Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Cilakama’ inakke! Rapanga’ tau cipuruka a’lampa mange angngattili’ rappo anggoro’ ri wattunna allalomo wattu rappoa. Tena rapponna poko’ rappo-rappoanga. Rappo anggoroka siagang rappo ara bajika la’busu’ kabusu’mi nialle.
2 Tau lambusuka lanynya’mi battu ri pa’rasanganga, tau majarreka tappa’na mae ri Allata’ala tenamo nibuntulu’. Tunggala’ taua massing attayangi kasampatang untu’ ammuno. Massing attannangi sikko’ untu’ paranna tau.
3 Para cara’deki a’gau’ ja’dala’. Pagawea siagang hakinga appalaki doe’ pacoco’, siagang pamimpinga napassakangi ero’na, kammami anjo batena ke’nanga assikongkolo’ ngaseng.
4 Manna kaminang bajika siagang kaminang lambusuka battu ri ke’nanga kontumi romang akkatinting tenaya matu-matunna. Narapi’mi wattunna Allata’ala anghukkungi umma’Na sangkamma le’baka Napappakaingakkang mae ri ke’nanga tete ri na’bi-na’bia. Kamma-kamma anne ammumbami karicuanga ri alla’na ke’nanga.
5 Teako tappakki mae ri singngampi’nu, teako tanjengi mae ri agannu. Tutuko lalang ri kana-kanannu manna pole nabainennuja allangngereki.
6 Nasaba’, ri wattu kammaya anne para anggota kaluarga massing lasimusu; ana’ bura’nea nahinai manggena, ana’ bainea naewai amma’na, siagang mintu bainea a’besereki siagang matoang bainena.
7 Mingka ikatte manrannuangki’ mae ri Batara; jarreki tappatta antayangi Allata’alata. LaNapilangngeri pappala’ doanta siagang Napasalamakki’.
8 Tena alasang mae ri musu-musunta untu’ rannu pa’mai’na lanri kaancuranta. Nasaba’ manna pole kitu’guru’, mingka lambangung poleangki’. Kamma-kamma anne niakki’ lalang ri sassanga, mingka laNasingariki’ Batara.
9 Doraka maki’ ri Batara, lanri kammana anjo musti nikasiaki pangngalarroinNa. Mingka tasalloami naNaalleiki’ siagang Nasareki’ kaadelang. LaNaerangki’ assulu’ mae ri singaraka; lanikasiaki kalenta angkanaya Ia ampasalamakki’.
10 Riolo nahinaki’ musua nakana, "Kemaeji anjo Batara, Allata’alanu?" Mingka kamma-kamma anne lanaciniki ke’nanga apa Nagaukanga Batara untu’ ikatte, siagang la’jari siri’-siri’mi ke’nanga. Laniciniki anjo musu-musunta nibeta siagang nionjo’-onjokang rapang peo’ ri aganga.
11 He Yerusalem! Narapi’mi wattunna nubangung ammotere’ tembo’-tembo’na kotanu. Anjo alloa lanipakaluaraki daeranu.
12 Sikamma taunnu lammotereki mae ri kau battu ri kere-keremae: battu raya ri Asyur, battu timboro’ ri Mesir, battu ri daera Binanga Efrat, battu ri ba’leang tamparang siagang battu ri bulu’-bulu’ bellaya.
13 Mingka buttaya la’jari kalotoroki lanri kaja’dallanna pandudu’na.
14 O Batara, Kikalawaki laloi ummatTa, iamintu umma’ nipileTa. Ammantangi ke’nanga bella ri parang lompoa, ri tangnga-tangngana butta copponga. Lappassammi ke’nanga anggappa kanre ri parang ruku’na Basan siagang ri Gilead sangkamma jammang riolo.
15 Appa’nia’ maKi’ gau’ malompo untu’ ikambe, o Batara, sangkamma le’baka Kigaukang riolo ri wattunna Kierang ikambe assulu’ battu ri Mesir.
16 Lanaciniki bansa-bansaya anjo passalaka siagang a’jari siri’-siri’ lanri nasadarina angkanaya sikontu kagassinganna ke’nanga tena anggaranna. Latakkaluppai ke’nanga sa’genna takkulleamo a’bicara yareka allangngere’.
17 Lakkaloloki ke’nanga ri buttaya rapang ulara’. Mallaki siagang annekkereki ke’nanga lassulu’ battu ri pattahanganna ke’nanga, nampa battu mae ri Katte, o Karaeng Allata’alana ikambe.
18 Tena Allata’ala sangkammanTa, o Batara, ampammopporangai dosana umma’ nipileNa niaka tassesa. Tena Kituli lalarro; kabalekanna, sannangi nyawaTa ampappicinikangi pangngainTa tenaya sanggana.
19 LamangngamaseangKi’ pole mae ri kambe siagang Kipammopporangi ikambe. LaKionjo’-onjokangi dosa-dosana ikambe nampa Kipasambila antama ri rawanganna tamparanga!
20 Mae ri ummatTa, iamintu jari-jarina Abraham siagang Yakub, laKipappicinikangi majarretTa siagang pangngainTa tenaya sanggana sangkamma Kipa’janjianga mae ri boe-boena ikambe battu riolo dudu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA