¹ “Zep Ëe kime Alap Zen de irik gin hip denaban golhataꞌanzak, zen gulk sun de ol blaoranna an kirekam sa lwal: San de sepulukam de kwalbasa de we oto gulblun hap de zisi pelita ngatan naban hut tu ane gun hup de ehohle gwenna. Zen pelitana sren-srenkam deirensik.
² Hwena sepulukam de kwalbasana in, aha-ere taha-tapkam enlala joblo-topna, hen aha-ere taha-tapkam enlala blala.
³ Sap enlala joblo-top wenya in, zen pelita dang ennak dena kim sek gwek. Tap gwennak de etan yuren hap dena hom kap dak.
⁴ Enlala blal wenya in zen en man minyakna hen kap dak– pelita dangnak dinik de tap gwennak de etan yuren hap denaye.
⁵ Hwena we oto gulblun hap de zini in na-en hom hata zaka. Kwalbasana in zen nesblak zep hendep nwe-alk hap truwek.
⁶ Hwena ngirin tatem zep takeranna te sok, ‘Angkam man hataꞌara– we oto gulblun hap de zi niye! Haen, nen angkam hut tu ane gun.’
⁷ “Sepulukam de kwalbasana in ki zep luk tak, hendep pelita-pelita zemka ki zep ototo dabiꞌik, hen ki zep tom-tom dak.
⁸ Hwena enlala joblo-top wenya in ki zep enlala blal wenya insa nenbiridak, ‘Abe mae hap em tol minyaksa betek enkam hle-hle tazimdin, sap ano mae mo pelita-pelitana tinsin hip ealp gwesiꞌin.’
⁹ “Zen hwena man ding nulzimk, ‘Bejene, ki hwena ere mae mo hen molya esowehek. Amki toko san sek gwek– te-alakam de ze teyisin hip.’
¹⁰ “Hwena enlala joblo-top wenya in kim toko san minyak teyisin hip sek gweꞌak, we oto gulblun hap de zini in ki zep hata zaka. Enlala blal wenya in zen ehohle gwek, desa en dekam zep we oto gulblun hap de zini in tembane yawala iwe dep golebiti gweka. Lilikinni hen dekam zep nayalsikink.
¹¹ Enlala joblo-top wenya in kim etan yaing gwezak, dekam zep sap etaken gweꞌak, ‘Bian, bian, abe mae hap em lilikinsi talusuzimdin.’
¹² “Hwena zen man ding gulzimki, ‘Eiwa denakae emsa gubiridaꞌan: Ëe home emsa tame tabiꞌin.’
¹³ “Ëe in zebe hwena emsa gubiridaꞌan: Salok-salokkam em lowehe gwen. Sap ngatan zi mo lang nakore Zi Tanganna ano etan de lwa halzan hap de yaklana em molye tawa eblak.”
¹⁴ “Zep ano lwa halzan hap dena, zen hen gulk sun de ol blaoranna an kirekam sa lwal: Te-ala beya zini man aha lang san dep holokam de ze gwen hap song gweka. Nonol zere hon de babu gwen zisi zep gu sonebiridaka– zebe mae hap de zere mo kire-kiresa hli tanda guzimhan hap, zen de dekam zere mo timbwanak te-alasa mam tablan hap syal tan hap.
¹⁵ Te-ala beya zini in hon men zen ebabu gwek, zebon mae onakon dan-ahan en anakan dam tasibirki, ‘An syal-syal tanganna zen,’ ahaksa, ‘An hen kire tola.’ Zen zep sren-srenkam zebe mae hap kap ta guzim halka. Ahana kip emaskam de te-ala yuna aha-ere taha-tap enkam kap tablaka. Ahana kip yuna dan-dan teisyablaka. Hen ahana kip aha-ere yukam zerblaka. Zena ki zep song gweka.
¹⁶ “In zebe hap emaskam de te-alana aha-ere taha-tapkam de yukam kap tablaka, zen hendep dekam zep te-alana inkam kire-kiresa lirak ta gwibirki, hendep dekam aha-ere taha-tap yukam zep etan mas soka.
¹⁷ In zebe hap dare yukam hen teisyablaka, zen hen kirekam kim syal gweka, dekam etan dare yukam zep mas soka.
¹⁸ Hwena in zebe hap aha-ere yukam zerblaka, zen kamasa hul gulku, zao zep te-alana insa aning taka.
¹⁹ “Lamkam kim zi yala in etan lwahal zaka, dekam zep etan te-alana insa de apdenak ziaitblin hap gu sonebiridaka.
²⁰ Aha-ere taha-tapkam de yukam men zebe hap hli tablaka, zen ki zep sepulukam de yukam kap tabla zaka. Zao zep gubluka, ‘Bian, em sap aha-ere taha-tap yukame abe hap hli tablaka. Hwena emki hla tan. Ëe kime dekam syal gwe-gwek, etan yuna aha-ere taha-tapkame mas sok.’
²¹ Zi yala in ki zep ding gulbluka, ‘In airis tangan! Em an abon de babu gwen zini dawem tanganna hen taibliblanna. Em mese betekkam de zerblanna insa dawemkam irik taka, zep ee asa etan ebe hap mam tangankam zerblal. Zep ano irik gilzin hap de tembane yawalak awe emki tilzin– ano alp nakon de hen isrip-sri gwe-gwen hap.’
²² “Ki zep hen in zebe hap dare yukam teisyablaka hen hata zaka. Ki zep gubluka, ‘Bian, em sap abe hap dare yukame hli soblaka. Hwena emki sap aken. Ëe hwena dekam dare yukame etan mas sok.’
²³ Zi yala in dekam zep ding gulbluka, ‘In airis tangan! Em an abon de babu gwen zini dawem tanganna hen taibliblanna. Em mese betekkam de zerblanna insa dawemkam irik taka, zep ee asa etan ebe hap mam tangankam zerblal. Zep ano irik gilzin hap de tembane yawalak awe emki tilzin– ano alp nakon de hen isrip-sri gwe-gwen hap.’
²⁴ “Ki zep hen men zebe hap aha-ere yukam hli tablaka hen hata zaka. Ki zep gubluka, ‘Bian, ee mese emsa tame tak. Em in jal-jal enkame irik gil gwenda. Sap em in ere en mo eiyas gin nikore ei nika home tan gwenda, hwena hen ebon de syal ta gwen wenyik mo irse gwen nakore nakae mamkam ere hap gulin gwenda.
²⁵ Ëe zebe emsa airi gweblak, zebe eno te-alana kamanak lo tasik. Te-alana in an de.’
²⁶ “Ki zep ding gulbluka, ‘Em in abon de babu gwen zini jal-jal tanganna hen asang tamna! Ema eiwakam asa anakan tame taka: Ëe home ere en mo eiyas gin nukore ei nika tan gwenan, hwena aha mo irse gwen nakore ei nikae gulin gwenan.
²⁷ Em de kirekam asa tame tankam, ki emaka ano te-alana insa te-ala lam ta gwen golak dre neka– aen de etan lwahal zankam de dekon ap engka en mas gulblun hapye.’
²⁸ Dekam zep ahakore babu zemka gubiridaka, ‘Emki zebon onak de te-alana insa al tablan. Hwena men zeno yuna dare taha-tapkam lwaꞌara, zebe hap hwena erblak.
²⁹ Sap zini men zen ano kap tablanna kim syal-syal gwenna, zebe hap etan beya en tangankam asa kap ta gweblal– dekam de hendep taha-taha gweblan hap. Hwena men zen ano kap tablan naka asang gweblanna, men zen betek en maekam nama lwablaꞌanka, desa asa etan al tablal.
³⁰ Babu gwen zi karekna insa em lang kawesin sin dep hiri tan– zini men dekon yusyustin niban gona ta gwenanke, hen sang-sang hap ekna ngalk-ngalk da gwibirinke.’”
³¹ “Ngatan zi mo lang nakore Zi Tanganna Ëe de teipsinkim hata zankam, ere mo dam taha nakore zini sa tingan Asa ngirin da halzal, hendep dekam Alap onakore ngatan nabare komal tumnak asa nikinzir.
³² Ëre mo dam taha nakore zini dekam sa tingare langnak de zini ere onak dep tagal nulsul. Ëe dekam asa hlil– san de otweran zaho ta gwibin zi de zaho zemka hlinni kiye, kambingni sren de kang gun, dombana hen sren.
³³ Dekam dombakam de wenya asa ere mo dam taha san de ezaun hup gubiridal. Kambingkim de wenya, desa irgwa taha san de ezaun hup asa gubiridal.
³⁴ Ki asa hwena dam taha san dekam de ezaun wenya insa gubiridal, ‘Haen, nere mae mo Bian dekakim ze dawemsa ebe mae hap golzimki. Dekam biti gwezak– ere mae hap de ehamal tazimdinni awe dep, mensa orep okamana ansa de yang gulsun srem nakon Bian ebe mae hap hamal tazimkike.
³⁵ Sap Ëe kime usak naban gwe gwek, eme tembanena ap ol gweblak. Kime ho-hole gwe-gwek, eme ap hona ol gweblak. Ëe kime aha lang nakon hata gwezak, eme Asa gola kon eirin gwek.
³⁶ Ëe kime irkan gwe gwek, eme abe hap pakeanna kap la gweblak. Hen Ëe kime sang-sang gwe-gwek, eme Asa sam lasik gwek. Hen bwinak kim Asa se dyain gwek, eme ze Asa du ke gweblak.’
³⁷ “Hwena enlala dam-damkam de lowehe gwen zini in sa anakan Asa ding nulblir, ‘Bian, ee bawalkame usak naban Emsa hla lak? – in dekame tembanena ebe hap olblakye. Hen bawalkame ho-hole gwennak Emsa hla lak? – in dekame hona ebe hap olblakye.
³⁸ Hen ee bawalkame Emsa aha langna kore zi mo kim hla lak? – in dekame gola kon Emsa eirinkye. Hen Bian, ee bawalkame irkan Emsa hla lak? – in dekame pakeanna ebe hap kap lablakye.
³⁹ Hen ee bawalkame Emsa sang-sang naban hla lak? – hen bwinak de se tya irinnikye, in dekame Emsa du keblakye.’
⁴⁰ “Ëe dekam asa hwena ding gulzim, ‘Eiwa denakae emsa gubiridaꞌan: Em kime kirekam syal ei gwibik, sap Asa de taibliblan walas kwasap mae hap, zen dekam Asae mas e gweblak.’
⁴¹ “Ëe dekam hwena irgwa taha san dekam de ezaun wenyaka asa gubiridal, ‘An kon em sek gwen. Em an zen– Alap onakore jalsa de hlaun hup de wenya. Tinsin srem syauk bla yala wakuwe em biti gwen– mensa Alap dowal mo kigi hap zere mo taha tri so gweblan wenya ban dep hamal tazimkike.
⁴² Sap Ëe kime usak naban gwe gwek, em home abe hap tembanena olblak. Hen Ëe kime ho-hole naban gwe gwek, em home hona abe hap olblak.
⁴³ Ëe kime aha lang nakon hata gwezak, em home gola kon Asa eirink. Ëe kime irkan gwe gwek, em home abe hap pakeanna kap lablak. Hen Ëe kime sang-sang gwe-gwek, hen bwinak kim Asa se dyain gwek, em home dekam Asa mas eblak.’
⁴⁴ “Zen sa hwena Asa ding nulblir, ‘Bian, ee bawalkame usak naban emsa hla lak? – hen ho-hole gwennakye, hen aha lang nakon de hata zannak, hen irkan de gwennak, hen sang-sang gwennak, ahaksa bwinak de gwennakye, in dekame Emsa mas ebla srem gwekye.’
⁴⁵ “Hwena Ëe dekam asa ding gulzim, ‘Eiwa denakae emsa gubiridaꞌan: Asa de taibliblan walas kwasap maena men desae mas eibirida srem gwe-gwek, zen dekam Asae mas ebla srem gwek.’
⁴⁶ Zini in dekam sa syauk bla hi-hitinnik biti gwer– hendep denaban de ze lowehe gwen hapye. Hwena enlala dam-dam enkam men zen lowehe gwek, zen zen sa hendep de engaya gwen hap dena hla nul.”