Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ I bas wari-wari si reh pagi, deleng ingan Rumah Pertoton e pajek, eme deleng si meganjangna kal ganjangen asa kerina uruk-uruk. Bangsa-bangsa reh erdemuyung ku je,

² janah nina bangsa-bangsa E "Nangkenglah kita ku Deleng TUHAN ku Rumah Pertoton Dibata nu Israel. Kai AteNa sibahan, IajarkenNa me banta; arah dalan si nggo IpilihNa erdalan me kita. Sabap pengajaren TUHAN i Jerusalem nari kap rehna, i Sion nari, ngerana Ia."

³ Perjengilen sapih bangsa-bangsa IdungiNa, subuk bangsa-bangsa si megegeh, si ndeher tah ndauh pe ia. Emaka itepa kalak me pedangna jadi gigi tenggala, janah lembing jadi sabi-sabi ibahanna. Lanai ndigan pe bangsa erperang ras bangsa lanai ndigan pe taktik perang ipelajarina.

⁴ Kerina kalak nggeluh alu dame sekalak-sekalak kundul i teruh batang anggur ras batang arana jine; janah la ise pe erbahanca ia mbiar. TUHAN si Mada Kuasa nggo erpadan si enda.

⁵ Tiap bangsa nembah alu patuh man dibatana jine, tapi kita nembah alu patuh man TUHAN Dibatanta rasa lalap seh rasa lalap.

⁶ Nina Tuhan "Nandangi seh me paksana Kupepulung kerina kalak si nggo Kuukum, kalak si nggo ngenanami kiniseran i pembuangen.

⁷ Ia nggo cempang dingen terbuang, tapi si tading Kubahan pemenan si mbaru, emaka jadi bangsa si mbelin denggo ia. Aku jadi rajana i Deleng Sion mulai i bas paksa e nari seh rasa lalap."

⁸ Janah kam, o Jerusalem, ingan Dibata njagai BangsaNa desken sekalak permakan, mulihken ka pagi sekali nari jadi ibu kuta kerajanndu nai.

⁹ Engkai maka kam nderkuh bage gangna? Engkai maka mesui akapndu desken diberu si nandangi mupus? Perban lanai lit rajandu? Entah erkiteken nggo mate penasehatndu?

¹⁰ Nungkalisi dingen ndeherenglah kam, o kalak Jerusalem, bali ras diberu si nandangi mupus, erkiteken genduari terpaksa kam lawes i bas kota e nari jenari ringan i tengah mbalmbal. Terpaksa kam lawes ku Babilon, tapi ikelini TUHAN me kam i je i bas musuh-musuhndu nari.

¹¹ Melala bangsa-bangsa si nggo pulung lako merangi kam. Nina, "Jerusalem arus ikernepken! Sinehen me kuta e radas!"

¹² Tapi bangsa-bangsa e la ietehna kuga perukuren TUHAN. La ietehna maka ia kerina nggo ipepulung guna iukum, bali ras gandum ierik.

¹³ Nina TUHAN, "O kalak Jerusalem, to ukum musuhndu! Kubahan kam megegeh bagi jenggi lembu; tandukna besi, janah cekilina tembaga. Iripukkenndu melala bangsa, janah kebayaken bekasna ngerampok ipersembahenndu man bangKu, TUHAN nu kerina doni."

Mikha

Video Mikha 4

Ikuti Kami:

KONTAK | PARTISIPASI | DONASI