Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca nggo seh bulan si pepituken kerina kalak Israel nggo ringan i bas kuta pengulihenna. I bas wari si pemena bulan e, kerina ia pulung i Jerusalem, i tengah kesain deherken Gerbang Lau. Ipindo kalak ndai man Esra, eme sekalak imam dingen ahli Undang-undang si ibereken TUHAN man Israel arah Musa, gelah i buatna kitap Undang-undang e.
2 Emaka ibaba Esra kitap e ku perpulungen ndai, i ja nggo pulung subuk dilaki, diberu, bage pe danak-danak si nggo ngasup ngantusisa.
3 Alu ngala kempak jelma si pulung i bas kesain deherken Gerbang Lau e, iogeken Esra Undang-undang ndai mulai matawari pultak nari seh ciger, janah kerinana megikenca alu tutus.
4 Esra tedis i das sada mimbar si nggo ibahan guna keperlun si e. Kalak si tedis arah kemuhenna eme: Matitia, Sema, Anaya, Uria, Hilkia ras Maaseya; janah si tedis arah kawesna eme: Pedaya, Misael, Malkiya, Hasum, Hasbaddana, Sakaria ras Mesullam.
5 Sanga Esra tedis i das mimbar kerina kalak ngidahsa sabap ganjangen ia asang kerina kalak ndai. Kenca italangina kitap e, minter kalak ndai tedis kerina.
6 Nina Esra, "Pujilah TUHAN, Dibata si Mbelin!" Kerina kalak ndai ngangkat tanna janahna ngaloi, "Amin! Amin!" Jenari nembah erjimpuh ia kerina, ayona seh ku taneh.
7 Kenca bage keke ia kerina, tedis ia i bas inganna sekalak-sekalak, janah kalak Lewi si tersena i jenda nerangken Undang-undang e man bana, eme: Jesua, Bani, Serebia, Jamin, Akkub, Sabbetai, Hodia, Maaseya, Kelita, Asaria, Josabat, Hanan ras Pelia.
8 Langsung iterjemahken kalak ndai Undang-undang Dibata e, jenari iterangkenna seh maka kerina kalak ndai ngangkasa.
9 Kenca ibegi kalak ndai kai si ikataken i bas Undang-undang e, tangis ia kerina. Emaka Nehemia gubernur tupung si e, ras Esra sekalak imam dingen ahli Undang-undang, bage pe kalak Lewi si nerangken Undang-undang e, ngataken man bana kerina nina, "Wari enda eme sada wari si badia man TUHAN Dibatandu. Emaka ula kam tangis ntah pe erceda ate.
10 Genduari mulihlah ku rumah janah man-manlah kam. Rasken panganndu ras anggurndu ras kalak si kekurangen. Sendah eme wari si badia man TUHANta, emaka ula ceda atendu. Keriahen si ibereken TUHAN man bandu erbahanca kam megegeh."
11 Kalak Lewi niar-niar lako pesinik jelma si nterem janah ngatakenca gelah ula erceda ate i bas wari si bage badiana.
12 Emaka kerina ia mulih ku rumah jenari man ras minem alu meriah ukur janah iraskenna sikerajangenna ras kalak si deban, sabap angkana kai si nggo iogeken man bana.
13 Papagina, kepala-kepala terpuk, rikut ras imam-imam ras kalak Lewi, lawes njumpai Esra guna mpelajari pengajaren Undang-undang e.
14 Datca maka Undang-undang si ibereken TUHAN arah Musa, merentahken bangsa Israel gelah tading i bas Barung-barung kidekah Wari Raya Barung-barung i bas bulan si pepituken.
15 Emaka ibereken kalak ndai perentah-perentah si tersurat arah teruh enda, jenari ikiremkenna ku belang kota Jerusalem ras kota-kota si deban bage pe ku kuta-kuta. Perentah e, eme: "Laweslah ku uruk-uruk jenari buatlah dahan-dahan tusam, dahan saitun, dahan mirt, bulung kurma, ras dahan kayu si deban si gupgup, lako mahan Barung-barung sue ras perentah si tersurat i bas Undang-undang."
16 Emaka ibuat kalak ndai dahan-dahan jenari ibahanna Barung-barung i datas tarum rumahna, i kesain rumahna, i kesain Rumah Pertoton ras i taneh lapang deherken Gerbang Lau ras Gerbang Eperaim.
17 Kerina kalak si nggo mulih i bas pembuangen e nari erbahan Barung-barung jenari ringan i bas. Enda me si pemenana kal ibahan kenca Josua anak Nun nai mate. Emaka seh akapna riahna.
18 Mulai i bas wari si pemena nari seh ku wari pendungi Wari Raya e, tep-tep wari ioge kalak ndai sada bagin i bas Undang-undang Dibata. Pitu wari dekahna kalak ndai ngerayakenca, janah i bas wari si pewaluhken ibahan acara pendungi, sue ras si iperentahken Undang-undang.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA