai anjo Hukkunga ri sikontu anjo ra’yaka, "Anne alloa, allo nipakatangkasa’ untu’ Karaeng Allata’alanu ngaseng, jari teako si’nai siagang teako angngarruki.
10 Kamma-kamma anne ammotere’ mako; angnganre angnginung mako a’rannu-rannu. Passareangi sipa’gang kanrenu siagang anggoro’nu mae ri tau kakuranganga. Anne alloa, allo nipakatangkasa’ untu’ Batara, jari teako susai. Karannuang Napassareanga Batara lampakajarrekko."
11 Kammayatompa sikamma tu Lewia napakasannammi anjo ra’yaka na’mole-mole angkana, "Teako si’nai pa’mai’nu ri anne allo nipakatangkasaka."
12 Jari ammotere’mi sikontu ra’yaka untu’ angnganre, angnginung, siagang a’bage-bage kanre mae ri tau maraenga. Rannumi pa’mai’na ke’nanga lanri napahammi battuanna anjo nalangngereka ke’nanga nibaca.
13 Ammukona a’rappungammi sikamma kapala kaluargaya, sikamma imanga siagang tu Lewia, nampa a’lampa mange ri Ezra untu’ ampilajari sikamma ajarang HukkunNa Batara.
14 Nagappami ke’nanga lalang ri anjo Hukkung Napassareanga Batara tete ri Musa, angkanaya Nasuroi Batara umma’ Israelka ammantang lalang ri pa’balla’-ballakang untu’ poro sinampekang, iamintu ilalang nisua’-suarrinna Balla’-balla’ Leko’ kayua.
15 Lanri kammana anjo, ri sikontu kota Yerusalem, ri kota-kotaya, siagang ri desa-desaya, napa’la’bammi ke’nanga anne parentaya angkana, "Massing a’lampa ngasengko nai’ ri bulu’-buluka nampa angngalleko tangke-tangke leko’ kayu camara, zaitun, poko’ minynya’-minynya’, palma, siagang poko’ maraengannaya, untu’ appare’ balla’-balla’ situru’ paratorang niaka lalang ri Kitta’ Hukkung."
16 Jari a’lampami ra’yaka angngallei anjo tangke-tangke poko’ kayua. Sikontuna ke’nanga appare’mi balla’-balla’ massing ri lappara’na pattongko’ balla’na ke’nanga, ri paranglakkeng balla’na, ri paranglakkeng dallekang Balla’Na Batara ri Yerusalem, ri parang ri ampi’na Pakke’bu’ Lompo Je’ne’, siagang ri parang ri ampi’na Pakke’bu’ Lompo Efraim.
17 Sikontu anjo ra’ya’ ammotereka battu ri pa’rasangang pammelakkanga appare’ ngasengi anjo balla’-ballaka, nampa ammantang ke’nanga anjoreng. Iaminne uru-uruna nigaukang appakkaramula ri jammanna Yosua ana’na Nun, nasanna’ ngasemmo sungguna siagang sannanna nyawana ke’nanga.
18 Tuju alloi sallona ke’nanga assua’-suara’. Allo-allona nabacai Ezra bageang-bageang niaka lalang ri anjo kitta’ HukkunNa Allata’ala. Ri allo makasagantuju appare’mi acara untu’ antongkoki anjo passua’-suarranna ke’nanga, situru’ paratorang Hukkunga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA