¹ Yesus kim Alap mo gola kon te soka, zere hon de ang ta gwen wenyik zep ahanik gubluka, “Bian Guru, emki sap hlaun. Alap mo gol yala an wehasa hom. Man tangan kwa nuk. Hen zeno kaso kong ta zahenna nwe awes tanganna!”
² Ki zep ding gulbluka, “Eiwa, emki gol yala ansa kara gun. Zeno kaso kong ta zahenna aha-en mae molya lwak. Zen tingan tangan sa dri nulsul.”
³ Yesus ki zep kon zere hon de ang ta gwen wenya ban zaitun tra nabare kwatap tek san dep goleyaing gwe seka. Zena nikirinkim Alap mo gola in san zep dangna gwe ine haka. Hwena dekam zep Petrus, Yakobus, Yohanis, hen Andreas mae golek de dazak– olsa de ze ze-en takensiblin hap.
⁴ Zao zep dakensiblik, “Asa en emki gubiridan: Alap mo gola insa dri yulsun hup gubiri, zen bawalkam sa ki lwal? Hen banakare owassa asa hla kul gwer? – dekam de anakan dam gulsun hupye, ‘Aumwa hap de yaklanak dep angkam man golek de gwe song gweꞌan.’”
⁵ Yesus ki zep ding gulzimki, “Salok-salokkam lowehe gwek. Emsa mana yasik da gwibirink.
⁶ Sap zini beya nik sa ebon mae onak anakan eboton gwe-gwezal, ‘Ëe an Zen– Yesusye.’ Hendep zen sa zini beya tangankam yasik da gwibir.
⁷ Em de anakan esane gwe-gwenkam, ‘Zewe man eeijaꞌan,’ hen anakan, ‘Awe hen sa eeijazal,’ hwena em dekam bahem eairi gwen. Sap zen nonol kirekam sa Alap mo dwam gwibin sin lwa gwer. Hwena dekam bahem ekil gil gwen, ‘An aumwa hap denak mes zaul, zep ki lwaꞌan.’
⁸ Aha zi ausu nakorena aha zi ausu naban sa eeija gwer, hen aha irik ginni aha irik gin niban sa eeija gwer. Lang yala an san jingili mam enkam sa tailida gwera, hen usak yala sa hatanda gwer. Zen kirekam sa karekna nonol lone sennak lwa gwer. Zen men kiye: We de jaha gwen hap eisbir anensa sewehe kininna. Zen dekon sa ki hendep sang-sangna dohonse gwe song gwer.
⁹ “Em terya-tyakam lowehe gwek. Sap emsa sa dahyo gwer, hen but srem gol-gol san sa emsa lup nulhal gwer. Zao sa emsa dangole gwibir. Hen emsa sa pemerinta mo teipsin-teipsin wenya kip anakan noletrei gwizim, ‘An hen ahana Yesus hon de ang gwe-gwenna.’ Hwena zen kirekam Alap mo dwam gwibin sin sa ki ebe mae hap lwa gwizim– em dikim ze abe hap denaka eton gwen hap.
¹⁰ An na-en molya tap gwek. Diki nonol tingare zi ausu hap sa engaya gwen hap de ol dawemsa nolzim halada gwer. Zen diki dekam sa aumwa hap denak zaul.
¹¹ Men dekam de emsa dahyo gweꞌak hen lup nulhal gweꞌak, em bahem anakare hap enlalana ebeya gwe-gwen, ‘Ëe banakarekam asa ze ding gulzim?’ Sap men kirekam de ding gul gwizimdin hip dena, zen emsa de taken-taken gweblan ennak sa ki Alap mo Enho ebe mae hap gol gwizimdi. Zen dekam em ding gul gwizimdin. Sap dekam Zen Alap mo Enho sa eno ek tihi san ding gul gwizimdi.
¹² Emsa sa tingare zini husus neibirida gwer, sap em an Asa de ang gwe-gweblan wenya. Zep a kirekam sa ebe mae hap lwa gwizim: Emsa ere mae mo aya-wal oso-wal tanganna sa tameran hap nolegu gwer. Hen emsa ere mae mo bi walya sa tameran hap nolegu gwer. Hen ere mae mo walasna sa emsa abe hap de jal hap noletobe gwe-gwer, hendep tameran hap sa hen emsa nolegu gwer. Hwena em in zene Asa de taibliblannak tatem ezauk gweꞌak, hendep aumwa hap denak de hataꞌak, em esa engaya gwer.
¹³ (13:12)
¹⁴ “Ëe ol tan-tanna ansae ebe mae hap golzimꞌin: Em esa teipsin zisi hla lal– Alapsa de lamang tan hap de karek yawalsa de Alap mo golak goltil zinnak, men kirekam orep Alap mo ol ayang gul gwen zini Daniel Bak gubiridakake. Zen dekam esa anakan tame ul, ‘Angkam aumwa hap de yaklanak man zauꞌun.’ Dekam Yerusalem mo langnak de zini em kwatap san dep eheya-hya gwek.” Hwena ee, Markus, ama Yesus mo ola in hap emsa gubiridaꞌan: Em in zen bukuna ansa aha zi hip baca ul gwizimk, dawem enkam srip ulsuk gwizimk. Yesus dekon anakan ayang gulku,
¹⁵ “Dekam zini men zen de gol homan nakon lowe heꞌak, zen bap zen etan gol mwa san ba maesa de gon hap biti gwehan.
¹⁶ Hen nganak de syal tandan wenya, zen bap zen etan gol sandep lwan dahan– baju sal-sal maesa de teisyan hapye.
¹⁷ Kwasang tol, we walya u nubare wenya, hen nama de walassa momkam taizi gwibin wenya. Zen tol banakan molya easendak.
¹⁸ Zep Alapsa anakan abe la gwek, ‘Karek yala in bap zen o dil gwennak jowen.’
¹⁹ Kirekam abe la gwek, sap Alap kim ngli naban okama naban yang sosuku, hendep serkam de karek yala an de jowenkam, kirekam de lang dohon-hon gwenna hom mae jowek. Hen zeno hyanak etan molya kirekam okamanak jowek.
²⁰ Hwena Alap man zere mo hlil irin zisi kwasang gwibiridaka, Zen zep anakan hamal hap guku, ‘Karek yawala in bap zen tangan holo gwen. Ki hwena zini kitak tangan sa juwer.’
²¹ “Dekam zi de anakan emsa gubiridanna, ‘Nesa de ngaya tabin hip de Zini men angkam awe gweꞌara,’ ahaksa, ‘Zewe gweꞌara,’ em bahem taiblibirida gwen.
²² Sap dekam yasik ta gwibin hip de zini beyakam sa yaing gwe-gwer, hen zen serkam de owas-owasna sa syal nei gwibir– anakan dikim emsa boton ta gwibin hip, ‘Ëe an Zen, emsa de ngaya tabin hip de Zi niye.’ Ahaksa anakan de emsa boton ta gwibin hip, ‘Ëe an Alap mo olsae ep ayang gulzimꞌin.’ Zep hendep Alap mo hlil irin zini hen desa de taiblibiridan hap sa hen ealp gwesil.
²³ Zep em terya-tyakam lowehe gwek. Zen in zebe kirekam de lwan sremnak hamal hap emsa tawa ta gubirin.”
²⁴ “Lang dohon-honna in kim de hya gwesiꞌik, zen hendep dekam sa ‘yakla nwena kawesili. Benna hen molya ngatan gwek.
²⁵ Hen keisni sa ngli nakon elan nahla gwera, hen nglinak de teipsin-teipsin dowla-dowala serkam sa eilman gwe nasen gwer.’
²⁶ Zen diki dekam sa ngatan zi mo lang nakore Zi Tanganna Asa but de zerati gwe zannak hla dase gul. Zen dekam asa ere mo soson naban ngatan yawala ban ziati gwezal.
²⁷ Ki asa hwena ere mo dam taha nakore zini lup gul soner– zen de ere mo hlil irin zisi tingan en tangan tagal gulsun hup, sap yakla hata sezan nakorena, hendep nikin anen nakorena, hendep eihya-lip eihya-lip nakorena.
²⁸ “Zep aumwa hap de yaklasa de dam gulsunnu, zen tenya deren nakon de langsa dam gulsun makan. Em kime tenya derenna anakan hla kul gwenan, ‘Man alsik, hen angkam man etan ala gweꞌan,’ zen dekame anakan tame ul gwenan, ‘Angkam sasa gwen hap ki lwaꞌan.’
²⁹ Zen hen kirekam, kirekam-kirekam karek yala insa kime hla kul gweꞌak, zen dekam esa anakan dam ulsuk gwer, ‘Angkam Alap Zen de kitak irik gilzin hap denak man zauꞌun!’
³⁰ Eiwa denakae emsa gubiridaꞌan: Em an zen okamanak lowe heꞌan, molye kitak juwek, zen dekam sa ki tingan lwal.
³¹ Ngli naban kama naban sa jek-jak ner. Hwena ano ola, zen hendep denaban sa lwa gwer.
³² “Hwena zini molya ngatan zi mo lang nakore Zi Tanganna ano lwa halzan hap dena anakan tame nuk, ‘Yaklana’ ahaksa ‘Jamna dekam sa hata zala.’ Alap mo dam taha nakore zini hen molya. Tane zem Aena home hen tame guꞌun. Zen diki tawana Bian Ze-en.
³³ Zen in zep salok-salokkam terya-tya naban Asa kara e gweblak. Sap ngatan zi mo lang nakore Zi Tanganna ano etan de lwa halzan hap de yaklana em molye tawa eblak.
³⁴ Zep zen mae mo kim lwaꞌan: San de kama bi nik de aha lang san holokam song gwenna. Zere hon de ebabu gwe-gwen zi hip maka syalsa anakan wei yul sone guzim haꞌara, ‘Em ano tim bwanak ansa syal gwe-gwibir.’ ‘Em wakinsa syal gwe-gwibir.’ Ora top san de kara gwe-gwen hap de zini, desa sa anakan gublula, ‘Em dawem enkam salok-salokkam asa kara gwe-gwebla.’
³⁵ Zep em hen kirekam salok-salokkam Asa kara e gweblak. Sap em molye anakan Asa tawa eblak, ‘Ano mae mo Teipsinni dekam sa etan hata zala. San ha kam-en? San ha ngirin tatem? San ha oho-bunggun nuban sa, ahaksa kak tangannak?’
³⁶ Anakan em ealp gwe-gwen, ‘Bap Zen asa ni truwennak hlauludazan!’
³⁷ Zep angkam en de Asa salblan wenya, em ensa home ki gubiridaꞌan. An hwena tingare zisie hamal hap gubiridaꞌan: Salok-salokkam em terya-tya naban Asa kara gwe-gweblan!”