Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E budhi are gumo’, kennengnganna Padalemman Socce, bakal daddiya gumo’ se paleng tenggi ngongkole mo’-gumo’ ban nong-gunong laenna. Sa-bangsa anyo-ronyo entara ka jadhiya

² kabbi padha ngoca’a cara reya, "Mara ja’ ongga’a ka gumo’na PANGERAN ka Padalemmanna Allahna Isra’il! Salerana ngajarragiya pa-apa se kodu elakone sengko’ ban ba’na. Sengko’ ban ba’na noro’agiya jalanna sabab pangajaranna PANGERAN dhateng dhari Yerusalim; dhari Siyon Salerana abu-dhabu ka ommadda."

³ Pangeran motosana parkara e antarana sa-bangsa, e antarana ra-nagara se kowat, se jau ban bariya keya se semma’. Sa-bangsa jareya bakal nempa’a dhang-peddhangnga epadaddi salaga ban bak-tombagga epadaddi ladding panyokor. Sa-bangsa jareya ta’ saleng nyerrang pole, ban ta’ aya-sadhiya entara aperrang.

⁴ Reng-oreng bakal padha’a odhi’ aman ban taremtem e tengngana kebbun anggur ban kebbun arana; tadha’ se ko’-nako’ana aba’na pole, jareya janjina PANGERAN Se Mahakobasa.

⁵ Saneyap bangsa e attassa bume nyemba ban ta’at ka dibana dibi’. Tape sengko’ ban ba’na ta’ada ka Guste Allah, nyemba’a Salerana salanjangnga.

⁶ PANGERAN adhabu, "Bakal napa’a baktona Sengko’ makompola reng-oreng se eokom bi’ Sengko’, iya reya reng-oreng se odhi’ nyangsara e pambuwangan.

⁷ Reng-oreng jareya la epaempon ban jau dhari kampongnga. Tape dhari karena reng-oreng se gi’ odhi’ Sengko’ amola’ana settong katoronan se anyar. Reng-oreng jareya bakal daddiya bangsa se raja ban kowat. Sengko’ marenta’a reng-oreng jareya e Gumo’ Siyon salanjangnga."

⁸ Ban ba’na Yerusalim, se daddi kalenggiyanna Allah kaangguy ajaga ommadda akantha tokang ngowan se ajaga ba-dumbana, ba’na bakal daddiya ibu kotthana karaja’anna ba’na pole akantha dha’-adha’na.

⁹ Arapa ba’na me’ nanges ce’ kajana? Arapa ba’na me’ nanggung kasangsara’an akantha babine’ se rembi’a? Apa polana ba’na ta’ andhi’ rato, ban panasehadda ba’na la padha mate?

¹⁰ He pandhudhu’ Yerusalim, mara ba’na akaleya’ ban ngadhudhu akantha babine’ se parappa’na rembi’a. Sabab sateya ba’na kodu ngalle dhari kottha ban enneng e talon. Ba’na kodu entar ka Babil, tape e dhissa’ ba’na bi’ PANGERAN eocola dhari so-mosona.

¹¹ Bannya’ bangsa la akompol nyerranga ba’na, he Yerusalim! Ca’na so-mosona ba’na jareya, "Yerusalim kodu epaancor! Sengko’ bakal nangaleyana kottha jareya daddi jur-gujuran!"

¹² Tape sa-bangsa jareya ta’ tao apa se elampa’agiya PANGERAN. Reng-oreng jareya ta’ apangrasa ja’ aba’na bi’ Pangeran la epakompol polana eokoma, akantha gandum se epakompol egebba’a.

¹³ Pangeran adhabu, "He pandhudhu’ Yerusalim, kassa’ ba’na entar enyek-enyek so-mosona! Ba’na bi’ Sengko’ epakowada akantha sape se atandhu’ besse ban akoko dimbaga. Ba’na bakal maancora bangsa sabannya’na, ban dhi’-andhi’na reng-oreng jareya se ekaolle dhari hasella rampasan bi’ ba’na bakal eatorragiya ka Sengko’, Pangeranna alam dunnya."

Mikha

Video Mikha 4

Ikuti Kami:

KONTAK | PARTISIPASI | DONASI