Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Begikenlah pengadun TUHAN kerna Israel. Tedisken, o TUHAN, turiken PengadunNdu; berelah deleng-deleng ras uruk-uruk ndengkehken kai si IkatakenNdu.
2 O deleng-deleng, o palas doni si paguh, begikenlah pengadun TUHAN! Lit pengadun TUHAN kerna BangsaNa. Atena erpekara ras Israel.
3 Nina TUHAN, "O bangsangKu, kai kin si nggo Kubahan man bandu? Kuga maka Aku jadi babanndu si mberat? Jabaplah Aku.
4 Kubaba kam ndarat i Mesir nari; Kupulahi kam i bas perbudaken nari; Kusuruh Musa, Harun, ras Miriam naruhken kam.
5 O bangsangKu, ingetlah kai sura-sura Balak, raja Moap, man bandu, janah kuga Bilham anak Beor njabapsa. Ingetlah kai sijadi i bas perdalanenndu mulai i Sitim nari seh ku Gilgal. Adi iingetndu kerina si e, tentu iangkandu maka kerina perbahanenKu eme lako engkelini kam."
6 Kai ndia kubaba man TUHAN, Dibata nu langit, adi reh aku nembah man BaNa? Kubaba ndia lembu si mejilena jadi persembahen tutungen.
7 Meriah nge ndia ukur TUHAN adi kupersembahken man BaNa meribu-ribu biri-biri tah pe minak saitun si maler la erpeltep-peltep desken sepuluh ribu lau belin? Entahsa kupersembahken ndia anakku sintua dilaki jadi penebus dosa-dosangku?
8 Lang! TUHAN nggo nuriken man banta kai si mehuli. Si ipindo Dibata i bas kita nari eme kap, ngelakoken kai si bujur, encidahken kekelengen si tetap, dingen nggeluh alu ukur meteruk rembak ras Dibatanta.
9 Kalak pentar kap si mbiar man TUHAN. Erlebuh TUHAN man kota e, "Begiken, o kam si pulung i bas kota!
10 I bas rumah kalak jahat pulung erta-erta si idatca alu dalan si la bujur. Ipakena sibar-sibar palsu, barang si ciga ateKu.
11 Kuga banci Kualemi kalak si make timbangen palsu ras anak timbangen si la payo?
12 Kalak bayak nindas kalak musil, janah kerina kam perbual janah penipu.
13 Dage nggo Kubenaken ngeradasken ras engkernepken kam erkite-kiteken dosandu.
14 Aminna man pe kam lalap kam la besur; janah melihe denga nge kam. Iangkutndu barang-barangndu, tapi labo kam ngasup engkelinisa; kasa kai si nggo isimpanndu Kukernepken i bas perang.
15 Merdang kam, tapi la kam si peranisa. Iperehindu gia buah saitun muat minakna, tapi la ndigan pe terpakendu. Ibahanndu anggur, tapi la ndigan pe iinemndu.
16 Si enda jadi erkiteken iusihndu kejahaten si ilakoken Raja Omri ras anakna Raja Ahap. Perukurenna iteruskenndu, emaka Kubaba kam kempak kebenen, janah kerina kalak megombang man bandu. Kerina bangsa i japa pe mecekurak man bandu."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA