Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Palang sengko’ reya! Sengko’ reya akantha oreng kalaparan se entar molonga buwa saellana lebat mosem. La tadha’ wa’-buwa’an e ka’-bungka’an. Buwana anggur ban buwana ara se gus-bagus la tadha’ epetthek kabbi.
2 La tadha’ oreng se jujur e nagara reya, la ta’ nemmo pole oreng se esto ka Allah. Saneyap oreng nyare kasempadan mateyana oreng laen. Kabbi padha masang jebbak kaangguy sasamana.
3 Kabbi padha penter alako jahat. Pangraja ban hakim menta pesse sogo’, ban pamimpin masarakat maksa’agi karebba, daddi reng-oreng jareya asakongkel kabbi.
4 Se paleng becce’ ban se paleng jujur e antarana reng-oreng jareya akantha ombut se bannya’ dhurina se tadha’ gunana. La napa’ baktona Allah ngokom ommadda akantha se la epaenga’ ka reng-oreng jareya kalaban parantara’anna para nabbina. Sateya e antarana reng-oreng jareya la salbut kabadha’anna.
5 Ba’na ja’ parcaja ka tatanggana, ja’ nyandhar ka kancana. Pate-ngate acaca maske se ngedhingngagi jareya binena ba’na sakale.
6 Sabab, e jaman se kantha reya saessena bengko saleng amosowan: ana’ lalake’an ya-nyeya eppa’na, ana’ babine’an alaban ka ebuna, dineng manto bine’ atokar ban mattowa bine’na.
7 Tape sengko’ ban ba’na apangarep ka PANGERAN; kalaban kayakinan se raja sengko’ ban ba’na anante’ Allah. Salerana bakal aparenga salamet ban bakal meyarsa’a du’ana sengko’ ban ba’na.
8 So-mosona sengko’ ban ba’na ta’ andhi’ alasan kaangguy anga-bunga polana sengko’ ban ba’na la ancor. Sabab maske sengko’ ban ba’na la gaggar, bakal jaga’a pole. Sateya sengko’ ban ba’na badha e pettengnga, tape bi’ PANGERAN bakal etera’ana.
9 Sengko’ ban ba’na la dusa ka PANGERAN, daddi sateya kodu arassa’agi dadukanna. Tape sakejja’ aggi’ Salerana tanto apareng partolongan ban apareng kaadilan ka sengko’ ban ba’na. Sengko’ ban ba’na bakal ebakta’a Salerana ka tera’na; bakal ngalamana dibi’ ja’ Salerana masalamet sengko’ ban ba’na reya.
10 Lamba’ moso ya-nyeya sengko’ ban ba’na kalaban ngoca’, "Badha e dhimma PANGERAN, Allahna ba’na jarowa?" Tape sateya so-moso jareya bakal nangaleyana apa se elampa’agi PANGERAN ka sengko’ ban ba’na, ban reng-oreng jareya bakal malowa. Sengko’ bakal nangaleyana so-moso epakala ban enyek-enyek akantha cellot e lorong.
11 He, Yerusalim! La napa’ baktona ba’na maddek pole dhung-geddhungnga kotthana. E are jareya dhaerana ba’na bakal epalebara.
12 Reng-orengnga ba’na bakal abaliya ka ba’na dhari man-dhimman — dhari Asyur e bagiyan temor, dhari Messer e bagiyan lao’, dhari dhaera Songay Efrat, dhari kennengngan se ngalebadi tase’ raja ban dhari nong-gunong se jau.
13 Tape bume reya bakal kajala polana kajahadanna orengnga.
14 Adhu GUSTE, kasokana Junandalem ngowan ommadda, ommat peleyannepon Junandalem ka’dhinto. Ommattepon Junandalem ka’dhinto tapesa dhari oreng bannya’, enneng e alas raja, e tengnga’anna tana se landhu. Edine ommattepon Junandalem ka’dhinto nyare teddha e talon Basyan sareng e Gileyad akadi gi’ jaman dhimen.
15 Ngereng pabadha’agi kaajiban kaangguy abdidalem sadaja, GUSTE, akadi se elampa’agi Junandalem gi’ dhimen e bakto Junandalem abakta abdidalem sadaja kalowar dhari Messer.
16 Sa-bangsa bakal nengalana gapaneka sareng arassa malo amarga apangrasa ja’ sadajana kakowadannepon aba’na tadha’ artena sakale. Sa-bangsa gapaneka bakal kaelangana akkal kantos ta’ kengeng acaca otaba merengngagi.
17 Sa-bangsa gapaneka bakal arangka’a e tana akadi olar. Kalaban tako’ sareng ngetter reng-oreng gapaneka bakal kalowara dhari partahanannepon, pas nyander ka Junandalem, GUSTE Allah, Pangeran kaula.
18 Tadha’ Allah se akadi Junandalem, GUSTE, se nyapora dusana re-karena ommat peleyannepon Junandalem se gi’ odhi’ ka’dhinto; Junandalem duka ta’ salanjangnga; sabalikkepon, Junandalem lebur noduwagi kataresna’annepon Junandalem se tadha’ batessa.
19 Junandalem bakal bellasa pole sareng bakal nyapora abdidalem sadaja. Sa-dusa abdidalem sadaja sareng Junandalem bakal enyek-enyegga sareng epelpallagiya ka dhasarra tase’!
20 Ka ommattepon Junandalem, na’ potoepon Ibrahim sareng Yakub, Junandalem bakal noduwagiya kaestowan sareng kataresna’an se tadha’ batessa gapaneka akadi se ejanjiyagi Junandalem ka bangatowa abdidalem sadaja.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA