Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ne'ena ge'ena 'o Habari ma Owa ma ngale ma Yesus Kristus, ma Jo'oungu ma Dutu wi Ngowaka.

² Ma Habari ma Owa ge'ena 'ikurue 'isoka ma Nabii Yesaya wosilefokau konee, "Ma Jo'oungu ma Dutu wongose, 'Nu'una to ngoi 'ai su-suloko; ngoi towisuloko 'una wosirano 'asa de ngona, la 'una wosikurue 'ani ngekomo.'

³ 'O nyawa moi naga 'o tonaka 'ika-kakasaka wosigaso-gasoko wongose 'ato, 'Niosikadiai ma Jou 'awi ngekomo, niosikaboooto ma Jou wi tapaki la waboa!'"

⁴ 'Isoka 'isilefokau gee, koge'enali mita 'o Yohanes woboano 'o tonaka 'ika-kakasaka. 'Una 'o nyawa waki'osiki de wositotara 'o habari ma Jo'oungu ma Dutuno. Wongose 'ato, "Salingou niomaogoro 'o sowono niodiai de salingou ni'osiki la ma Jo'oungu ma Dutu kowosi-singinawau 'ania so-sowono."

⁵ 'O Yudea ma nyawa de 'o Yerusalem ma kota moi yobootoka yotagi 'o Yohanes wi do-dotoko yosigisene. 'Ona yomangaku manga sowono de waki'osiki 'o Yordan ma 'akeroka.

⁶ 'O Yohanes 'awi baju 'o unta ma gogo, 'awi bulu 'o haewani ma kai, de 'awi 'inomo 'o kakasoso de 'o madu 'o bonganika.

⁷ 'Una wosidemo 'o habari ne'ena, "Dua ngoioka de wimoioli woboa, 'ifoloi woamoko ngaro de de ngoi ma. Ngoi ka 'awi tarupa ma gumini tomarukuku tasose ma koyadaenuwa.

⁸ Ngoi tinisi'osiki de 'o 'akere, ma 'una dua winisi'osiki de 'o Ngomasa 'Itebi-tebini."

⁹ Ma 'orasi ge'ena 'o Yesus woboa 'o Nazaretino 'o Galilea ma daeraano de 'o Yohanes wi'osiki 'o Yordan ma 'akeroka.

¹⁰ 'O Yesus waie womabaoro de wamake 'o diwanga 'ipelenga de ma Jo'oungu ma Dutu wi Ngomasa dakuuku widuguti 'isoka 'o pombo.

¹¹ Ge'enaka de yo'isene ma Jo'oungu ma Dutu wi 'ilingi, 'ingose 'ato, "Ngona to ngoi 'ai Ngowaka tonisiboso-bosono, ngona 'ai singina nasanangi."

¹² Kage'ena 'ipasa de ma Jo'oungu ma Dutu wi Ngomasa ge'ena wi'asakau 'o tonaka 'ika-kakasaka.

¹³ 'O wange nagi soatino 'una ge'enaka, 'o Tokata ma Koana witaili. 'O haewani kopapi-piarawa mita ge'enaka. De 'o mala'ekati wileleani.

¹⁴ Gee 'o Yohanes wibuika, 'o Yesus 'una wotagi 'o Galileaka de wositotara 'o Habari ma Owa ma Jo'oungu ma Dutuno ge'enaka doka.

¹⁵ Wongose 'ato, "Ma Jo'oungu ma Dutu wacobou wopareta. So niomaogoro 'o sowono niodiai de niolio ma Jo'oungu ma Dutuka, de niongaku 'o Habari ma Owaka gee ma Jo'oungu ma Dutuno!"

¹⁶ Gee 'o Yesus waboa 'o Galilea ma talaga ma batingino, de wakimake yosoma-soma yamididi ge'ena la 'o Simon de ma dodoto 'o Andreas 'o naoko yosoma ma gu-gudaioka ge'ena ma talagaka.

¹⁷ De 'o Yesus kawongosekau 'onaka, "Nou, nimoteke ngoi! Ngoi 'asa tinidotoko 'o nyawa niasoma."

¹⁸ Ge'enaka de ka manga soma yamada de yomoteokau 'o Yesusika.

¹⁹ 'O Yesus wogila-gilali de wakimake 'o riaka dodoto yamididioli, ge'ena la 'o Yakobus de 'o Yohanes 'o Zebedeus wi ngowa-ngowaka. 'Ona 'o ngo'otiri ma dodaka manga soma yosidiai ma gu-gudaioka.

²⁰ 'O Yesus kawoboa de waki'asokokau, de 'ona mita ka manga dea wimada 'o ngo'otiroka de mita gee yoma-manarama yakisewa-sewa go'ona, de yotagiokau 'o Yesus wimoteke.

²¹ 'O Yesus de wi do-domoteke 'o Kapernaum ma soanoka yototarika. Pomaoma-omasa ma Wangekali de 'o Yesus wowosama 'o lo-lomu ma woaka de wodotoko.

²² 'O nyawa yosigise-gisene gee yoherangi wodotoko ma jako. Sababu 'una wodotoko de ma kumatioka 'isoka 'o 'agamakawa yodoto-dotoko.

²³ Ma 'orasi ge'ena 'o nyawa wimoi witoka-tokata gee 'o lo-lomu ma woaka wowosamika, de woma'orese,

²⁴ "Ee Yesus, 'o Nazaretoka ma nyawa, minido'oau ngomino? Naino minitorouou? Ngoi toninako ngona nagu'una; ngona ge'ena ma Jo'oungu ma Dutu wi Su-suloko Notebi-tebini!"

²⁵ 'O Yesus wodorofu ma tokatika, "Nomariidi, nosupuoka 'o nyawaka nu'una!"

²⁶ So ma tokata ge'ena 'o nyawa gu'una wisikagiwi yakua-kuatino deika 'isupu 'unaka ma de 'ima'orese.

²⁷ 'O nyawa yoodumu kayoki-kiliri, so yomakadongose 'ato, "Tei, 'okia ne'ena? Ne'ena 'o do-dotoko ma sungi moi! De wi kumati de wi kuasa wasuloko 'o tokata 'isupu, de widomoteke!"

²⁸ So 'o Yesus wi habari 'isidagi ma japatioka 'ena 'o Galilea yasuluunukou.

²⁹ 'O Yesus woma'aiki 'o lo-lomu ma woaka ge'ena, de wotagi 'o Simon de 'o Andreas manga woaka. 'O Yakobus de 'o Yohanes mita yomasidatagi de de 'una.

³⁰ 'O Simon ma toroa 'o dangiroka moma'iduoka sababu migogamuku. So gee 'o Yesus de wi do-domoteke yowosanga ma woaka ge'ena, de 'o Yesusika yosidemo ma habari ge'ena.

³¹ So waika 'ami giamika wa'ao de womiriwo momomiki. So momomikie 'ena mi panyake 'i'aiokau so muna mita makileleani.

³² 'Itarusou de 'o nyawa yopa-panyake de 'o tokata yakido-dongosamuku yakikoki'asa 'o Yesusino.

³³ 'O nyawa rekeni 'iodumu ma kotaka ge'ena yomalomuno ma woa ge'ena ma bionino.

³⁴ Ge'enaka de 'o Yesus wosi'aiki to 'ona manga panyake 'ini-'inioka de woginiiki 'o tokata 'o gudai. 'Una kowosidabiwa 'o tokata ge'ena 'ibicara sababu 'ena mita yanako 'o Yesus 'una ge'ena ma kia.

³⁵ Ma wangede de 'o Yesus kawotarusoka wotagi 'o ngii 'irii-riidoka 'o kota ma dudunoka, ge'enaka doka wolahidoa.

³⁶ Ma 'o Simon de wi ma-manai wisidu'uru winonu.

³⁷ Gee wimakeno de yongoseu, "'O nyawa 'iodumu nirinonu 'Aba."

³⁸ Ma 'o Yesus kawosangokau, "Nou, nanga do-dagi posigila 'o kota 'iregu-reguka ne'enaka naga. Ngoi salingou todotoko ge'enaka naga mita, sababu ge'enau 'ai dumutu so taino ne'ena 'o duniano."

³⁹ Ge'enau so 'o Yesus wodakadagi 'o Galilea wakilolituku de wobobita 'o lo-lomu ma woa-woaka, de mita 'o tokata woginiiki.

⁴⁰ Wimoi wipado-pado waino 'o Yesusino, wotalibukuku de kawongosekau, "'Abae! Nako nomodeke, de 'ai panyake ne'ena nosi'aiki!"

⁴¹ 'O Yesus wi singina 'o nyawa gu'una so wi'ao de wongose 'ato, "Ngoi tomodeke, so ni panyake ge'ena 'i'aiki!"

⁴² Kage'ena ma 'orasi de wi pado ge'ena 'i'aiokau.

⁴³ Ge'enaka de 'o Yesus wosuloko wolio de wisibesesongo koneda,

⁴⁴ "Tonidongose, 'uwa nosikademo ka moika ma, duga 'o 'imamika notagi la noga'asoko ma 'imam wosiputusu 'ato ni pado 'i'aiokau. Ma ngale ge'ena 'ani sukuru nokula moteke 'o Musa wosulokokau ma nyo-nyata 'o nyawa-nyawaka 'ato ma gou-goungu 'ani pado 'i'aiokau."

⁴⁵ Ma 'o nyawa gu'una wotagika de wosikajarita kiaka naga bato 'okia naga 'idadiokau ge'ena, sigado 'o Yesus koidadiwau wowosama 'o kotaka kawomasitaiwangekou. 'Una ka 'o kota ma dudunokau 'o ngii 'irii-riidoka womanoa. Duga 'o nyawa kiano naga bato koitoa-toakuwa yaino 'unano.

Markus

Video Markus 1

Ikuti Kami:

KONTAK | PARTISIPASI | DONASI