Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Cilakai anne kota rassia balle-balle siagang pammunoang; rassia barang-barang nirampasa’ yareka nialle passa.
2 Pilangngeri sa’ra ba’balaka siagang sa’ra galutturu’na rodaya, sa’ra bangkeng jaranga siagang goccanna karetaya.
3 Pasukang a’jaranga lompo sumanga’na maju a’bundu’, pa’dang accaya siagang poke accilla’. Tau matea takkulleami nibilang, attambung-tambung maya’na ke’nanga, sa’genna nato’ro sikamma tau a’jappaya.
4 Anjo Niniwe pasundalaka nihukkungi. Teai sipato’ angngonta’na kaga’ganna. Jaimi bansa le’ba’ napitabai, siagang nanyonyo’ naalle pa’mai’na.
5 Nakana Batara Kaminang Koasaya, "He Niniwe laKusessako! Kusungkei pakeannu ri dallekanna bansa-bansaya, sa’genna nacini’ ngaseng ke’nanga kodinu.
6 Kupare’ kammako apa-apa appakaringi’-ringika, Kusambilako apa-apa ra’masa’; Kuparekko paccini’-cinikang.
7 Napakabellai kalenna taua punna nacinikko na nakana, ‘Loro mami ammantang Niniwe! Inai todong angngagangi susa? Tena niakka ero’ assarei panynyaleori.’"
8 He Niniwe, maka bajikangngangko na Tebe, ibukotana Mesir? Pammantanganna Tebe anjoreng tonji ri biring binanga a’jaria salaku tembo’ pannahanna. Binanga Nil, iaminjo benteng pattahanganna.
9 Tebe ammarentai mae ri Sudan siagang Mesir, na koasana tena sanggana; Libia siagang Put naagangi sita’gala’.
10 Mingka manna nakamma, nijakkala’ tonji pandudu’na Tebe na niengka’ mange ri pammelakkanga. Ri sikontu panyingkulu’ aganga, niba’ji-ba’ji ana’-ana’na sa’genna mate. Sikamma tumalompona nirantei siagang rante siagang nibage-bagei ri tu antahangai.
11 He Niniwe, ikau pole latena todong nungngu’rangi napakamma nasa’ring. Nuusahai tongi sollannu ta’lappasa’ battu ri musu-musunnu.
12 Sikontu pattahangannu larapangi poko’ ara sannaka jaina rapponna ti’nokamo. Punna nige’goso’ anjo poko’na, latu’guruki rapponna ngaseng antama’ ri bawana tau eroka angkanrei.
13 Sikamma tantaranu lammai sangkamma baine, siagang pa’rasangannu tena sikali pakkullena andallekangi musua. Pepeka lanapammutungi sikamma balo’ panjolina pakke’bu’ lomponu.
14 Anynye’ro’ mako je’ne’ untu’ nupasadia lalang siapa sallonu nikurung, siagang pakkassakammi sikamma tembo’-tembo’ pattahangannu! Onjo’-onjokammi peoka untu’ appare’ batu eja, siagang pasadiami sikamma kataranna!
15 Manna apa nugaukang, tena bua’-bua’na, lanri lala’busukko akkanre yareka lamateko lalang bundu’. Lalanynyakko rapang wassele’ koko nikanre ri katimbang. A’bakka’ mako katambang jainu rapang katimbang!
16 Sikamma padanggannu la’biangngammi jaina na bintoenga ri langika! Mingka kamma-kamma anne lanynya’mi ke’nanga, rapang katimbang ampaka’rangi ka’nyi’na nampa lanynya’ anri’ba’.
17 Sikamma tumalomponu siagang pagawe pamarentanu rapangi lokoang katimbang accokkoa ri tembo’-temboka ri wattu dinginga. Mingka ri wattunna ammumbamo alloa, akkaro-karomi ke’nanga lanynya’ anri’ba’; tena manna sitau angngassengi angkana kemae lampana ke’nanga.
18 He karaenna pa’rasangang Asyur! Matemi sikamma guburnurnu, siagang sikamma bupatinu tinro tulusu’mi satunggu-tungguna. Ra’ya’nu tassia’-siara’mi ri moncong-monconga, natena manna sitau akkulle angngerangi ke’nanga ammotere’.
19 Bokka’nu takkulleai niballei, siagang loko’-loko’nu takkulleami pia. Sikontu tau allangngerekai kaancurannu attempa limami napakamma rannu. Nasaba’ sessa ngasemmi taua napakamma anjo kaja’dallannu kala’busanga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA