Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Piga-piga paksa kenca si e, subuk dilaki bage pe diberu, mulai jungut-jungut kerna teman-temanna kalak Jahudi.
2 Deba ngatakenca nina, "Keluarga kami nterem, emaka perlu kami melala gandum man nakan kami, gelah ula kami mate."
3 Si deban ka nina, "La banci langigadeken kami juma kami, kebun anggur kami gelah banci kami dat gandum maka ula kami mate la man."
4 Lit denga ka pe si deban ngatakenca, "La banci langkami minjam duit guna nggalari pajak si ipindo raja kerna juma ras kebun anggur kami.
5 Kami sada dareh nge ras senina-senina kami kalak Jahudi. Ma seri nge ulina anak-anak kami ras anak-anakna? Tapi terpaksa ibere kami anak-anak kami jadi budak kalak. Piga-piga kalak anak kami si diberu nggo me deba idayaken jadi budak. Kami sitik pe lanai ergegeh ngelawan si e, sabap juma kami ras kebun anggur kami nggo man kalak."
6 Kenca kubegi kelsehen kalak e, merawa kal ateku,
7 janah kuputusken erbahan sada tindaken. Kutembehi pengulu-pengulu ras pegawai-pegawai bangsa e janah ningku man bana, "Uga maka ipindondu bunga si mesangat man senina-seninandu?" Jenari kupepulung jelma si nterem guna encakapken si e,
8 janah ningku, "Kidekah enda, asa ngasup kami nggo itukur kami senina-seninanta kalak Jahudi si la banci lang ndayaken bana jadi budak bangsa si deban. Genduari kam jine maksa senina-seninandu e ndayaken bana man bandu!" Sinik kerina pengulu-pengulu e janah la ia ngasup ngerana sengkebabah pe.
9 Kenca bage ningku, "Salah kap perbahanenndu e! Arusna mbiar kam man Dibata janah ngelakoken kai si benar. Adi bage tentu la iberendu dalan man musuh-musuhta kalak perbegu ah megombang man banta.
10 Aku ras teman-temanku bage pe kalak si erdahin ras aku nggo minjamken duit ras gandum man bangsanta. Genduari lanai pada sipindo galarna.
11 Sasapkenlah kerina utang kalak e man bandu, subuk duit, gandum, anggur bage pe minak saitun. Janah ulihkenlah minter man bana jumana, kebun anggurna, kebun saitunna bage pe rumahna!"
12 Ngaloi pengulu-pengulu e, "Uga nindu bage idalanken kami. Kerina erta-erta e iulihken kami, janah la ipindo kami utangna." Kenca bage kudilo imam-imam, jenari kusuruh kalak e ersumpah i lebe-lebe imam-imam emaka icikepna kai si nggo ijanjikenna.
13 Emaka kutangtangi bentingku jenari kukisamken, janah ningku, "Ise kam si la ncikep janjindu, bagenda me kam pengkisamken Dibata. Ibuat Dibata rumahndu ras kasa kai sikerajangenndu, janah kai pe la lit ItadingkenNa i bas kam." Emaka ngaloi kerina si pulung e nina, "Amin!" jenari ipujina TUHAN. Kerina pengulu-pengulu e nehken si ijanjikenna.
14 Kidekah si sepulu dua tahun aku jadi gubernur Juda, i bas tahun si pedua puluhken seh tahun si petelu pulu duaken pemerentahen Raja Artaserses, aku ras kade-kadengku la man pangan si jadi hakku selaku sekalak gubernur.
15 Tiap gubernur si ertugas ope denga aku, ia jadi baban si mberat man jelma si nterem, janah ituntutna empat puluh duit pirak tiap wari man penukur pangan ras anggur. Suruh-suruhenna pe nindih jelma si nterem. Tapi aku la bage perbahanenku, sabap mbiar aku Dibata.
16 Kerina gegehku kupake lako pekena tembok e, janah selambar juma pe la lit kubuat man bangku. Janah kerina kalak si erdahin ras aku kusuruh ikut i bas dahin pekena tembok e.
17 Temue si man berenken nakan tetap lit seratus lima puluh kalak Jahudi ras pengulu-penguluna, tambah-tambah kerina kalak si reh ndahi aku i bas negeri-negeri sekelewet Juda nari.
18 Bengkau si man pekenan tep-tep wari eme sada lembu, enem biri-biri si mejilena, ras melala manuk janah sepuluh wari sekali kusikapken anggur si mbaru. Tapi kueteh uga beratna tanggungen jelma si nterem, emaka la kubuat belanja si arusna kin jadi sikerajangen gubernur.
19 O Dibatangku, erkiteken kasa kai si nggo kubahan man bangsa enda, ingetlah min aku, gelah tambah kesangapenku.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA