¹ Hari Sabat hyanak, kak tangannak zep we darena song ek– Magdala kore wenya Maria bose apde zem Maria han, Yesussu de drenen kaso hula insa de etan hla kun hip.
² Hwena Alap mo dam taha nakore zini kim ngatan zi mo lang nakon ati gwe zaka, jingil yala dekam zep hendep gweka. Hwena dam taha nakore zini in zep drenen kaso lilikinni insa irhi gul zuka. Zena hwena zao zep nikin aneꞌanka.
³ Zeno nwe-masena san de ngli angna kiye, hen zeno bajuna ngap-ngap tanganna– but ngap-ngapna kiye.
⁴ Jana nabare zini in zen kaso hula insa kara nuꞌik, karekkam airin hip eyal-yal gwek, hendep tok-tok makan zep ze altink.
⁵ Hwena Alap mo dam taha nakore zini in ki zep wenya insa guzimki, “Bahem airin. Em an Yesussue leblaꞌan zala– te-lidak sonnak insa makan da inkke.
⁶ Zen awe hom. Bian Alap mes tin nikon ngaya tala– men kirekam Yesus Zena hamal hap emsa gubirida guk gwekake. Haen, emki sap hla kulzin– men zao sap nen nekke.
⁷ Nabakam emki olahan. Zebon de ang ta gwen wenya anakan enbirida, ‘Zen mes ngaya gwera. Angkam Zen mes emsa Galilea san dep ngeirbiridala. Em zao esa ertower.’ In sya. Asa Alap zer sone zala– ebe mae hap de kirekam ayang gulzimdin hip.”
⁸ Dekam zep we darena in nabalba enkam olahak. Zen man sap airiꞌak, hwena dawemkam hen isrip-sri eꞌak. Hlu kenkam zep song eꞌak– dekam de nabakam Yesus zere hon de ang ta gwen wenya insa enbiridan hap.
⁹ Hwena kim song eꞌak, zao zep mumuk ennak Yesus Zenaka zertreizimki. Zen kim anakan guzimki, “Dawem,” dekam zep hendep golek de lazak. Zao zep hendep bokle kom osoblan naban tanana babang osoblazak, deban isrip-sri eblaꞌak.
¹⁰ Hwena man guzimki, “Bahem airin. Hwena ano oso walkam de gubirida gwen wenyaka em anakan enbiridan– zen deka Galilea san sek gwek. Zen zao sa Asa nertower.”
¹¹ We darena in kim song eꞌak, hwena jana nabare zini in zen drenen kaso hula insa kara nuꞌik, zebon mae onakon ahakore nik zep lwan dahak– zen de Alap mo golak de syal tan zi mo mam-mamna insa gubiridan hap, kitak in zen ki ze jowekke.
¹² Alap mo golak de mam-mam wenya in dekam zep Yahudi mo nol-nola ban ola aha-en nuk– dekam de jana nabare zini in hap te-alasa mam enkam zerzimdin hip.
¹³ Zao zep nenbiridak, “Em anakan egu gwek: ‘Zen zere hon de ang ta gwen wenyik Yesus mo tokna sowekam nerhak– ee kime truwe guk hakke.’
¹⁴ Hwena gubernor de emsa ni truwenkam salbirdankam, zen ee asa deban dawem enkam eraisil gwer– emsa de kire hap karek tabin srem hapye.”
¹⁵ Hendep jana nabare zini in zep Yesus mo ngaya gwen ola insa dikim ber-ber gun hup de te-alana insa neirink. Hendep Yahudi zini anakare olsa zep nol halasenk, “Zen eiwa zere hon de ang ta gwen wenyik kam sowekam nerhak.” Hendep angkam mae kirekam zep egu gwenan.
¹⁶ Seblaskam de zere hon de ang ta gwen wenya ee dekam zebe Galileak de kwatapna in san dep sek gwek– men kirekam Yesus Zena asa gubirida gwekake.
¹⁷ Zao kime Yesussu hla laꞌak, zao zebe bokle kom tablan naban isrip-sri eblak. Hwena abon mae onakon aha korenak anakare enlala hatazimki, “An san ha auna?”
¹⁸ Hwena Yesus dekam zep asa golek de tabir zika, zao zep asa gubiridaka, “Tingare sosonna ngatan zi mo langnak dena hen auhu-kamanak dena, Bian mes abe hap kitak tapbla gulbluka.
¹⁹ Zen in zep tingare lang san em sek gwen, zewe kitak de zi ausuna Asa de ang gweblan hap titi labir song gwek, deban baptis la gwibik– ere mo Bian mo bosekam, Tane zem ano bosekam, hen Alap mo Enho mo bosekam.
²⁰ Men desae emsa desan de ang tan hap titi ta gwibik, em hen desan de kitak ang tan hap tawa la gwibik. Hen emki ansa enlala gwe-gwibin: Aena asa emsa yakla jamkam kara tabirida gwer– hendep aumwa hap de yaklanak de zauꞌuk.”