Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pilangngeri tuduhanNa Batara mae ri Israel. Ammenteng maKi’, o Batara, Kipamajumi tuduhanTa! Lappassammi nalangngere’ monconga siagang buluka apa eroka Kipau.
2 He sikamma monconga, he sikamma lappara’na buttaya, pilangngeri tuduhanNa Batara! Nia’ parkaraNa siagang Israel umma’Na siagang laNatuntuki ke’nanga.
3 Nakana Batara, "He ummakKu, apa le’ba’ Kugaukang mae ri kau ngaseng? Ri passala’ apa naKususaiko? PialiMa’!
4 Le’ba’ mako Kuerang assulu’ battu ri butta Mesir, siagang Kulappassangko battu ri nipareka ata; le’ba’mi Kusuro Musa, Harun, siagang Miryam untu’ ampimpingko.
5 He ummakKu, u’rangi apa narancanakanga Balak karaeng Moab mae ri kau, siagang apa papialinna Bileam ana’na Beor mae ri ia. U’rangi apa kajarianga ri pa’jappannu ri alla’na pakkemaannu ri Sitim siagang Gilgal. Punna nuu’rangi ngasengi anjo sikammaya, lanusadarimi apa le’baka Kugaukang untu’ ampasalamakko."
6 Apaka musti nipassareang mae ri Batara, Allata’ala ri suruga, punna battuki’ mange anynyomba ri Ia? Mustika angngerangki’ sapi rungka kaminang bajika untu’ nipassareang salaku koro’bang nitunu mae ri Ia?
7 Apaka lasannangi Batara punna angngerangki’ mae ri Ia assa’bu-sa’bu gimbala’ yareka alla’bi-la’bi minynya’ zaitun? Mustika nipassareangi mae ri Ia ana’ bungasatta salaku pannangkasi mae ri dosa-dosata?
8 Tena! Le’ba’mi Napa’nyata Batara mae ri katte apa bajika. Ia Natuntuka battu ri katte iamintu sollanta a’gau’ adele’, tuli nigaukangi mangngamaseanga, siagang nipakatuna tallasatta asse’re mae ri Allata’alata.
9 Sanna’ baji’na punna mallakki’ mae ri Batara. Akkioki mae ri pandudu’na kotaya Nakana, "Pilangngeri, he ikau ngaseng niaka a’rappung ri kotaya!
10 Ri balla’na sikamma tau ja’dalaka nia’ barang-barang wassele’ pannipuang. Ammakei ke’nanga pa’baku’ tenaya natojeng, iamintu panggaukang Kukabirisia. Inai-nai tau anggaukangi anjo kammaya laKuhukkungi.
11 Maka laKupammopporangi tau ammakea timbangang sala?
12 Tu kalumanynyanga ri kotanu najallakkangi tu kasi-asia, siagang ikau paballe-balle ngasengko.
13 Kamma-kamma anne appakkaramulaMa’ annunrung siagang angngancuru’ lanri dosa-dosanu ngaseng.
14 Langnganreko, mingka talabassorako — ba’lalo tuli cipuru’nu. Langngengkakko barang-barang, mingka takkulleako ampakaamangi. Apa-apa mamo nupakaamanga laKuancuruki lalang pa’bundukang.
15 Lappakiorokko gandung, mingka takkulleai lanugappa wassele’na. Lapparekko minynya’ battu ri rappo zaitun, mingka takkulleai nupake minynya’na. Lammaccokko je’ne’ anggoro’, mingka talanuinungai je’ne’na.
16 Yangasenna anjo kammaya kajariangi lanri nuturukinna panggaukang-panggaukang ja’dala’na Karaeng Omri siagang ana’na, iamintu Karaeng Ahab. Nupinawangi cara-carana ke’nanga. Lanri kammana anjo laKuancuru’ ngasengko, siagang lanicau-cauko kammayatompa lanihinako ri sikontu bansaya."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA