Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 “Papa ma bani huta sisopsop daroh, na gok ladung ampa paksa, lang maronti panrampokon!
2 Bogei! Parlisik ni lonsing-lonsing, pargurojob ni galapang! Bogei! Huda na marangkat dua ampa gareta na marpojong.
3 Siajak huda na rongom roh, podang na marjilam-jilam ampa tanja na mirlak; buei ni halak na tinampul, marjunjun anjaha lang tarhira bangkei, lang marnarotap bangkei gabe mangkatargompang sidea bani bangkei ai.
4 Anjaha ganupan ai binahen ni hinabuei ni ulah ni boru jalang do, na jenges-jenges na pandei mandari-dari, na manjualhon bangsa-bangsa marhitei parbangkisonni ai ampa marga marhitei uti-utianni ai.
5 Tonggor ma, marlulu do Ahu dompak ho,” nini Jahowa Zebaot. “Sintakon-Ku ma hioumin das bani bohimu, anjaha patidakon-Ku ma hatalanjangonmin bani bangsa-bangsa ampa habadoronmu bani harajaon-harajaon.
6 Gijigkonon-Ku ma bam na mabutak, pabadoron-Ku ma ho, anjaha bahenon-Ku ma ho gabe sitontonan.
7 Anjaha sagala na mangidah ho, maporus ma humbam, anjaha nini ma, ʻDomma hansur Ninive, ise ma na manangisi?ʼ Hunja ma pindahan-Ku na mangapohi ai?
8 Mintor dearan ma ho hun bani, na marianan bani topi ni Bah Nil, na niinggotan ni bah, na marbatar-batarhon laut anjaha na martembokkon bah?
9 Etiopia do hagogohon bani ampa Masir na so marpispis ai: Put ampa Libia sipangurupi bani.
10 Tapi sidea pe domma hu habuangan, maningon laho hu tahanan; dakdanakni irosaki i suhi-suhi ni ganup dalan. Marruji-ruji do halak pasal na sangap ni sidea, anjaha ganup pambosarni isangkut do bani gari.
11 Ho pe maningon mabuk do, maningon mirdong do, maningon pindahanmu do haporusan i lobei ni munsuhmu.
12 Sagala bentengmu usih do bani hayu ara na marboras mula-mula; anggo idugur mintor mardabuhan ma bani pamangan ni na mangankon.
13 Tonggor ma, doskon naboru do balamu i tongah-tongahmu. Mungkab do horbangan ni tanohmu jumpahon ni munsuhmu, anjaha panganon ni apuy do pating-patingmu.
14 Tahui ma bah managam pangkubu, anjaha patoguh bentengmu! Masuk ma hu tanoh parhalampungan, luntak ma tanoh halampung ai, anjaha buat ma panuangan ni batu!
15 Sai na bois do ho panganon ni apuy ijai, siapkonon ni podang ma ho. Bondutonni ma ho songon balang. Pabuei ma dirimu songon tamponok, pabuei songon balang!
16 Bahatan do partiga-tigamu ibahen ho humbani bintang na i langit; ipaherbang balang ai ma habongni anjaha habang ma ia lintun.
17 Songon balang do gamot-gamotmu, anjaha jurutulismu songon balang na marhulanan, na sogop bani tembok sanggah borgoh ni ari; tapi poltakkonsi mata ni ari habang ma; seng dong na mambotoh, ija hinan iananni.
18 Munduk-unduk do parmahanmu, ale raja ni Assur, tarpodom na sangap-sangapmu. Merap do bangsamu i dolog-dolog, ise pe lang na patumpuhon.
19 Seng hatambaran luhamu, parah do ugahmu. Sagala na mambogei baritamu martopap do halani ho. Ai ise ma na so ihonai hajahatonmu na so marhinggan ai?”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA